Fakailoaaga
Lagomatai ma e Tau Komiti he Kau Fakatufono
Ko e matakau he Kau Fakatufono he Tau Fakamoli a Iehova, he magaaho nei kua 12 e numela, kua fakatumau ke fekafekau fakamoli ke he ha lautolu a tau kotofaaga. Kua loto fakaaue tumau a lautolu ke he tau tagata fakamoli he “moto tagata tokologa” hane fa e tupu ki mua e tokologa ma e ha lautolu a lalago fakamakutu. (Fakakiteaga 7:9, 15) Ha kua onoono atu ke he tupu ki mua lahi mahaki ke he lalolagi katoa, kua tuga ko e lata lahi he magaaho nei ke foaki atu ke he Kau Fakatufono e falu lagomatai. Ha kua pihia kua fita he fifili ke uiina e falu tagata lagomatai, ke matapatu lahi mai he vahaloto he moto tagata tokologa, ke taute auloa ke he tau feleveiaaga he tau Komiti takitokotaha he Kau Fakatufono, hanai, ko e tau Komiti he Matakau Gahua, Taute Fakailoaaga, Lagomataiaga, Fakaakoaga, mo e tau Komiti Tohia Tala. Ti kua, ko e numela ha lautolu ka fakalataha atu ke he tau feleveiaaga takitokotaha he tau komiti nei to tupu ki mua ke fitu po ke valu. I lalo he takitakiaga he matakau gahua he Komiti he Kau Fakatufono, ko e tau lagomatai nei to taute vala gahua he tau fakatutalaaga mo e to taute e falu kotofaaga kehekehe ne age he komiti ki a lautolu. To kamata e fakatokatokaaga fou nei ia Me 1, 1992.
Mai he tau tau loga ti hoko ke he magaaho, ko e numela ha lautolu ne toe mai he Tau Fakamoli ne fakauku ne fa e tote hifo, ka e he magaaho taha kua hane tupu ki mua e numela he moto tagata tokologa ti kua mole atu ha mautolu a tau amaamanaki homo ue atu. (Isaia 60:22) Kua fakaaue ha a mautolu ki a Iehova ma e fakalaulahiaga mitaki lahi nei! He magaaho ne talia mo e loto fakaaue lahi e higoa fou, ko e Tau Fakamoli a Iehova, he tau 1931, ko e tapunu he numela he tau tagata fakailoa he Kautu ko e 39,372, ne tokologa lahi mai ia lautolu ia ne talahau ko e tau matakainaga fakauku a Keriso. (Isaia 43:10-12; Heperu 2:11) He onogofulu e tau tau fakamui, he tau 1991, ko e tapunu he tau tagata fakailoa ke he lalolagi katoa ko e 4,278,820, ne 8,850 a lautolu hokoia ne talahau ko e tau fakauku ne toe. Kua tuga ne tatali ki ai mai he maamaaga ke he Tohiaga Tapu, ko e “moto tagata tokologa” he magaaho nei kua lahi mai e numela ha lautolu ia lautolu ne toe he “fuifui mamoe gahoa” ti 480 ne loga mai ke he 1. (Luka 12:32; Fakakiteaga 7:4-9) Ke he levekiaga he tau mena hane laulahi he Kautu, kua manako moli a lautolu ne toe mo e kua loto fakaaue he kau auloa mo e lalago atu e moto tagata tokologa.
Tuga ne fakamaama mai i loto he fufuta tohi nei he Ko e Kolo Toko, kua ha ha i ai e matakau kua fekafekau fakalataha mo Isaraela fakaagaga he vaha nei kua tatai lahi mo e tau Netini mo e tau tama tane he tau fekafekau a Solomona ne liliu fakalataha mai he fakapaeaaga i Papelonia mo e tau Iutaia ne toe; kua tokologa mai foki e tau tagata nakai ko e tau Isaraela he tau Levi ne liliu mai. (Esera 2:40-58; 8:15-20) Ko e tau ‘foaki atu a lautolu’ mai he vaha loto he moto tagata tokologa he vaha nei ko e tau tagata tane Kerisiano motua ne fa mahani lahi ha ko e fua ne tupu mai he taute e tau levekiaga i loto he tau lala, he gahua o fano, mo e ke he tau fakapotopotoaga 66,000 ne fakatu he magaaho nei ke he lalolagi katoa.
He magaaho ku kua mole, ne taute e tau Aoga he Fekafekauaga he Kautu ke he lalolagi katoa ma e tau fakaakoaga ke he tau leveki mo e tau lagomatai ha lautolu ko e tau fekafekau lagomatai. I loto he Tau Fahi Kaufakalataha hokoia, ne 59,420 e tau leveki ne fakalataha ki ai. Ti kua tauteute tuai e “tau patu” nei ke taute fakamoli ha lautolu a tau kotofaaga ke lauia mitaki lahi.—1 Peteru 5:1-3; fakatatai Efeso 4:8, 11.
He matapatu kaina i Brooklyn he Tau Fakamoli a Iehova, ko e falu kua ‘foaki atu e lautolu’ ne fekafekau ke he tau tau loga lahi mahaki. Kua fakalataha ia lautolu nei e tau leveki motua, mai he moto tagata tokologa ne moua lahi e iloilo mo e kua fa mahani lahi mo e tau mena. Ha kua pihia, kua gahoa ne fifili he Kau Fakatufono mai he tau leveki pihia ke lagomatai ke he tau feleveiaaga he tau komiti he Kau Fakatufono. Kua nakai pehe ko e tau tagata tane kua leva he fekafekau a nei. Ka e pehe, kua motua a lautolu, ko e tau tagata tane ne fa mahani lahi mo e tau mena ti kua fai fakakiteaga ko e lata a lautolu ke foaki lagomatai ke he taha fahi gahua pauaki. Ha kua kotofa a lautolu ke gahua fakalataha mo e komiti kua nakai age ki a lautolu ha tuaga pauaki. Tuga ne pehe a Iesu hagaao ke he hana tau tutaki, ‘ko e tau matakainaga a mutolu’ oti. (Mataio 23:8) Ka e pete ni, to lahi e mena ne tuku atu ke he tau tagata tane nei ke leveki, mo e ha kua pihia ‘to kumi atu foki e tau mena loga’ ki a lautolu.—Luka 12:48.
Kua olioli a tautolu ke he oatuaga ki mua he fakatokatokaaga a Iehova he vaha nei. Mai he tau tau hogofulu kua mole, kua teitei ke ha ha ke 100 e pasene ne tupu ki mua e numela ha lautolu kua fekafekau he fonua, ke fakatatai mo e perofetaaga hagaao ki a Tavita Lahi Mahaki Atu, ko Iesu Keriso: “Ha ko e tupu ki mua he hana fakatufono mo e mafola to nakai fai fakaotiaga.” (Isaia 9:7, King James Version) Ke he puhala taha ne taute gahua e tau Netini he tau fahi he tau ekepoa he liu ke ati hake e tau kaupa a Ierusalema, ti ko e perofeta hagaao ke he fakatokatokaaga a Iehova he vaha nei ne hane fa e fakamoli: “To ati hake he tau tagata kehe hau a tau kaupa.” (Isaia 60:10; Nehemia 3:22, 26) Ko e tau Netini he vaha fou nei kua lata ke nava ki ai ma e makutu ne fakakite e lautolu ke he ati hakeaga ke he tapuaki moli, he lagomatai e “tau ekepoa a Iehova” ke he ha gahua po ke fekafekau kua liga ne kotofa ki ai i loto he fakatokatokaaga a Iehova he lalolagi katoa.—Isaia 61:5, 6.