Tau Fakamoli a Iehova—Ko e Fakatokatokaaga i Tua he Higoa
IA OKETOPA 6, he tau 1990, ne teitei ke 5,000 e moto tagata tokologa ne tolo ke he Fale Toloaga he Tau Fakamoli a Iehova he loto Taone i Jersey, New Jersey, F.K.A., ke he feleveiaaga lagataha he tau he Watch Tower Bible and Tract Society kua teitei hoko e magaaho ke iloa e lautolu taha mena fakaofo. Ne fakailoa he tagata takitaki, ko John E. Barr, ne fakailoa ke he tau tagata he toloaga e fakatoka maiaga he vitio ne 55 e minute ne fakamataulu ko e Jehovah’s Witnesses—The Organization Behind the Name (Tau Fakamoli a Iehova—Ko e Fakatokatokaaga i Tua he Higoa). Ko e vitio fakamua a nei ne taute la ia he Kaufakalatahaaga, ka e—kaeke ko e finagalo a Iehova ka e moli, nakai ko e mena fakahiku.
Kua fakakite he vitio ko e fakatokatoka fefe e tau tagata a Iehova ke tuku atu e fakamoli ke he higoa he atua mo e tukuogo e “tala mitaki nai he kautu.” (Mataio 24:14) Ne lagaki fakamahino hake e matapatu i Brooklyn, New York, mo e tau mena gahua he Watchtower Farms. Kua molea atu he 500,000 e tau tapakiaga ke he vagahau Peritania ne taute, mo e kua maeke he magaaho nei (po ke to nakai leva to) maeke ke moua ke he 26 e falu he tau vagahau.a
Kua Fefe e Taliaga?
Fefe e taliaaga ke he vitio he tau tagata kua nakai ko e Tau Fakamoli a Iehova? Ne tohia e taha tagata tane fakatu gahua:
“Ke he kitiaaga haku kua mitaki lahi mahaki e tauteaga he kasete. Kua nava lahi au he maama lahi mo e fakatokatoka mitaki e tau fakatino tuga ko e taute he faoa feua pauaki. Kua mukamuka lahi au ke nimo ko e kasete mo e manamanatu lahi ko e kifaga. Kua lata ke mua atu e aoga lahi e kasete nei ke fakamaama e kakano he matapatu ha mutolu i New York. Fakatulutulou atu ke he mena mitaki lahi nei.”—J. J.
Ne lagomatai lahi ki a lautolu ne fakaako Tohi Tapu fakalataha mo e Tau Fakamoli a Iehova he kitekite ke he vitio. Kua fakamaama mai he mena ne mui mai ko e ha:
“Ne fakaako Tohi Tapu au mo e fuata tane kua 20 e tau tau he moui mo e fano ke he aoga tokoluga atu he matakavi. Ne manamanatu lahi a ia ke he tau tutuaga hane fae kelea he lalolagi. Ka e he kitekite ke he kasete mo e kitia oti e tau matakainaga fuata tane Peteli ia kua ha ha ia lautolu e kakano moli he moui, ne hiki katoatoa hana aga. Ne hau a ia ke he Aho Toloaga Pauaki ha tautolu mo e ole ke fakaako Tohi Tapu lagaua he fahi tapu. Ne ole e taha tagata fakaako Tohi Tapu foki, ko e faiaoga he aoga tokoluga, ke uta e vitio ke fakakite ke he hana tau magafaoa. Ne manamanatu a lautolu ko e Tau Fakamoli a Iehova ko e mena lolelole ni, ko e fakatokatokaaga tote nakai talahaua. Ne ofomate a lautolu ha ko e gahua ke he lalolagi katoa ha tautolu mo e fakakeheaga kua taute e tautolu, kua fakaaue lahi ni ki a Iehova.”—J. B.
“Kua nakai maeke e tau kupu ke fakamaama e olioli ne logona e au he magaaho ne mole mai he kitia e vitio, ne pa mai e tau hihina mata he fifine ne fakaako Tohi Tapu mo au he olioli mo e loto fakaaue. Ne pehe a ia mo e tau hihina mata: ‘Kua maeke fefe he ha tagata ke nakai kitia ko e fakatokatokaaga a nei he Atua moli, ko Iehova? Ne nakai iloa e au ko e momoui e tau tagata pihia.’ Mo e ti pehe a ia: ‘Kua manako au ke papatiso.’”—C. D.
“Kua loga e tau mena ne kautu a mautolu ki ai he fakaaoga e vitio ke he tau tagata fakaako Tohi Tapu. Ne hau e tane he taha tagata ne fakaako Tohi Tapu mo e hoana haku ne po. Ne fa totoko lahi a ia. Ne kitekite a ia ke he vitio. He mole mai ne huhu mai e ia e tau huhu mo e fano kehe mai i hinai mo e Tohi Tapu mo e tohi fakaako Tohi Tapu ko e You Can Live Forever in Paradise on Earth. He vaha fakamua ne fa tugi e ia e tau tohi fakamaama Tohi Tapu he hoana hana!”—D. H.
Kua moua foki he tau tagata fuata e vitio ko e mena fakamanamanatu, tuga kua fakakite mai he tau kupu i tua:
“Kua ono mo e hafa a au. Ne manako au ke he vala kua hagaao ke he Tohi Tapu mo e magaaho ne mafiti lahi e tau puha.”—K. W.
“Kua pehe e tau fanau ikiiki ha maua ko e mua atu e mitaki mai he ha fakaholoaga ne kitia e lautolu he tivi.”—R. C.
“He mole mai he kitekite lagaua ke he vitio e tama tane ha maua ne lima e tau tau he moui, ne onoono fakalahi ke he mena katoa, ti huhu mai, ‘Maeke nakai a tautolu ke kitekite ke he mena nei he tau aho oti?’ Ne ui mai e tama fifine ha maua ne tolu e tau tau he moui, ‘manako au ke fano ke he Peteli ke taute e tau tohi!’ ”—M. E.
“Ko e fanau haku ko Robin mo Shannan, kua 12 mo e 9 e tau tau he moui, ne fa pele tumau e kasete nei. Ne talahau e tama fifine fakahiku haku he mole mai he kitekite ke he kasete, ‘Manako lahi au ke fano ke he fekafekauaga he fonua. Ko e mena fiafia lahi.’ Kua logonatia e maua kua lauia tonu e vitio nei ke he moui he magafaoa ha mautolu. Kua fakahauhau ha ke fakamoui e fakaholoaga he televisoni kua maeke ia koe ke hagahaga mitaki ka kitekite ki ai!”—N. B.
“Kua 131/2 e tau tau he moui haku. Kua taute he vitio fou au ke iloa ko e fakateaga lahi a au ke he tau mena ne foaki mai e Iehova. Ko e monuina ke eke mo taha he tau tagata he Atua.”—K. W.
“Kua 16 e tau tau he moui haku, mo e kua lagomatai he vitio nei ke pipi mau ke he loto manamanatu haku ko e gahua ke he lalolagi katoa e mena nei ne taute.”—A. M.
“Ne talahau mai e tau fanau ha maua ke he tau mata ha lautolu kua galo e mitaki he tivi mau ko e fua mai he kitia ko e fefe e fefeua fakafiafia moli he pule faka-Atua. Kua fakamalolo foki ha lautolu a manako ke gahua fekafekau mau.”—L. M.
Kua amotia foki a lautolu kua loga e tau tau he eke mo Tau Fakamoli a Iehova, mai he mena ne kitia e lautolu.
“Kaeke kua toka hifo he vitio e pakiaaga pihia ki a tautolu ko e tau tagata a Iehova, to lauia lahi fefe la e falu? Ka uka lahi ke hahamo e fakatokaaga nei, ne taha e tula ne fakaaoga e au he magaaho haku mo e ahi atu ke he Peteli mai he poko hagahaga mitaki haku!”—K. B.
“He mole mai he kitia e au e tauteaga fakamitaki mo e fakaeneene kua tuku ke he tau mena oti ne taute, kua logona e au e manako ke fano ke he poko haku mo e kuku mau e tau tohi faka-Tohi Tapu haku.”—L. P.
Kua fakamalolo atu foki a mautolu ki a mutolu, ke fakaaoga taha magaaho ke kitia e vitio ko e Jehovah’s Witnesses—The Organization Behind the Name. To tuku atu e onoonoaga kehe he moui ki a koe mo e to lagomatai a koe ke loto mauokafua he vaha i mua.
[Tau Matahui Tala]
a Ko e vagahau fakamailoga lima mo e tino Amerika, Arapi, Italia, Falani, Finilani, Heleni, Holani, Hugari, Kanatone, Katalonia, Korea, Koroatia, Manatarini, Noue, Pasakue, Polani, Potukolu (Pasili), Potukolu (Europa), Romania, Sekolovakia (Pohemia), Sihamani, Sapani, Sepania, Solovaka, Suetene Tenemaka.