Vitiō Foou ke Kamata e Tau Fakaakoaga Tohi Tapu
Ko e vitiō kū ne mataulu Ko e Ha ne Fakaako e Tohi Tapu? kua hokotia ai ke he tau tagata tokologa he jw.org. Kua taute e vitiō ke omoomoi e tau tagata ne fiafia ke talia e uiina ha tautolu ke fakaako Tohi Tapu nakai totogi. Maeke ke moua ai ka kiliki e “Ole Fakaako Tohi Tapu” i lalo he lau fakamua he faahi Kupega Hila po ke fakaaoga e QR (quick response) code ne tū i tua he tau tuleke foou oti ha tautolu. Hanei falu puhala ke fakaaoga fakamitaki e tautolu e vitiō.
Ka taute e liu aahi atu, tala age ke he tagata he kaina: “Maeke nakai au ke fakakite atu e vitiō kū ne fakamaama e puhala kua maeke ia koe ke moua e tau tali ke he tau hūhū Tohi Tapu haau?” Ka talia e ia, fakakite age e vitiō he matini utafano haau po ke komopiuta ni haana.
Ka foaki e tautolu e taha he tau tuleke foou ka gahua fakamatala he magaaho noa po ke fakamatala he toloaga tagata, fakakite age e QR code ti fakamafana a ia ke fakaaoga aki e matini uta fano haana. Ha kua loga e tau vagahau ka ta atu fakahako he QR code a koe ke he vitiō he ha tautolu a faahi Kupega Hila, liga maeke ke fakakite age e vitiō he mogoia ni ka fakaaoga e matini uta fano haau.
Tala age ke he tau tagata ne gahua mo koe, tau kapitiga aoga, tau magafaoa, po ke falu ne mahani mo koe hagaao ke he vitiō, ti tala age kua fiafia a koe ke fakakite age ki a lautolu. Po ke fakafano atu he meli hila e link ke kitia e vitiō, ti uiina a lautolu ke kitekite ai.
He fakaaoga e puhala foou nei kua foaki mai, to liga maeke ia tautolu ke loga e fakaako Tohi Tapu ka kamata, ti lagomatai fakaagaaga ai a lautolu kua “kotofa ke he moui tukulagi.”—Gahua 13:48.