Kua Hao Nakai a Koe?

NE HOGOFULU e tau tau a Johnny he magaaho ne fakatu he tagata tane a ia he fakatataaga fakafiafia mo e huhu: “Tama tane tote, kua talia nakai e koe a Iesu Keriso, ko e hau a Iki mo e Fakamouiaga?” Kua tuga ko e huhu kehe a ia ki a Johnny, ha ko e mena tali tonu tuai a ia ki a Iesu. Ti kua tali a ia, “E tua au.” “Fakaheke e Iki!” he kalaga he tagata tane ke logona he tau tagata oti. “Kua hao tuai foki e taha solu ma e Keriso!”

Kua mukamuka moli pihia kia e fakamouiaga? Kua “hao” ka Johnny mai he magaaho ne talahau e ia e tau kupu ia, pete ni ko e heigoa mo e heigoa ka taute e ia he hana moui ne toe? Kua tokologa e tau tagata loto fakamoli ka tali e. Kua pehe e falu tama lau tuleke fakalotu ke tohi hifo e aho ne kua “hao” a koe ke maeke ai ia koe ke manatu.

Kua tohia he taha fekafekau lotu “ko e magaaho mua ni ne tua ki a Keriso . . . kua fita tuai e fakahikuaga he taha ke iloa.” Ne talahau e ia ko e pehe e Tohi Tapu ko e falanaki e fakamouiaga ke he mena lagataha mo e ke he magaaho ni “kua tua, nakai ke he tumauaga he tua.” Ne tohi he tagata tohia mena lotu foki: “Ko e gahua kua oti a nei. Kua fita he moua e koe . . . ‘Kua fita he oti e tau’ hau. Kua uta kehe tuai e ‘hala hau.’” Ka e eke foki ni e tau tagata ne tua lahi mahaki ko e moli e mena nei ke kitia ko e fai lekua he mena ia. Kua maaliali ai ko e tokologa e tau tagata ne fita he tala age ki ai kua “hao” a lautolu ka e nakai eke e tau momoui ke lata mo e puhala ne talahau he Tohi Tapu. Ti ko e fakamaamaaga ne fa mahani ke moua ko e liga nakai “talia” moli e lautolu e Keriso.

Ti ko e heigoa moli mogoia e kakano he “talia” a Iesu? Ko e magaaho mua kia kua tua, po ke puhala tumau he moui? Kua lata nakai ha tautolu a taofiaga ke malolo lahi ke omoi a tautolu ke fai gahua? Maeke moli kia a tautolu ke talia e tau mena aoga he poa a Iesu ka e nakai lago e matagahua ke mumuitua ki a ia?

Kua tokologa e tau tagata ne manako ni hokoia ke he tau fakamonuinaaga ka e nakai ke he matagahua ne lago ke mumuitua mo e omaoma ki a Iesu. Ko e moli hanai, ko e mena fakalavelave e kupu “omaoma” ki a lautolu. Ka e pehe a Iesu: “Ati hau a koe mo e mui mai kia au.” (Luka 18:18-23) Mo e talahau mai he Tohi Tapu: “Mo lautolu kua nakai omaoma ke he vagahau mitaki he Iki ha tautolu ko Iesu Keriso . . . ke fakahala ke he mahaikava tukulagi.”​—2 Tesalonia 1:8, 9; Mataio 10:38; 16:24.

Kua loga e tau mena ne talahau he Tohi Tapu ne fakatutu hake e tau huhu fakamanamanatu lahi moli ke he tau mena ne fakaako hagaao ke he fakamouiaga. Kaeke kua loto a koe ke iloa e mena moli ne talahau he Tohi Tapu ke he mena nei, to moua ai e koe he tau lau tohi ne mumui mai e tau mena kua mua atu e fulufuluola. Hafagi hau a Tohi Tapu, mo e totou e tau kupu tohi ne fakamau i ai ke kitia ko e heigoa ne fakaako e Iesu mo e hana tau aposetolo hagaao ke he mena aoga lahi nei.