Tau Fuata ne Manatu ha Lautolu a Tufuga
“Hanai, kia manatu a a koe ke he hāu a vaha fuata kia ia ne [“Tufuga,” NW] a koe.”—FAKAMATALAAGA 12:1.
1. Ko e heigoa e talahauaga he tama 11 e tau he moui ne fakakite ko e moli ha tautolu a Tufuga ki a ia?
KUA mitaki ha he magaaho ka tutala mo e taute mena e tau tama ke he puhala ne fakakite kua onoono ai a lautolu ke he Atua ko Iehova ko e peresona moli ne fakalilifu mo e manako a lautolu ke fakafiafia! Ne talahau he tama tane 11 e tau he moui: “He magaaho ka nofo tokotaha au mo e onoono ki fafo he puhio, ne kitia e au ko e homo ue atu ha ia he tau tufugatia a Iehova. Ati manamanatu ai au ke he fulufuluola he Parataiso anoiha mo e magaaho ka maeke au ke amoamo e tau manu huifa he mogoia.” (Isaia 11:6-9) Ne lafi atu a ia: “He magaaho ka nofo tokotaha au, ne liogi au ki a Iehova. Iloa e au to nakai ita a ia ki a au he tala tumau ki a ia. Iloa e au kua haia tumau a ia ke leveki mai au.” Kua moli nakai ki a koe ha tautolu a Tufuga ke tuga e moli a ia ke he tama tane nei?
Fefe e Moli he Atua ki a Koe?
2. (a) Maeke fefe hau a Tufuga ke moli ki a koe? (e) Ko e heigoa e vala ne ha ha he tau mamatua ke lagomatai ha lautolu a fanau ke kitia ko e peresona moli e Atua?
2 Ke eke a Iehova mo e hana tau maveheaga ke moli ki a koe, kua lata fakamua ia koe ke ako hagaao ki a ia mo e ke he vaha homo anoiha kua foaki e ia ki a koe i loto he lalolagi fou tututonu ne fakamaama he Tohi Tapu. (Fakakiteaga 21:3, 4) Kaeke kua fakaako he tau mamatua hau a koe hagaao ke he tau mena nei, kua ha ha ai ia koe e kakano ke loto fakaaue ha kua taute he mena nei a koe ke fanogonogo ke he poakiaga mai he agaga: ‘Hanai, kia manatu e koe a ia ne Tufuga a koe.’ (Fakamatalaaga 12:1, fakatatai NW.) Taha e fifine fuata ne tutala hagaao ke he hana a fakamahaniaga mai he tau mamatua he vaha tote: “Ko e tau mena oti he moui kua liliu tumau ki a Iehova. Ko e kei haku anei ke manatu e Tufuga haku.” Taha foki e fifine fuata ne talahau: “To fakaaue tukulagi au ke he haku a tau mamatua he fakaako au ko Iehova ko e peresona moli. Ne fakakite mai e laua ki a au e puhala ke fakaalofa ki a ia mo e tutala ki a au hagaao ke he fiafia he fekafekau mau ki a ia.”
3, 4. Ko e heigoa ka lagomatai a koe ke manamanatu ko Iehova ko e peresona moli?
3 Ka e, kua tokologa ne uka lahi ke maama ko e peresona moli e Atua ne kua fiafia ki a lautolu. Pihia nakai a koe? Taha e fuata ne kua lagomatai ke manamanatu hagaao ke he Atua ke he puhala fakatagata ha ko e talahauaga nei i loto he The Watchtower: “Ko e lahi he Atua ko Iehova ke he hana a tino, kua nakai iloa e tautolu.” Moli, kua nakai falanaki e mua ue atu he Atua ke he hana a lahi po ke talagaaga, tuga ne talahau mai he tau kupu ne mumui mai i loto he The Watchtower ia: “Ko e hana a lahi ue atu kua kitia ai ha ko ia ko e Atua,” kua moli ni, ko e Atua tua fakamoli, fakaalofa hohofi, fakaalofa, mo e fakamagalo.a (Esoto 34:6; Teutaronome 32:4; Salamo 86:5; Iakopo 5:11) Kua hokotia nakai a koe ke kitia ko e peresona pihia a Iehova, ko e kapitiga ke falanaki ki ai mo e maeke ia koe ke moua e fakafetuiaga uho mo ia?—Isaia 41:8; Iakopo 2:23.
4 Kua lagomatai e Iesu hana a tau tutaki he vaha fakamua ke olioli e fakafetuiaga fakatagata mo e Atua. Ti, he magaaho ne tohia e aposetolo ko Ioane hagaao ke he hana a amanaki ke liu tu mai ke he moui he lagi, ne talahau a Ioane: “[To tuga e Atua] a tautolu, ha ko e mena to kitia tonuhia ai a ia e tautolu.” (1 Ioane 3:2; 1 Korinito 15:44) Kua maeke foki ke lagomatai e tau fuata he vaha nei ke kitia ko e peresona moli e Atua, ko ia kua lata ia lautolu ke iloa mitaki pete ni kua nakai fakai a lautolu ke kitia a ia. Ne talahau he taha fuata tane: “Ne lagomatai he tau mamatua haku au ke manatu a Iehova he huhu mai e tau huhu loga, tuga anei, ‘Ko e heigoa e talahauaga ha Iehova? Maeke fefe ia koe ke fakamaama ai ke he hau ni a tau kupu? Ko e heigoa e kakano he mena ia?’” Nakai kia taute he tau huhu pehenei a tautolu ke manamanatu hagaao ke he ha tautolu a fakafetuiaga fakatagata mo e Atua?
Ko e Kakano ke Manatu
5. Ko e heigoa e fakafifitakiaga ne fakakite he Tohi Tapu ne kua lahi e kakano he manatu e higoa he tagata mai he manatu hana higoa?
5 Ke omaoma ke he tomatomaaga, ‘Hanai, kia manatu e koe a ia ne Tufuga a koe,’ kua mua atu e kakano mai he manamanatu noa ki a Iehova. Kua lata ai ke fakagahua, he taute e mena ne fiafia a ia. He magaaho ne ole fakamakamaka e tagata holifono ki a Iesu: “Kia manatu mai au ka hoko atu a koe ke he hau a kautu,” kua mua atu e mena ne manako a ia ke taute e Iesu mai he liu manatu hana higoa. Kua manako a ia ke taute e Iesu taha mena, ke liu fakatu mai a ia. (Luka 23:42, NW) Ke he mena taha ia, ne amanaki e tagata ne tuku fale puipui ko Iosefa ke fai mena ka taute ma hana he magaaho ne ole a ia ke he tagata taute uaina ha Farao ke fakamanatu a ia ki a Farao. Mo e he magaaho ne olelalo a Iopu ke he Atua, ‘Ke manatu mai e koe au,’ kua ole ai a Iopu ke he taha vaha anoiha, ka liu fakatu mai he Atua a ia.—Iopu 14:13; Kenese 40:14, 23.
6. Maeke fefe e kupu Heperu ma e “manatu” ke hagaao ke he fakaalofa ke he mena po ke tagata ne manatu?
6 Taha e pule malolo ne talahau ko e kupu Heperu ne fakaliliu “manatu” kua fa pehe ai “ko e fakaalofa hohofi he loto manamanatu mo e gahua ne fakahoa e liu fakamanatu.” Ko e fakaaogaaga he “fakaalofa hohofi” he kupu “manatu” kua maeke ke kitia ai ke he mena ne talahau he “tau tagata kehe tokologa” he tutakale: “Kua manatu e tautolu ke he tau ika ne kai fakahanoa ai e tautolu i Aikupito.” Ke tuga he olelalo a Iopu ke manatu mo e talia he Atua, kua ole foki a Hesekia, Nehemia, Tavita, mo e he salamo ne nakai fakahigoa ki a Iehova ke manatu mo e fakaalofa hohofi ha ko e ha lautolu a tua fakamoli.—Numera 11:4, 5; 2 Tau Patuiki 20:3; Nehemia 5:19; 13:31; Salamo 25:7; 106:4.
7. Kaeke ke manatu e tautolu e Atua mo e fakaalofa, to lauia fefe ai ha tautolu a mahani?
7 Ti liga huhu hifo a tautolu, ‘Kua manatu mo e fakaalofa hohofi nakai a tautolu ke he ha tautolu a Tufuga mo e kalo mai he taute ha mena ke fakahogohogo po ke fakamamahi aki a ia?’ Kua talahau mai he taha fuata: “Ne lagomatai e Mama au ke mailoga kua fai logonaaga a Iehova, ti he tau tau fakamua he moui, kua mailoga e au ko e tau mena ne taute e au kua iloa e ia.” (Salamo 78:40-42) Taha foki ne fakamaama mai: “Kua iloa e au to lagomatai po ke fakalavelave he tau mena taute e au e tali ke he paleko ha Satani ne taute ki a Iehova. Ne manako au ke fakafiafia e loto ha Iehova, ti lagomatai he mena ia au mo e fakatumau ai ke lagomatai au he vaha nei.”—Tau Fakatai 27:11.
8. (a) Ko e heigoa e tutuliaga ka fakakite ko e manatu e tautolu a Iehova mo e fakaalofa hohofi? (e) Ko e heigoa e tau huhu ka manamanatu fakapulotu e tau fuata ki ai?
8 Kua moli ai, i loto he lalolagi kelea nei, kua nakai mukamuka tumau ke manatu a Iehova he fakakatoatoa atu ke he gahua ne fiafia a ia. Ka e ko e mitaki ha kaeke ke fifitaki e koe e fuata ko Timoteo he senetenari fakamua—mo e ke totoku foki e tau afe he tau fuata matakutaku Atua he vaha nei—he tutuli ke taute mau e fekafekauaga faka-Kerisiano he eke mo fekafekau paionia! (Gahua 16:1-3; 1 Tesalonia 3:2) Ka e, liga ke huhu atu, To maeke nakai ia koe ke leveki ni e koe a koe he gahua fekafekau paionia? Ti ane mai kua mau a koe, to ha ha nakai ia koe e iloilo ke foaki ma lautolu he hau a magafaoa? (1 Timoteo 5:8) Ko e tau huhu mua atu e aoga a nei, mo e kua lata ke manamanatu fakahokulo a koe ki ai.
Fakaakoaga mo e Fai Kakano
9. Ko e heigoa e fifiliaga ne fehagai mo e tau fuata hagaao ke he fakaakoaga he lalolagi?
9 He holo ki mua e uka he kaufakalatahaaga he tagata, kua liga lata ai ke fakalahi e fakaakoaga ke moua e gahua mitaki ke leveki aki a koe ni he gahua paionia. Liga kua mailoga e koe ko e falu foki ne moua e fakaakoaga he univesiti kua liliu ke fakaako foki ke hokotia ke he iloilo ne fioia he tau pule he tau gahua he vaha nei. Ti, to hoko ki fe e tutuli he fakaakoaga ha mutolu ma tau fuata ko mutolu ne manako ke fakafiafia e Atua? Ko e fifiliaga mitaki kua lata ke taute fakalataha mo e poakiaga omoomoi he agaga he loto: ‘Hanai, kia manatu e koe a ia ne Tufuga a koe.’
10. Ko e heigoa e fakaakoaga ne mua atu e mitaki ka maeke ia tautolu ke moua?
10 E moli, to manako a koe ke tutuli e tau mena ne fioia foki he tau pule malolo fakalalolagi ko e fakaakoaga mua e mitaki—ko e mena kua mailoga mai he fakaako fakamitaki e Kupu he Atua. Ne talahau he tagata Sihamani feua tohia ko Johann Wolfgang von Goethe: “Ka mua atu e holo ki mua he iloilo he [tau tagata], to lahi foki e fakaakoaga he Tohi Tapu ke eke mo fakaveaga mo e kanavaakau he fakaakoaga.” E, ko e fakaako ke he Tohi Tapu ka tauteute fakamitaki a koe ma e moui mai he falu a fakaakoaga foki!—Tau Fakatai 2:6-17; 2 Timoteo 3:14-17.
11. (a) Ko e heigoa e gahua ne mua atu e aoga ne kua maeke ia tautolu ke taute? (e) Ko e ha e taha fuata ne fifili ke moua e fakaakoaga?
11 Ha ko e fakamouiaga e iloilo ke he Atua, ko e gahua ne mua atu e aoga ke taute e koe he vaha nei ke fakailoa e iloilo ia mo e falu. (Tau Fakatai 3:13-18; Ioane 4:34; 17:3) Ti, ke taute fakamitaki e mena nei, kua lata ia koe ke moua e fakaakoaga ke he tau puhala kua aoga. Kua lata ia koe ke maeke ke manamanatu fakamitaki, vagahau mo e kakano, mo e totou mo e tohi fakamitaki—ko e tau mena ne fakaako e koe he aoga. Ti kia taute fakamitaki e tau fakaakoaga hau he aoga, tuga ne taute e Tracy, ko e fuata i Florida, T.F.K., ko ia ne paase mai he aoga mo e tau lilifu fakaako tokoluga. Ne tala mai e ia hana a amaamanakiaga: “Kua toka tumau ia au e folia ke eke mo fekafekau gahua mau he haku a Atua ko Iehova, mo e amaamanaki au to lagomatai he fakaakoaga haku au ke hokotia ke he folia nei.”
12. Kaeke ke fifili ke fakaholo ki mua e fakaakoaga he lalolagi, ko e heigoa he mena ia ka liga lagomatai ke fakamoli?
12 Kua manamanatu nakai a koe ko e ha ne fano ai a koe he aoga? Ko e fano ka ke moua e koe e lagomatai ke eke mo fekafekau mitaki ha Iehova? Kaeke ke pihia, to manako a koe ke manamanatu fakahokulo ko e hokotia nakai e fakaakoaga hau ke he finagalo nei. He mole atu e tutala mo e hau a tau mamatua, liga to fifili ai kua lata a koe ke fano he aoga ke molea e mena ne poaki he matafakatufono. Ko e fakaakoaga pihia ka lagomatai a koe ke moua e gahua ke leveki aki ni a koe ka e ha ha agaia e magaaho mo e malolo ia koe ke fakakatoatoa atu ke he gahua he Kautu.—Mataio 6:33.
13. Maeke fefe e tau Kerisiano Rusia tokoua ne fakaholo atu e fakaakoaga ke fakatata e finagalo he tau momoui ha laua?
13 Ko e falu ne o agaia ke kumi ke moua foki taha fakaakoaga kua ha ha he gahua mau he fekafekauaga he magaaho taha ni ne o a lautolu he aoga. Manamanatu ki a Nadia mo Marina, ko e tau tamafine fuata i Moscow, Rusia. Kua papatiso tokoua a laua ia Aperila 1994 mo e kamata ke eke mo tau fekafekau paionia fakaku. Nakai leva he mole ti paase mai a laua he aoga tokoluga mo e fakamau e tau higoa ha laua ke fakaako e polokalama fakamau tupe ke he ua e tau. Ia Me 1995 ne kamata a laua ke fekafekau paionia mau, ka e kua maeke agaia a laua ke moua e tuaga tokoluga he ha laua a tau vahega fakamau tupe. Ke lafi ki ai, kua maeke ia laua ke taute, he vahaloto ha laua, ke he avelesi he 14 e tau fakaakoaga Tohi Tapu he tau fahi tapu takitaha ka e o agaia he aoga. Ne amaamanaki e tau tamafine to lagomatai he fakaakoaga ha laua ke he fakamauaga tupe a laua ke moua e gahua mitaki, ke maeke ia laua ke leveki ni e laua a laua he fekafekauaga gahua mau.
14. Pete ni kua lahi e fakaakoaga he lalolagi ne fifili e tautolu, ko e heigoa e mena kua lata ke mua e aoga he ha tautolu a tau momoui?
14 Kaeke ke fakaholo atu e koe e fakaakoaga he lalolagi ke molea e mena ne poaki he matafakatufono, kia kumikumi fakapulotu hau a kakano he taute ai. Kua taute ka ke moua e higoa mitaki ma hau ni mo e ke moua e tau koloa loga? (Ieremia 45:5; 1 Timoteo 6:17) Po ke, hau kia e foliaga ke moua foki taha fakaakoaga ke fakatolomaki e fakakatoatoa atu ke he fekafekauaga ha Iehova? Ko Lydia, ko e fuata ne fifili ke fakaholo ki mua e fakaakoaga, ne talahau e onoonoaga mitaki ke he tau mena fakaagaga, kua fakamaama mai: “Ko e falu kua tutuli e fakaakoaga mua atu e tokoluga mo e fakaata e velevelemena ke fakalavelave, ti tiaki e lautolu e Atua. Ka ko au, ko e haku a fakafetuiaga mo e Atua kua mua atu e aoga ki a au.” Ko e aga mitaki ha ia a tautolu oti!
15. Ko e heigoa e tau tutuaga kehekehe he fakaakoaga ne ha ha he tau Kerisiano he senetenari fakamua aki?
15 Ka e kua kitia ai, kua ha ha he tau Kerisiano he senetenari fakamua e tau tutuaga kehekehe he fakaakoaga. Ko e tau aposetolo ko Peteru mo Ioane, ke fakatai ki ai, kua onoono ki ai ko e ‘nakai ako mo e goagoa’ ha kua nakai fakaako a laua he tau aoga rapai. (Gahua 4:13) Ko e aposetolo ko Paulo, ke he taha fahi, kua moua e mena ne fakatatai he vaha nei ke he fakaakoaga he univesiti. Ka e, kua nakai fakaaoga e Paulo e fakaakoaga ia ke fakamatalahi aki ni a ia; ka e, kua lagomatai ai he magaaho ne fakamatala a ia ke he tau tagata he tau tutuaga kehekehe he moui. (Gahua 22:3; 1 Korinito 9:19-23; Filipi 1:7) Pihia foki a Manaena, ko ia ne “[“fakaako,” NW] mo Herota e iki,” kua ha ha ia lautolu ne leveki e fakapotopotoaga i Anetioka.—Gahua 13:1.
Ko e Ha ke Leveki Fakapulotu Hau a Tau Tupe?
16. (a) Ko e ha kua liga uka lahi ke manatu ha tautolu a Tufuga kaeke ke lahi e kaitalofa ha tautolu? (e) Fakakite mai fefe he taha he tau fakataiaga ha Iesu e aoga ke manamanatu fakamua to fakatau?
16 Kaeke ke kaumahala a koe ke leveki fakapulotu e tau tupe hau, liga to uka lahi ke manatu hau a Tufuga ke taute e tau mena ke fiafia a ia. Ha ko e mena kaeke ke to a koe ke lahi e kaitalofa, kua maeke ai ke pehe kua fai iki foki a koe. Kua fakamaama he Tohi Tapu: “Ka ole tupe to eke a koe mo tupa hana ne foaki atu.” (Tau Fakatai 22:7, Today’s English Version) Taha he tau fakataiaga ha Iesu ne fakamaama mai e aoga he manamanatu fakamua to fakatau. “Ha ko hai ia mutolu,” he talahau e Iesu, “kua manako ke ati e kolo, ka e nakai nofo fakamua ki lalo ke totou e tau tupe ke palepale aki, po kua lahi nakai ia ia e tau mena ke fakaoti ai? Neke va mai kia ia e tau tagata oti ka mamata ai, he toka e fakave, ka e nakai maeke ke fakaoti ai.”—Luka 14:28, 29.
17. Ko e ha kua fa uka ai ke fakalatalata e fakatau he tagata?
17 Kua pulotu ai, mogoia, a koe ke lali ke moui hagaao ke he matapatu fakaakoaga mai he Tohi Tapu ke ‘nakai toka ha mena taha he taha tagata, ka ko e feofanaki hokoia.’ (Roma 13:8) Ka e ko e mena uka anei ke taute, mua atu he magaaho ka fehagai a koe mo e tau koloa fou loga ne talahau he tau fakatataaga kua lata lahi mo koe. Taha e matua, ne lali ke lagomatai hana fanau ke manamanatu fakamitaki, ne talahau: “Kua lahi e magaaho ne fakamole e mautolu ke fakatutala ke he tau mena kua lata mo e tau mena manako.” Kua laulahi e tau aoga ke nakai fakaako e tau lekua pihia, ti tote ni e mena ka taute kaeke ke fai fakaakoaga ke he puhala ke leveki e tau tupe he puhala mitaki. “Ne paase mai a mautolu he aoga tokoluga ke lahi ni e iloilo ke he tau fahi he puha paka tolu mai he puhala fakatokatoka tupe,” he talahau he taha tagata gahua ma e kaufakalatahaaga. Ko e heigoa, mogoia, ka maeke ke lagomatai a koe ke fakatau fakapulotu?
18. Ko e heigoa e kei ke he levekiaga pulotu he tau tupe, mo e ko e ha?
18 Ko e omaoma ke he tomatomaaga, ‘Hanai, kia manatu e koe a ia ne Tufuga a koe,’ ko e kei a ia ke he levekiaga fakapulotu he hau a tau tupe. Kua pihia ai ha ko e magaaho ne omaoma a koe ke he poakiaga ia, ko e mena fakamua hau ke fakafiafia a Iehova, mo e fakaohooho he hau a fakaalofa ki a ia e puhala ne fakaaoga e koe hau a tupe. Ha kua pihia, to nakai lali a koe ke fakaata e tau manako fakatagata ke fakatauhele aki e foaki mo e solu katoa ke he Atua. (Mataio 16:24-26) To fakamakamaka ai a koe ke tumau ke taute e onoonoaga hau ke “mitaki,” ko e kakano, ke onoono fakatonu atu ke he Kautu he Atua mo e ke taute hana a finagalo. (Mataio 6:22-24) To hokotia atu a koe ke kitia e tomatomaaga faka-Atua ke “fakalilifu atu a koe kia Iehova mo e hau a tau koloa” ko e kotofaaga olioli.—Tau Fakatai 3:9.
Tau Fuata kua Lata ke Fifitaki
19. Kua maeke fefe e tau fuata he vaha kua mole ke manatu ha lautolu a Tufuga?
19 Kua fiafia ai, ko e tokologa he tau fuata, he vaha ia mo e he mogonei, kua manatu ha lautolu a Tufuga. Ko e tama tote ko Samuela kua tu mauokafua ke he fekafekauaga he faituga utafano pete ni ko e tau fakaohoohoaga fakalialia ha lautolu ne fekafekau fakalataha mo ia. (1 Samuela 2:12-26) Ko e fifine mua e fakaohooho, ko e hoana ha Potifara, kua nakai fakai ke futia e fuata ko Iosefa ke taute e mahani feuaki. (Kenese 39:1-12) Pete ni ko e “tama tote,” ne fakamatala fakamalolo a Ieremia ki mua he totokoaga kelea lahi. (Ieremia 1:6-8) Ko e tama fifine Isaraela tote ne fakatonu fakamalolo ke he takitaki kau a Suria ke kumi e lagomatai i Isaraela, ko e kavi ke fakaako a ia hagaao ki a Iehova. (2 Tau Patuiki 5:1-4) Ko e fuata ko Tanielu mo e hana a tau kapitiga kua taofi mau ha lautolu a tua he magaaho ne kamatamata ai ke he tau matafakatufono he Atua ke he tau mena kai. Ti kua fifili e tau fuata ko Sataraka, Mesako, mo Apeteniko ke tolo ke he gutuumu puhopuho ka e nakai fakahui ha lautolu a mahani fakamoli ke he Atua he tapuaki ke he tupua auro.—Tanielu 1:8, 17; 3:16-18; Esoto 20:5.
20. Maeke fefe e tokologa he tau fuata ke manatu ha lautolu a Tufuga he vaha nei?
20 He vaha nei kua molea e 2,000 he tau fuata ne 19 ke he 25 e tau tau he momoui kua fekafekau he tau matapatu fale he lalolagi he Tau Fakamoli a Iehova i New York State, T.F.K. Ko e fuifui tote a lautolu he tau hogofulu he tau afe he tau fuata ne manatu ha lautolu a Tufuga he lalolagi katoa. Tuga a Iosefa he vaha ia, ne nakai mahalo a lautolu ke fakahui ha lautolu a mahani mea. Tokologa ne omaoma ke he Atua ka e nakai ke he tagata he magaaho ne fakaohooho a lautolu ke fifili ko hai ka fekafekau a lautolu ki ai. (Gahua 5:29) I Polani he 1946, ne lahi e fakamatematekelea ki a Henryka Zur ne 15 e tau he moui he magaaho ne nakai mahalo a ia ke taute e tapuaki tupua fakalotu. “Manamanatu ke he ha mena ni ne manako a koe ki ai,” he talahau he taha tagata ne fakamatematekelea a ia, “ka e fakakite e fakamailoga satauro he lotu Katolika.” Ha kua nakai mahalo a ia, kua toho a ia ke he vaouhi mo e fana, ko e hana a amaamanakiaga mauokafua he moui tukulagi kua maunivaniva!b
21. Ko e heigoa e uiina ne kua pulotu ke talia, mo e ko e heigoa e mena ka tupu?
21 Kua fakamafanatia ha he tau fuata e loto ha Iehova, ko lautolu ne manatu a ia mai he tau senetenari! To tali nakai e koe hana a uiina, ‘Hanai, kia manatu e koe a ia ne Tufuga a koe’? Moli kua lata a ia ke manatu e koe! Manamanatu ke he tau aho takitaha ke he tau mena oti ne taute e ia ma hau mo e to taute atu foki, mo e talia hana a uiina: “Haku tama na e, kia iloilo ai a koe, ki a fiafia ai haku loto; kia fai kupu au ke tali age kia ia kua fakafiu mai kia au.”—Tau Fakatai 27:11.
[Tau Matahui Tala]
a The Watchtower, Tesemo 15, 1953, lau tohi 750.
b Kikite 1994 Yearbook of Jehovah’s Witnesses, tau lau tohi 217-18, lomi fakailoa he Watchtower Bible and Tract Society of New York, Inc.
Manatu Nakai e Koe?
◻ Maeke fefe ke lagomatai e tau fuata ke kitia e Atua ko e peresona moli?
◻ Ko e heigoa e kakano ke manatu hau a Tufuga?
◻ Ko e heigoa e kakano ne kua lata he ha tautolu a fakaakoaga ke taute?
◻ Ko e ha kua aoga ai ke leveki fakapulotu ha tautolu a tau tupe?
◻ Ko e tau fuata fe kua lata ia koe ke fifitaki?
[Fakatino he lau 27]
Kua manamanatu nakai a koe ko e ha ne fano a koe he aoga?
[Fakatino he lau 28]
Kua fakaako kia a koe ke leveki fakapulotu e tau tupe?