Fakalataha e Fakaakoaga mo e Kakano
“Kia fakaako atu ke he tagata tututonu ti tolomaki atu hana iloilo.”—TAU FAKATAI 9:9.
1. Ko e heigoa ne amaamanaki a Iehova ke he tau fekafekau hana hagaao ke he lotomatala?
KO IEHOVA “ko e Atua iloilo a ia.” (1 Samuela 2:3) Ne fakaako e ia hana tau fekafekau. Ne talahau tuai e Mose to eke e tau tagata ne momoui he magaaho ia ke pehe hagaao ki a Isaraela: “Ko e moli ni ko e motu iloilo, mo e pulotu e motu lahi na.” (Teutaronome 4:6) Kua lata e tau Kerisiano moli ke lotomatala pihia he loga e tau mena ne iloa. Kua lata a lautolu ke eke mo tau tama aoga he Kupu he Atua. Kua fakakite mai he aposetolo ko Paulo e kakano he tau kumikumi pihia, he tohia mai: “Nakai okioki ai a maua he liogi ma mutolu, tali mai he aho ne fanogonogo atu a maua ki ai, kua ole atu foki kua puke a mutolu ke he maama mitaki ke he hana finagalo, ke he pulotu oti katoa mo e loto matala kua fakalata ke he Agaga. Kia mahani a mutolu ke lata mo e Iki, kia fiafia mai a ia kia mutolu ke he tau mena oti; kia fua mai ai a mutolu ke he tau gahua mitaki oti, kia tupu foki ha mutolu a maama mitaki ke he Atua.”—Kolose 1:9, 10.
2. (a) Ko e heigoa kua lata lahi ke maeke ai ke moua e lotomatala hako he Atua? (e) Ne lagomatai fefe he Kau Fakatufono he Tau Fakamoli a Iehova e mena nei?
2 Ka kumikumi ke moua e lotomatala hako he Atua mo e kakano he finagalo hana kua lata ni ke fai fakaakoaga pete ni ko e mena tote. Ka kua tokologa e tau tagata kua o mai ke ako e kupu moli he Kupu he Atua ne nonofo he tau motu kua tote po ke nakai fai amaamanakiaga ke moua e fakaakoaga tonu mitaki fakalalolagi. Ti kua ha ha a lautolu he tuaga nakai mitaki. Ke kautu mai he mena vihi nei, kua loga e tau tau ne fakatonutonu mai he Kau Fakatufono he Tau Fakamoli a Iehova, ke he tau matakavi kua lata, kua lata ni ke fakatokatoka e tau vahega i loto he tau fakapotopotoaga. He 30 e tau tau kua mole, ne tohia he tohitala Pasili ko e Diário de Mogi e tala ne mataulu “Ko e Taulatau Fetoko he Tau Fakamoli a Iehova ke he Nakai Iloa ke Totou mo e Tohitohi.” Ne talahau: “Ne taute ai e faiaoga ne lata . . . ke fakaako fakaeneene e falu ke totou mo e tohitohi. . . . Ko lautolu ne ako, ha ko e tau fekafekau he Atua kua fakaohooho ai he tutuaga ia a lautolu, kua lata ai a lautolu ke fakalaulahi e lotomatala ke he vagahau ke maeke ke taute e tau lauga.” Ne afe e tau tagata he lalolagi katoa ne kua maeke ke eke mo tau tagata ako mitaki ke he Kupu he Atua. Ne taute e lautolu e matapatu fakaakoaga nei mo e kakano tokoluga ke he tau loto.
Tau Iloilo kua Lata ke Eke mo Tau Fekafekau Lauia Mitaki
3, 4. (a) Ko e ha ne fiafia e tau Kerisiano moli ke he fakaakoaga? (e) Kua fefe e tutuaga i Isaraela, mo e ko e heigoa e matapatu fakaakoaga ne aoga lahi i loto he tau fakapotopotoaga ha tautolu he vaha nei?
3 Ne fiafia e tau Kerisiano moli ke he fakaakoaga, nakai mana ni ka e ke maeke ke eke mo tau fekafekau kua taute mena lauia mitaki ha Iehova. Ne age e Keriso ke he tau Kerisiano oti kana e poakiaga ke “eke e tau motu oti kana mo tutaki, . . . Ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20) Ke maeke ke fakaako atu ke he falu, kua lata a lautolu ke ako fakamua, mo e kua lata ni e mena nei ke fai puhala kumikumiaga fakamitaki. Kua lata a lautolu ke ha ha ia lautolu e iloilo ke kumikumi fakamitaki lahi ke he tau Tohiaga Tapu. (Gahua 17:11) Ke fakamoli e feua pauaki ha lautolu, kua lata foki a lautolu ke maeke ke holo mitaki e puhala totou.—Kikite Hapakuka 2:2; 1 Timoteo 4:13.
4 Ke tuga he kitia e tautolu ke he tala fakamua, kua mitaki ke tua ko e mahani lahi, ti iloa foki e tau fanau ikiiki i Isaraela i tuai ke totou mo e tohitohi. (Fakafili 8:14; Isaia 10:19) Kua lata e tau fekafekau Kerisiano he vaha nei ke taute fakamea e tau fakamau vala tala he o a lautolu he gahua fakamoli ke he taha fale mo e taha fale. Ne tohi e lautolu e tau tohi, fakamau hifo e tau vala tala he tau feleveiaaga, mo e tau fakamaamaaga kuku i loto he tau mena kumikumi ha lautolu. Kua lata oti e tau mena nei ke maeke ke maama ke totou e matalima tohi. Ti kua ui mai e fakamauaga mena i loto he fakapotopotoaga Kerisiano ke lata ke fai lotomatala ke taute mo e iloa e tau numela mukamuka.
Tau Tuaga Mitaki he Fakaakoaga Hako
5. (a) Ko e heigoa e kamataaga he kupu “aoga”? (e) Ko e tau magaaho fefe kua lata e tau fuata ke kuku mau?
5 Kua fulufuluola lahi, ko e kupu “aoga” ne moua mai he kupu Heleni skho·leʹ, ko e mena ne fakakakano fakamua ko e “okioki” po ke ke fakaaoga e tau magaaho fakafiafia ma e falu he tau gahua moli, ke tuga e akoaga mena. Ti hoko atu fakamui ke fakahigoa ko e mena ne taute e tau akoaga mena pihia. Ti kua fakakite mai he mena nei, ko e he taha vaha, ko e vahega monuina ni hokoia—i Heleni mo e loga he falu motu—ne fai magaaho fakafiafia ke ako mena. Ne mahani e vahega tagata gahua lima ke nakai iloa mena tumau. He vaha nei, kua loga e motu ne age ke he tau fanau mo e tau tagata fuata e tau magaaho ke ako mena. Ti kua lata moli e tau fuata he Tau Fakamoli ke fakatoka e tau magaaho ne moua ke maeke ke lotomatala lahi mo e eke mo tau fekafekau iloilo a Iehova.—Efeso 5:15, 16.
6, 7. (a) Ko e heigoa falu tutuaga mitaki ha ko e fai fakaakoaga hako? (e) Ke he tau puhala fe kua maeke ai ke aoga lahi e akoaga ke he taha vagahau he motu kehe? (i) Ko e heigoa e tau tutuaga he vahaloto he tau tagata fuata he vaha nei ka katoatoa ha lautolu a o aoga?
6 Ko e matapatu lotomatala ke he fakamauaga tuai, tau mena he tau matakavi he lalolagi, saiene, mo e falu mena pihia ka lagomatai aki e tau fuata he Tau Fakamoli ke eke mo tau fekafekau lagotatai. Nakai ni fakaako he fakaakoaga ha lautolu ki a lautolu e tau mena loga ka e ke fakagahua foki e puhala akoaga mena. Moli kua nakai oti e akoaga mena he tau Kerisiano mo e kumikumiaga ka oti a lautolu mo e tau aoga. Ka e pete ni ia, kua falanaki lahi mahaki e tau mena ka moua e lautolu mai he tau kumikumiaga, ke he mena ko e iloa fefe a lautolu ke kumikumi. Kua maeke e fakaakoaga fakalalolagi mo e he fakapotopotoaga ke lagomatai ke tolomaki atu ha lautolu a iloilo ke manamanatu. (Fakatai 5:1, 2) Ka totou a lautolu to maeke a lautolu ke iloa ko e heigoa kua aoga lahi, ko e heigoa kua lata lahi ke mailoga mo e ako manatu.
7 Ke tuga a nei, ka ako e taha vagahau he motu kehe to nakai ni fakalaulahi hokoia e loto iloilo he tau tagata fuata ka e taute foki a lautolu ke aoga lahi ke he fakatokatokaaga a Iehova. I loto he falu he tau la he Kaufakalatahaaga he Kolo Toko, kua moua ai he falu he tau matakainaga tane fuata ko e tutuaga mitaki ke maeke ke vagahau po ke totou fakatotoka mitaki e vagahau Peritania. Ke lafi ki ai, kua lata e tau fekafekau Kerisiano oti kana ke lali fakalahi ke mavete mitaki e puhala vagahau he vagahau ne fanau mai a lautolu ki ai. Kua lata lahi e tala mitaki he Kautu ke mahino mitaki e puhala ka talahau ai ke he puhala kua lata mo e hako ke vagahau ai. Kua fakakite mai he tau mena moli i loto he lalolagi he vaha nei kua tokologa e tau fuata ne oti mo e tau aoga kua uka agaia ke tohitohi mo e vagahau fakahako mo e taute pihia foki ke he tau mena numela mukamuka lahi; mo e iloa tote ni e fakamauaga tuai mo e tau mena he tau matakavi he lalolagi.
Fakaakoaga kua Lata Tonu
8. Ko e tau tohiaga tapu fe ne lauia ai e tala he fakaakoaga fakalalolagi mo e iloilo he taha ke fua ne ia hana tau mena?
8 Ha kua tuga ko e pihia e mena nei, ko e magaaho na nei kua lata tonu ke manamanatu ke he aga he Kerisiano ke he fakaakoaga fakalalolagi. Ko e heigoa e tau puhala he Tohi Tapu kua lago ke he mena nei? Ke fakamua aki, i loto he tau motu loga ha ko e fakalilifu hako ki a “Kaisara” kua lata e tau mamatua Kerisiano ke fakafano ha lautolu a fanau ke he tau aoga. (Mareko 12:17; Tito 3:1) Ka e ke he Tau Fakamoli fuata, ke he ha lautolu a tau gahua aoga kua lata a lautolu ke manatu e mena ne talahau ia Kolose 3:23 (NW): “Ko e ha mena he tau mena oti ha mutolu kua taute, kia taute ai mo e solu katoa ke tuga ki a Iehova, mo e nakai ke he tau tagata.” Ko e poakiaga ke uaaki ne putoia ai ko e mena kua lata e tau Kerisiano ke maeke ke hahamo ne lautolu ha lautolu a kavega, ti pihia foki kaeke ko e tau fekafekau foafoa mau a lautolu. (2 Tesalonia 3:10-12) Kaeke kua faihoana e taha, kua lata e tagata tane ke maeke ke fua fakamitaki e levekiaga he hana hoana mo e ke he ha fanau ne fanau mai, mo e fai mena foki ke age ki a lautolu kua lata mo e ke lagomatai e gahua fakamatala ke he matakavi mo e ke he lalolagi katoa.—Efeso 4:28; 1 Timoteo 5:8.
9, 10. (a) Ko e heigoa e hagahaga mena i loto he tau motu loga? (e) Ke he heigoa kua liga manamanatu e fekafekau foafoa ko e totogi kua lata tonu?
9 Kua lata ke fefe e lahi he fakaakoaga he Kerisiano fuata ke maeke ke fakalilifu ke he tau mahani nai he Tohi Tapu mo e fakafeleveia hana tau matagahua Kerisiano? Ne kehekehe e mena nei mai he taha motu ke he taha motu. Ka e pete ia, kua tuga kua mahani lahi e tau motu loga ke tokoluga e fakaakoaga kua lata ma e tau gahua kua mitaki e tau totogi mai he tau tau kua mole. Kua fakakite mai he tau hokotaki he tau la he Kaufakalatahaaga he Kolo Toko he tau fahi kehekehe he lalolagi kua loga e tau matakavi kua uka ke moua e gahua ne mitaki e tau totogi ka pehe kua taute ni e fakaakoaga tote ne manako e matafakatufono ki ai po ke i loto he falu motu pete ni foki he oti e tau aoga lotoga po ke aoga tokoluga.
10 Ko e heigoa e kakano he mena ne pehe ko e “tau totogi mitaki”? Kua nakai fakakite mai ko e tau gahua kua lahi e tau totogi. Ne fakakakano mai he Webster’s Dictionary e “mitaki” i loto he tala nei tuga ko e “lata tonu, lata mo e manako.” Ti ko e heigoa mogoia ne fakahigoa ko e “lata tonu,” ke fakatai ki ai, ma lautolu kua manako ke eke mo tau fekafekau foafoa he tala mitaki? Kua famahani a lautolu ia ke lata ke gahua vala magaaho ke nakai “fakamamafa” e tau matakainaga ha lautolu po ke ha lautolu a tau magafaoa. (1 Tesalonia 2:9) Kua liga pehe ko e “lata tonu” ha lautolu a tau totogi, po ke “lata mo e manako,” kaeke kua fakaata he tau mena ne moua e lautolu ke tutu mitaki e moui mo e toka foki a lautolu ke fai magaaho ata mo e malolo ke fakakatoatoa ha lautolu a fekafekauaga Kerisiano.
11. Ko e ha ne tiaki he falu fuata e fekafekauaga foafoa, mo e ko e heigoa e tau huhu ne malagaki hake?
11 Ne famahani mau ke fefe e tau tutuaga he vaha nei? Ne fa hokotaki mai ko e i loto he falu motu kua tokologa e tau fuata tote ne mitaki e manako ke toka hifo e tau aoga he oti e fakaakoaga tote kua lata ke maeke ai ke eke mo tau tagata gahua foafoa. Kua nakai fai gahua pauaki po ke tau tohi kua lata fakalalolagi. Kaeke kua nakai lagomatai he tau mamatua ha lautolu a lautolu, kua lata ni a lautolu ke moua e tau gahua vala magaaho. Kua eke e falu ke talia e tau gahua ne maeke ke fakafeleveia e tau mena he moui. Ti kua eke ai ke mategugu e tau tino, ati tiaki ai e lautolu e fekafekauaga foafoa. He mogoia ko e heigoa kua maeke a lautolu ke taute ke fua ne lautolu ha lautolu a tau manako tupe mo e eke ai ke liliu ke he fekafekau foafoa?
Ko e Onoonoaga Lagotatai ke he Fakaakoaga
12. (a) Ke hagaao ke he fakaakoaga, ko e heigoa e tau onoonoaga ua ne kua kehe lahi mahaki kua lata mai e Kerisiano ke kalo kehe mai? (e) Ke he tau fekafekau tukulele a Iehova mo e ha lautolu a tau fanau, ko e heigoa e kakano ne aoga ai e fakaakoaga?
12 Kua maeke e onoonoaga lagotatai ke he fakaakoaga ke lagomatai. Ko e fakakiteaga tu tokoluga e fakaakoaga ke he tau tagata fuata tokologa he lalolagi, ko e mena ke lagomatai a lautolu ke toli hake he papahi he kaufakalatahaaga, ko e kei ke he monuina lahi, he puhala he moui muhukoloa. Ka e ke he falu, ko e gahua uka e fakaakoaga ko e mena kua lata ke oti fakaave. Kua nakai lata ha onoonoaga nei ma e tau Kerisiano moli. Ti ko e heigoa mogoia, kua liga fakahigoa ko e “onoonoaga lagotatai”? Ti kua lata e tau Kerisiano ke onoono ke he fakaakoaga ko e puhala ke moua e fakahikuaga aoga. He tau aho fakahiku nei, ko e kakano ni ha lautolu ke lagomatai ke fekafekau atu ki a Iehova ke he tau mena kua maeke lahi mo e fakamitaki. Kaeke, ke he tau motu ne nonofo ai a lautolu, kua lagomatai ni he fakaakoaga tote po ke he aoga tokoluga a lautolu ke moua e tau gahua kua nakai katoa lahi e tau tupe ke fua ne lautolu ha lautolu a gahua foafoa, ti kua liga kua lata ke manamanatu ke he falu fakaakoaga po ke taha fakamahani gahua. Kia taute fakalataha ni e mena nei mo e foliaga pauaki ke he fekafekauaga mau.
13. (a) Ne maeke fefe e taha matakainaga fifine i Filipaina ke fakatumau hana fekafekauaga foafoa ka e he magaaho taha kua fakafeleveia hana tau matagahua fakamagafaoa? (e) Ko e hatakiaga fe kua hako tonu mo e magaaho?
13 Kua uta he falu a fakaholoaga fakamahani gahua kua hafagi hake ke moua e tau gahua kua maeke a lautolu ke taute po ke liliu ke he fekafekauaga mau. Taha e matakainaga fifine i Filipaina ko e tagata gahua kua fua e magafaoa, ka e manako a ia ke gahua foafoa. Ne hokotaki mai e la ofisa: “Kua maeke a ia ke taute e mena nei ha kua taute e ia e falu fakaakoaga ke lata ke eke mo tagata fai tohi ke he feua fakamauaga tupe ke he matafakatufono he motu.” Ne talahau he hokotaki he la ofisa taha ia: “Kua ha ha i ai ia mautolu e numela lahi ne kua taute fakaakoaga ka e he magaaho taha kua maeke ke fakatokatoka ha lautolu a fakaholoaga ke he gahua foafoa. Kua famahani a lautolu ke eke mo tau tagata fakailoa mua atu ha kua makutu lahi a lautolu, kaeke kua nakai eke a lautolu ke mua atu e manako lahi ke he tau tutuliaga he lalolagi.” Kua lata e tau kupu fakahiku ia ke foaki mai ki a tautolu e kakano ke manamanatu. Kua nakai lata ke nimo e kakano he falu fakaakoaga, ke he tau mena kua lata, po ke liliu ke he foliaga manako muhukoloa lahi.
14, 15. (a) Ko e ha kua nakai lata ke taute e tau poakiaga mao kua hagaao ke he fakaakoaga? (e) Ko e tau fakaakoaga fakalalolagi fefe ne moua he falu momotua gahua fakamitaki, ka ko e heigoa ne lagomatai ke he mena nei?
14 I loto he tau motu gahoa, ne foaki he tau aoga lotoga e tau fakamahaniaga gahua kua maeke ke tauteute e fuata Kerisiano ma e falu gahua tufuga po ke taha feua mai he magaaho kua oti mo e aoga. Pete ni ka nakai pihia e tuaga, ko e tau fuata makaukau he falu motu ne maeke ni hokoia ke moua e matapatu fakaakoaga tote, ka kua maeke a lautolu ke moua e tau gahua vala magaaho kua maeke ai a lautolu ke fai tupe kua lata ke gahua foafoa. Ti kua nakai lata ke taute ha poakiaga mao ke taute pihia po ke fetoko ke he falu fakaakoaga.
15 Kua tokologa a lautolu ne fekafekau he magaaho nei i loto he tau tutuaga matagahua tuga e tau leveki faifano, mo e he matapatu kaina he Kaufakalatahaaga, po ke i loto he taha he tau la ne moua ni hokoia e matapatu fakaakoaga tote. Ko e tau tagata foafoa fakamoli a lautolu, kua nakai oti e akoaga, ne moua e tau fakamahaniaga gahua, mo e kua age ki a lautolu e tau matagahua lahi mahaki. Ne nakai tokihala a lautolu. Ka e ke he taha fahi, ne fifili he atuhau ha lautolu ke o ke he tau fakaakoaga he tau aoga tokoluga lahi atu mo e kua veveli, ha kua fakalolelole he tau fakaakoaga fakataitai mo e “iloilo he lalolagi” ne kua moumou e tua.—1 Korinito 1:19-21; 3:19, 20; Kolose 2:8.
Totou e Totogi
16. (a) Ko hai ka fifili ko e mitaki ke fakalaulahi atu e fakaakoaga, mo e ko e heigoa kua lata ke toka lahi he loto? (e) Ko e heigoa kua lata ke manamanatu ki ai?
16 Ko hai ka fifili kua lata po ke nakai e Kerisiano fuata ke fakalaulahi e fakaakoaga po ke fakamahaniaga gahua? Kua hoko mai e mahani he Tohi Tapu ke he tuaga he ulu ke he mena nei. (1 Korinito 11:3; Efeso 6:1) Ke he matapatu mena nei to manako moli nakai e tau mamatua ke takitaki ha lautolu a tau fanau ke fifili e taha gahua tufuga po ke feua mo e lafi ki ai ke he katoatoaaga he fakaakoaga kua lata ne taute. I loto he tau motu loga kua lata ni ke taute he vaha fakamua he tau tau he fakaakoaga he aoga lotoga e tau fifiliaga ke he fakaakoaga mo e tau feua. Ti ko e magaaho naia kua lata e tau mamatua Kerisiano mo e tau fuata ke kumi e tau takitakiaga a Iehova ka taute e tau fifiliaga pulotu, mo e mua atu ke fakalataha e tau mena he Kautu ke he tau loto. Ne kehekehe e tau manamanatu mo e iloilo he tau tagata fuata. Kua pulotu ni ke manamanatu e tau mamatua ke he tau mena ia. Ne lilifu oti e tau gahua fakamoli, ko e kola tapulu lanu moana po ke kola tapulu tea. Kaeke kua fakatokoluga he lalolagi e gahua ofisa mo e fakatokolalo e gahua mo e tau lima, kua nakai taute pihia he Tohi Tapu. (Gahua 18:3) Ti ko e magaaho ka mole atu he manamanatu fakaeneene mo e liogi e tau mamatua mo e tau Kerisiano fuata he vaha nei, ke he tau tutuaga mitaki mo e kelea, kua nakai lata e falu he fakapotopotoaga ke ekefakakelea a lautolu.
17. Ko e heigoa e falu fifiliaga ne taute he tau mamatua Fakamoli ma e tau fanau ha lautolu?
17 Kaeke kua fifili e tau mamatua Kerisiano ke toka e tau fanau ha lautolu ke fakalaulahi atu e fakaakoaga ka mole atu e aoga tokoluga, ko e mena ha lautolu a ia. To kehekehe e loa he tau kumikumiaga nei ke lata ke he vahega gahua tufuga po ke feua ne fifili. Ha ko e tau tutuaga fakatupe mo e ke lagomatai ha lautolu a tau fanau ke maeke ke hoko atu ke he fekafekauaga mau ke he puhala mafiti, kua tokologa e tau mamatua Kerisiano ne fifili ma lautolu e tau fakaholoaga kumikumiaga fakakuku he tau aoga fakaako gahua po ke tau aoga ako gahua pauaki. He falu mena tutupu kua lata e falu fuata ke aperenetisi ke he taha gahua tufuga, ka kua taute mau pihia mo e foli ke he moui kua fekafekau mau ki a Iehova.
18. Kaeke kua uta e falu he tau fakaholoaga fakaako, ko e heigoa kua lata ke toka loto?
18 Kaeke kua uta e falu fakaholoaga kumikumi, kua lata ke nakai ha ko e loto ke kikila ha ko e tagata fakaako tokoluga po ke he lali ke moua e feua matalahi fakalalolagi. Kua lata ke fifili fakamitaki e tau fakaakoaga. Ne pehi lahi he mekasini nei e tu hagahaga kelea he akoaga tokoluga atu, mo e kua tonu foki, ha ko e mena totoko e fakaakoaga tokoluga atu lahi ke he “kupu fakaako kua tonu” he Tohi Tapu. (Tito 2:1; 1 Timoteo 6:20, 21) Ke lafi ki ai, tali mai he tau 1960, kua tokologa e tau aoga kua mua atu e akoaga kua eke mo tau fagaiaga velagia ke he mahani holifono mo e mahani kelea. Ne pehi lahi he “tupa fakamoli mo e lotomatala” ke nakai huhu atu ke he tau tutuaga pihia. (Mataio 24:12, 45, NW) Ka e pete ni ia, kua lata ke talahau, kua feleveia e tau fanau he tau aho nei mo e tau mena hagahaga kelea taha nei i loto he tau aoga tokoluga mo e tau koliti ako feua pauaki mo e pihia foki ke he gahuaaga.—1 Ioane 5:19.a
19. (a) Ko e heigoa e tau puipuiaga kua lata ke taute e lautolu kua fifili ke uta e falu fakaholoaga fakaako? (e) Ne fakaaoga fefe he falu ha lautolu a tau fakaakoaga ke tutu mitaki?
19 Kaeke kua fifili kua lata ke fai fakaakoaga lahi foki, mo e kaeke kua maeke, kua lata ni e fuata Fakamoli ke taute e mena ia ka e nofo agaia i kaina, ti kua maeke ai ke fakatumau e tau aga kumikumiaga he Kerisiano, ke fakalataha atu ke he tau feleveiaaga, mo e tau gahua fakamatala. Mai he kamataaga kua lata foki ke taute e tuaga ke he tau mahani he Tohi Tapu. Kua lata ke manatu a Tanielu mo e tau hoa Heperu tokotolu hana ko e tau pagota fakapaea he magaaho ne ui atu ki a lautolu ke taute e tau kumikumiaga lahi atu i Papelonia, ka e taofi tumau e lautolu ha lautolu a fakamoliaga. (Tanielu, veveheaga 1) He tuku fakamua e tau mena fakaagaga, kua taute he Tau Fakamoli fuata i loto he tau motu e tau fakaholoaga fakaako ke tauteute a lautolu ma e tau gahua vala magaaho tuga e tau tagata fakamauaga tupe, tau tagata gahua tufuga, tau faiaoga, tau tagata liliu, tau tagata fakahokohoko kupu po ke ke he falu gahua ne lagomatai a lautolu ti kua lata e tupe ma e ha lautolu a feua fakamua he tagata foafoa. (Mataio 6:33) Ne ha ha i ai e numela he tau fuata nei ne kua eke mo tau leveki faifano po ke tau tagata ne foaki ne lautolu a lautolu ke gahua he tau Peteli.
Ko e Tau Tagata Fakaako, mo e Fefakalatahaaki
20. Ko e heigoa e tau kehekeheaga fakalalolagi kua nakai fai tuaga i loto he tau tagata a Iehova?
20 He vahaloto he tau tagata a Iehova, kaeke ko e gahua kola tapulu tea e tagata, kola tapulu lanu moana, gahua fonua, po ke fekafekau ke he falu, kua lata a lautolu oti ke eke mo tau tama aoga mitaki he Tohi Tapu mo e maeke ke eke mo tau faiaoga makaukau. Kua eke ni e iloilo ne moua he totou mena, kumikumiaga, mo e he fakaako atu ke uta kehe e fakakeheaga ne taute he lalolagi ke he vahaloto he tau tagata gahua mo e tau lima mo e gahua ofisa. Kua taute ai he mena nei ke fua mai e fefakalatahaaki mo e fefakalilifuaki e taha ke he taha ne kua kitia lahi he vahaloto he tau tagata gahua ne foaki ne lautolu a lautolu ke gahua i loto he tau kaina Peteli mo e he tau tanakiaga ta fale he Kaufakalatahaaga he Kolo Toko, ko e mena kua aoga lahi mahaki e tau fua fakaagaga mo e kua lata ke ha ha ia lautolu oti kana. Hanai e tau tagata ne mahani lahi ke gahua ofisa, kua fakakite e tau loto fakaaue kua feofanaki.—Ioane 13:34, 35; Filipi 2:1-4.
21. Ko e heigoa kua lata e tau Kerisiano fuata ke foli ki ai?
21 Ko e tau mamatua, kia takitaki atu ha mutolu a tau fanau ke he foliaga kua maeke ke eke mo tau tagata kua aoga lahi ke he kaufakalatahaaga he lalolagi fou! Ko e tau Kerisiano fuata na e, kia fakaaoga ha mutolu a tau magaaho fakaakoaga ko e kakano ke tauteute aki a mutolu ke kuku mau katoatoa ha mutolu a tau monuina ke fekafekau atu ki a Iehova! Ha ko e tau tagata fakaako, kia eke a mautolu oti kana ko e tau tagata he kaufakalatahaaga pule fakaatua kua mau tauteute he magaaho nei mo e ke tukulagi tukumuitea, i loto he “lalolagi fou” ne mavehe e Atua ki ai.—2 Peteru 3:13; Isaia 50:4; 54:13; 1 Korinito 2:13.
[Tau Matahui Tala]
a Kikite foki ke he Ko e Kolo Toko a Sepetema 1, 1975, tau lau tohi 542-4.
Kamatamata e Manatu Hau
◻ Ko e ha kua fiafia e tau Kerisiano moli ke he fakaakoaga?
◻ Ko e heigoa e tau onoonoaga kehe ue atu he fakaakoaga kua lata ke kalo kehe mai e tau Kerisiano moli?
◻ Ko e heigoa e tau mena hagahaga kelea he falu fakaakoaga kua lata ke manamanatu ki ai, mo e ko e heigoa e tau puipuiaga kua lata ke taute?
◻ Ko e heigoa e tau kehekeheaga fakalalolagi kua nakai fai tuaga he vahaloto he tau tagata a Iehova?
[Fakatino he lau 25]
He kumikumi fakamakutu, kua maeke e tau Kerisiano fuata ke eke mo tau tagata kua aoga lahi ke he kaufakalatahaaga he lalolagi fou
[Fakatino he lau 28]
Kaeke kua fifili, e falu fakaakoaga, kua lata ke fakaohooho mai he manako ke fekafekau fakamitaki ki a Iehova