Mataala ke he Tau Tagata Va!
He vaha nei, kua tupu lahi e tau talahauaga tuai, mo e tolomaki hake e pisinisi ke he vaha anoiha. “He tata lahi mai e tau 2000,” he kitia he The Daily Telegraph a London, “fai mena kehe ne iloa fakatote ki ai hane tupu. Kua totou afe e tau tagata he lalolagi katoa hane kitia e tau fakakiteaga kehe lahi mo e fa matakutaku ke he vaha anoiha.” Ko e tau onoonoaga nei he tokologa ke he vaha anoiha ko e liu fatiaki noa ni he tau hikihikiaga ne amanaki ki ai ka e nakai fakamoli.
HE TUPU TOLOMAKI e heke solofanua he senetenari ke 19 aki, taha e tagata tane ne talahau tuai to fakahiku e tau taone i Europa ke hakea he tau manua. Moli ni, kua nakai hako hana talahauaga tuai. Ti, he hagaao atu ke he puhala ne fa mahani e tau talahauaga tuai ke kaumahala, ne tohia he The Times a London: “Ko e vaha anoiha ko e tau manua he tau solofanua.”
Kua va he falu a lautolu ne fioia e hagahaga kelea i mua. Ke fakatai ki ai, taha e porofesa pisinisi he univesiti a U.S. ne paleko ki a lautolu ne hataki ke he moumouaga he takatakaiaga ke pulega ko e to au atu nakai e kelea he tuaga ia. He hokotaki he mekasini New Scientist, ne talahau e ia ko e “ha tautolu a mouiaga kua holo ki mua mo e to fakatumau ke taute pihia.”
Haia he tau fakagoagoa he tau talahauaga mo e tau talahauaga totoko, tokologa ne talitonu to tumau e tau mena oti nakai hikihiki. Kua va ai ke he ha manatu he fakalavelave faka-Atua ke he tau matagahua he tagata, kua fakakite ai e lautolu e aga tuga he tau tagata va he senetenari ke fakamua aki V.N.
Tatai Agaia Nakai e Tau Mena Oti?
Ko e tohi omoi he agaga ke ua aki he aposetolo Kerisiano ko Peteru, kua tohia he kavi 64 V.N., ne hataki mai: “To o mai ke he tau aho fakamui e tau tagata va, kua mahani fakalata ke he tau manako lahi ha lautolu.”—2 Peteru 3:3.
Kua lali e tau tagata va ke taute e mena ne va e lautolu ke tuga e tau mena feki. Ko e tagata ne mahala atu ke he va ka liga to ke he matahele fulukovi kakano kua manako e tagata va ke talia e lautolu ne fanogonogo hana kitiaaga. Hagahaga ni ke pehenei e falu he tau tagata va ne hataki a Peteru ki ai, “kua mahani fakalata ke he tau manako lahi ha lautolu.” He fakaalaala hana tau tagata totou, ne fakaaoga e Peteru e puhala malolo he fakamaamaaga. Ne hataki mai a ia hagaao ke he o maiaga he “tau tagata va.”
Ko e tau tagata va ia he senetenari ke fakamua aki ne huhu toko e lautolu e moli he “ha ha hinei tuga kua mavehe mai” he Keriso, he talahau: “Ko fe kia hana ha ha hinei tuga kua mavehe mai? Ka ko e tau aho tali mai he momohe e tau tupuna ha mautolu ke he mate, kua tumau agaia e tau mena oti ke tuga ne kua kamata mai he tufugatiaaga.” (2 Peteru 3:4, NW) Kua hagahaga pihia ki a lautolu. Ka e, he tau 33 V.N., ne talahau tuai e Iesu e matematekelea lahi ma e maaga ha Ierusalema. “Ko e mena hoko mai kia koe e na aho ia,” he fakailoa e ia, “ke keli takai ai kia koe e lautolu kua fai fi kia koe e luo ke pototakai mai ni e lautolu a koe, ke pāpā a koe ke he tau fahi oti. To fakatatai foki e lautolu a koe mo e kelekele katoa mo e tau fanau hau i loto ia koe; nakai toka foki e lautolu e taha maka ki luga he taha maka ki loto ia koe.” Kua hehe ha a lautolu ne va e hatakiaga ia! He 70 V.N., ne patakai he tau Roma a Ierusalema mo e moumou e maaga, mo e loga e tau momoui ne ha ha i ai ne mamate. Ko e ha e laulahi he tau tagata he maaga ne nakai mautali ke he matematekelea nei? Ha kua nakai mailoga e lautolu kua tivi he Atua a lautolu he puhala he hana Tama, ko Iesu.—Luka 19:43, 44.
Ne hagaao atu e aposetolo ko Peteru ke he fakalavelaveaga he Atua Mua Ue Atu, he vaha anoiha. “To hau e aho he Iki tuga ne kaiha ke he po,” he hataki e Paulo. (2 Peteru 3:10) He magaaho ia to uta kehe he Atua e tau tagata nakai mahani Atua mai he lalolagi katoa mo e toka a lautolu ne kua fakafili ke tututonu. Tuga kua fa mahani ke fakamaama mai he senolo nei, kua kamata e “ha ha hinei” ha Iesu Keriso he 1914. Ka ko e matagahua hana ko e Fakafili he Atua ke uta kehe e mahani kelea kua ha agaia anoiha. Ti ke fakalata ki ai, ko e hatakiaga he aposetolo ke mataala ke he tau tagata va kua hagaao lahi ke he mogonei.
Liga kua fita e leva tuai e leo hau ma e fakalavelaveaga faka-Atua ke he tau matagahua he tagata. Ko e heigoa ka lagomatai a koe ke fakatumau ke fakatali fakaeneene mo e nakai eke mo ola he tau tagata va? Kia fakamolemole totou atu.
[Blurb he lau 4]
‘Ko e mena hoko mai kia koe e na aho ia, ke pāpā he tau fi hau a koe ke he tau fahi oti, nakai toka foki e lautolu e taha maka ki luga he taha maka ki loto ia koe.’ Nakai ko e hatakiaga a ia ke va ki ai. Ne fakaotioti he tau kau Roma a Ierusalema mo e loga e tau momoui ne mamate.