Fakamatala e Tautolu e Tala Mitaki
1 Ko e kotofaaga homo ue atu ha a ia ne moua e tautolu ke eke mo tau tagata fua he “tala ke he tau mena mitaki.” (Roma 10:15) Ha ha ia tautolu e fekau fakahauhau ke talahau ke he tau tagata ne tu takai he tupetupe mo e fakaatukehe. Lagomatai fefe e tautolu a lautolu ke mailoga kua foaki e tautolu e “monuina, kua talahau mai e tala mitaki”?—Isa 52:7.
2 Tauteute e Fekau Mitaki: Ko e tau fakatutalaaga ha tautolu he fekafekauaga to ha ha i ai e lauiaaga atihake kaeke ke hagaaki a tautolu ke he tau mena mitaki. Ko e mena ia, ka tauteute e fakatutalaaga ha tautolu mo e liu fakamanatu e tohi ka foaki e tautolu, kua lata ia tautolu ke peehi e tau mena mitaki he fekau. He talahau e amaamanakiaga ha tautolu ne fakave ke he Tohi Tapu fakalataha mo e mauokafua mo e fakamakai, maeke ia tautolu ke amaamanaki ke he tau fua mitaki.—Fakatai 25:11.
3 Pete he fakaalofa a tautolu ka talahau he tau tagata e puhala ne kua lauia a lautolu he tau tutuaga kelea lahi he lalolagi, kua lata ia tautolu ke fakakite age ki a lautolu e tuluiaga moli ke he tau mena vihi he tagata, ko e Kautu he Atua. Pete foki he fakatutala e “aho [ha Iehova hane hau] ke lalago,” kua manako a tautolu ke fakakite e kakano moli nei he “vagahau mitaki kia lautolu kua matematekelea.” (Isa 61:1, 2) Maeke ia tautolu ke fakamafana e tau tagata fanogonogo ha tautolu ko e tau mena oti ne taute e Iehova to molioli ke ta mai e fiafia lahi mo e fua mitaki lahi.
4 Talahau e Kupu Moli mo e Olioli Moli: Ka kitia he tau tagata e mata fiafia mo e logona e leo mauokafua ha tautolu, kua mafiti a lautolu ke fanogonogo. Ka fakaata e tautolu e onoonoaga mitaki, to mailoga he tau tagata fanogonogo ha tautolu kua “fiafia [a tautolu] ke he amaamanaki.” (Roma 12:12) Liga hihiga lahi mogoia a lautolu ke talia e tala mitaki. Moli, ha ha ia tautolu e kakano mitaki ke fakatata tumau e aga mitaki mo e olioli he tau puhala oti he fekafekauaga ha tautolu.
5 Ko e tau fekafekau he tala mitaki, kua lahi atu e mena ka taute e tautolu he talahau noa. Kua foaki he fakamatala ha tautolu e amaamanaki moli he moui mitaki mogonei ti pihia ke he vaha anoiha. (1 Timo. 4:8) He feleveia a tautolu mo e tau tagata takitaha, ko e fakatokaaga mitaki he manamanatuaga ha tautolu to fakaata ke he mena ka talahau e tautolu mo e to lagomatai e tau tagata ke talia e tala mitaki. He mataala ke he mena ka talahau e tautolu mo e puhala ke talahau aki e tautolu, kia fakamafana e tautolu a lautolu nukua loto fakamoli ke talia e tala mitaki fulufuluola kua fakamatala e tautolu!