Fifitaki ha Tautolu a ‘Atua Fiafia’ ko Iehova
1 Kua manako mooli a Iehova ke fiafia e tau tagata. Ne fakapuke he Kupu haana a tautolu aki e amaamanakiaga ma e tau monuina ue atu ne tauteute e ia ma e tau tagata. (Isaia 65:21-25) Kua lata ke kitia he falu e olioli ha tautolu he folafola ‘e vagahau mitaki lilifu he Atua fiafia’ ki a lautolu. (1 Timo. 1:11) Kua lata he puhala ne talahau e tautolu e fekau he Kautu ke fakakite e ofania ha tautolu ke he kupu mooli mo e fiafia mooli ha tautolu ke he tau tagata ne tutala ki ai.—Roma 1:14-16.
2 Mooli ai, ke he falu magaaho kua eke mo paleko ke fakatumau e aga fiafia. He falu matakavi, kua gahoa e tagata ne talia fiafia ke he fekau he Kautu. Ha ha i ai falu aho ne fehagai a tautolu mo e tau tutuaga uka he tau momoui ni ha tautolu. Ke fakatumau e aga fiafia, kua lata ia tautolu ke manamanatu kua aoga lahi ma e tau tagata he fonua ke logona mo e maama e tala mitaki he Kautu ne fa e fakamatala e tautolu. (Roma 10:13, 14, 17) He manamanatu fakahokulo ke he mena nei ka lagomatai a tautolu ke fakatumau e fiafia he fakailoa e tau foakiaga fakaalofa noa a Iehova ma e fakamouiaga.
3 Hagaaki ke he Tau Mena Mitaki: Kua lata foki ia tautolu ke mailoga e tau mena ne talahau e tautolu. Pete he kamata e tutala ha tautolu aki e lekua po ke taha mena he nusi ne iloa he tau tagata, kua lata ia tautolu ke nakai hagaaki tumau ke he tau mena kelea. Ko e matagahua ha tautolu ke ta mai e “tala ke he tau mena mitaki.” (Isaia 52:7; Roma 10:15) Ko e tala mitaki nei ko e fekau ne fakavē ke he tau maveheaga he Atua ma e vahā anoiha kua homo atu. (2 Pete. 3:13) He tokaloto e mena nei, fakaaoga e tau Tohiaga Tapu ke “pipi e tau loto ne malipilipi.” (Isaia 61:1, 2) To lagomatai he mena nei a tautolu takitokotaha ke fakatumau e aga fiafia mo e aga mitaki.
4 To nakai noa mo e mailoga he tau tagata e aga fiafia ha tautolu he taute e gahua fakamatala. Ko e mena ia, kia fakakite tumau e tautolu e tuaga he ‘Atua fiafia,’ ko Iehova, he fakapuloa e tautolu e tala mitaki he Kautu ke he tau tagata he fonua ha tautolu.