Kia Fakalilifu Oti e Tautolu a Iehova mo e Tama Hana
Puhala kua Aoga Lahi ki a Lautolu kua O Mai ke he Fakamanatuaga ia Aperila 8
1 Ko hai he vaha nei kua foaki ki ai e fakalilifu pauaki? Ko lautolu nukua kautu e tau gahua kua fakalilifu lahi he lalolagi. He laulahi, to nakai leva ti nimo e tau gahua ha lautolu. Ka e kua e tau gahua kua aoga moli ke he tau tagata oti? Ko e mua ue atu he tau mena nei ka moua e tautolu e onoonoaga makutu he fakamanatu e tautolu e Kaiaga Afiafi he Iki he mole e toaga la ia Aperila 8, 2001.
2 Ko hai kua lata mo e fakalilifu tokoluganea? Kua tali he Tohi Tapu: “Ko e Iki na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti.” (Fakakite. 4:11) Ko e Tufuga, ko Iehova e Pule Katoatoa he lalolagi mo e lagi katoatoa. To nakai fai fakaotiaga e fakalilifu ki a ia!—1 Timo. 1:17.
3 Ko e Tama he Atua, ko Iesu Keriso, ne taute e tau gahua lilifu ka ta mai e tau monuina nakai fai fakaotiaga ke he tau tagata. Ne fakafifitaki katoatoa e ia hana Matua. (Ioane 5:19) Ko e omaoma mauokafua mo e fekafekauaga makutu hana kua taute a ia ke “tuku atu ki ai e pule, mo e koloa, mo e iloilo, mo e malolo, mo e fakahekeaga, mo e fakamonu.” (Fakakite. 5:12) Ne fakalilifu he Matua hana a ia he fakauku a ia mo Patuiki. (Sala. 2:6-8) Ma tautolu, to moua e tautolu e magaaho ke fakalilifu tokoua e Matua mo e Tama he fakamanatu e tautolu e Kaiaga Afiafi he Iki ia Aperila 8, 2001.
4 Momoko ai ke talahau, kua tokogahoa ni he fakamauaga tala tuai ne foaki ki a Iehova mo e hana Tama e fakalilifu kua lata. Ke he tau magaaho, kua foaki foki he tau tagata Isaraela i tuai he Atua e fekafekauaga fakatehana ki a Iehova. Ko e mahani nakai fakalilifu maaliali anei. (Mala. 1:6) Kua latatonu e fakalilifu mitaki ma e omaoma fakamoli ne fakave ke he fakaalofa mo e loto fakaaue ke he tau mena oti ne taute e Iehova mo e hana Tama ma tautolu. Ko e foaki e fakalilifu pihia kua kakano ke fakakite e tautolu e matakutaku mahani Atua mo e lilifu, he mailoga a Iehova mo Iesu he tau puhala oti ha tautolu. Kua fakamakai e fakapotopotoaga Kerisiano ke fakaako mo e lagomatai e falu ke taute pihia.
5 Ko e Magaaho Uho ke Fakakite e Fakalilifu: Ko e fakalataha ke he Fakamanatuaga ko e fakapotopoto aoga ue atu he tau tagata ha Iehova he tau tau takitaha. Ko e tau tagata oti kua manako ke fekafekau mo e fakalilifu a Iehova kua lata ke fakalataha mai. (Luka 22:19) Kua mailoga e tautolu ko e lafi ke he 6 e miliona he Tau Fakamoli malolo, to fakamalikiti e lautolu kua fiafia he fakalataha mai ke molea e 14 e miliona. Ko e magaaho mitaki ha ia ke fakalilifu e Matua ha tautolu he lagi! He hagaaki e fakamanatuaga ki a Iesu, kua fakakite he fakalilifu e mena kua fakakatoatoa e ia he fakatokoluga aki e Matua, ne fakafano mai a ia.—Ioane 5:23.
6 Ko e heigoa ka taute e tautolu ke lalago aki e magaaho uho nei? Maeke ia tautolu ke lagomatai a lautolu ne fiafia fou ke aoga katoatoa ai. Fakamafana a lautolu ke fakalataha mai, ka lata, foaki e lagomataiaga totonu ke lagomatai a lautolu ke hohoko mai. Fakamaama e kakano he fakatutalaaga. Fakafeleveia a lautolu ke he falu. Ko e mena ke kitia mo e logona e lautolu ka omoi a lautolu ke kumi ke fakalataha mo tautolu he fakalilifu ki a Iehova.
7 Ua fakateaga e malolo he fakaholoaga. Tali pihia e tagata fano fakaako he univesiti: “Loga e magaaho ne fa fano au ke he Fakaaueaga he tapu haku, ka e kehe lahi e mena nei. Kitia e au ko e mena moli anei ne talahau he Tohi Tapu, ti manatu au kua moua e mutolu e kupu moli.” Ne kamata a ia ke fakalataha tumau ke he tau feleveiaaga mo e nakai leva ti papatiso.
8 Lagomatai a Lautolu kua Fou ke Tupu ki Mua: Mailoga a lautolu ne fou kua o mai ke he Fakamanatuaga, mo e ahi atu mafiti a lautolu ke liu fakamanatu e tau mena fakahauhau kua ako mo e kitia e lautolu. Tala age ki a lautolu falu feleveiaaga, ke maeke ia lautolu ke lafi ke he iloilo faka-Tohi Tapu ha lautolu. Ko e liu fakamanatu he veveheaga 17 he tohi Iloilo, “Moua e Haohao Mitaki ke he Tau Tagata he Atua,” ka fakakite ki a lautolu e vala lahi he tau mena kai fakaagaga kua foaki he fakapotopotoaga, nukua maeke ia lautolu ke moua. Fakatoka ma lautolu ke kitekite e vitio Our Whole Association of Brothers ke maeke ia lautolu ke kitia mata ni e lautolu e fakalatahaaga, olioli, mo e makutu he tau tagata ha Iehova!
9 Kua aoga ke iloa ni he tau tagata fiafia e puhala ke fakakite e lautolu e fakalilifu ki a Iehova. Fakamaama ko e liogi mai he loto kua fakafiafia a Iehova ti ko e punaaga tumau he hauhau fakaagaga. (1 Ioane 5:14) He fakaaoga e tau fakaakoaga 8 ke he 12 he porosua Manako, fakamaama e tau mahani ne fakalilifu a Iehova. He fakatutala ke he mena kua talahau he porosua Tau Fakamoli a Iehova, he lau 30-1, fakamalolo a lautolu kua fou ke manamanatu ke he puhala he fakalilifu a Iehova he taute foki e gahua fakamatala.
10 Ko e loto fakaaue ma e poa ha Iesu mo e kotofaaga ha tautolu ke fekafekau mo tau tutaki hana kua fakalilifu e Matua mo e ta mai e tau monuina ke he falu. Ne mavehe e Iesu: “Ka fekafekau mai foki taha kia au, ti fakalilifu ai e Matua a ia.”—Ioane 12:26.