Fakatapulu a Mutolu ke he Mahani Fakatokolalo
1 Kua falanaki e tama tane leveki mamoe ki a Iehova mo e fakakaumahala e toa malolo. (1 Samu. 17:45-47) Kua fakauka fakatekiteki e tagata mautu ke he matematekelea. (Iopu 1:20-22; 2:9, 10) Kua puhala he Tama he Atua e tau fakaheke oti kana ma e hana fakaakoaga ke he Matua hana. (Ioane 7:15-18; 8:28) He tau fakafifitakiaga takitaha nei, ne fakamatapatu ai ke he mahani fakatokolalo. Pihia foki he vaha nei, kua aoga e mahani fakatokolalo ke he tau tutuaga kua fehagai mo tautolu.—Kolo. 3:12.
2 Ka Fakamatala: Ha ko e tau fekafekau Kerisiano, kua talahau fakatokolalo e tautolu e tala mitaki ke he tau tagata oti he tau tutuaga kehekehe he nakai fakafili a lautolu he fakave ke he ha lautolu a tuaga he lanu, aga fakamotu, po ke feakiaga. (1 Kori. 9:22, 23) Ka hemu po ke fakaikaluga e falu he fakaheu e fekau he Kautu, nakai tali atu pihia a tautolu ka kia fakauka he kumi a lautolu kua lata. (Mata. 10:11, 14) He nakai lali ke nava he falu e iloilo po ke fakaakoaga ha tautolu, kia hagaaki e tautolu e onoonoaga ke he Kupu he Atua, he mailoga na lahi e fakaohoohoaga ke he ha mena ne liga ke talahau e tautolu. (1 Kori. 2:1-5; Hepe. 4:12) He fifitaki a Iesu, kia foaki e tautolu e tau fakahekeaga oti ki a Iehova.—Mareko 10:17, 18.
3 He Fakapotopotoaga: Kua lata foki e tau Kerisiano he ‘taha kia taha, kia fakatapulu a lautolu ke he loto holoilalo.’ (1 Pete. 5:5) Ka mailoga e tautolu ke tuku mua e falu ia tautolu, to kumi puhala a tautolu ke fekafekau ke he ha tautolu a tau matakainaga ka e nakai amanaki ki a lautolu ke fekafekau mai ki a tautolu. (Ioane 13:12-17; Filipi 2:3, 4) To nakai logona hifo a tautolu kua tokoluga atu ke he tau gahua tuga e fakamea he Fale he Kautu.
4 Kua lagomatai he mahani fakatokolalo a tautolu ke ‘fakauka ko e taha ke he taha mo e fakaalofa’ ti fakaholo ki mua e mafola mo e kaufakalataha he fakapotopotoaga. (Efeso 4:1-3) Kua lagomatai a tautolu ke omaoma ki a lautolu kua kotofa ke takitaki. (Hepe. 13:17) Kua omoi a tautolu ke talia ha tomatoma po ke akonaki ka liga foaki ki a tautolu. (Sala. 141:5) Ti kua fakamafiti he mahani fakatokolalo a tautolu ke falanaki ki a Iehova ka leveki e tautolu ha kotofaaga kua moua e tautolu he fakapotopotoaga. (1 Pete. 4:11) Tuga a Tavita, kua mailoga e tautolu ko e kautuaga kua nakai falanaki ni ke he lotomatala he tagata ka e ke he monuina he Atua.—1 Samu. 17:37.
5 Ki Mua he Atua ha Tautolu: Mua atu ai, lata ia tautolu ke ‘fakatokolalo ai a tautolu ki lalo he lima malolo he Atua.’ (1 Pete. 5:6) Ka maeke ia tautolu ke fakauka ke he tau tutuaga kamatamata, kua manako atu a tautolu ma e totokaaga ka tamai he Kautu. Ka kia fakagahuahua fakatokolalo e tautolu e fakauka, he fakatali ki a Iehova ke fakamoli e tau maveheaga hana ke he magaaho hana kua kotofa. (Iako. 5:7-11) Ke tuga moli a Iopu ne fakatumau ke fakamoli, ko e matapatu kapaletu ha tautolu ko e ‘fakamonuina ai e higoa a Iehova.’—Iopu 1:21.
6 Ko e perofeta ko Tanielu ne ‘fakatokolalo ai e ia a ia ki mua hana a Atua’ mo e ne fakamonuina ke he taliaaga ha Iehova mo e loga e tau kotofaaga mitaki. (Tani. 10:11, 12) Kia pihia foki a tautolu he fakatapulu e tautolu a tautolu ke he mahani fakatokolalo, he iloa “ko e taui he mahani fakatokolalo mo e matakutaku kia Iehova, hanai, ko e koloa, mo e lilifu mo e moui.”—Fakatai 22:4.