Kia Tatali ki a Iehova

1. Ko e heigoa e matakupu he fonoaga, ti ko e ha ne latatonu ai?

¹ “Ko Iehova, ko e Atua kua fakafili mena,” he tohia e Isaia. “Uhoaki a lautolu oti kua tatali atu kia ia.” (Isaia 30:18e) Kua loga e tau fakamauaga faka-Tohi Tapu ne fakahoko he Atua e fakafiliaga ke he tau fi mo e he tau fekafekau tua fakamooli haana. Ko e heigoa ne fakaako he tau fakamauaga ia ke he tau tagata tapuaki ha Iehova he vahā nei? Ko e heigoa kua maeke ia tautolu ke taute mogonei ke mautauteute ma e “aho a Iehova kua lahi mo e matakutakuina”? (Ioelu 2:31, 32) To omoomoi he Fonoaga he Faahimotu “Kua Tata Mai e Laveakiaga!” ka hau a tautolu ke manamanatu ke he tau hūhū ia mo e taute e kumikumi hifo ni fakatagata. To lagomatai a tautolu ke amaamanaki tumau ki a Iehova.

2. Maeke fēfē ia tautolu ke fakakite e loto fakaaue ma e fonoaga he faahimotu ha tautolu?

² Kua taute nakai e koe e tau fakaholoaga ke aoga mai he tau aho tolu oti he fonoaga? Ke fakatai ki ai, kua tutala nakai a koe ke he takitaki gahua haau ma e taha magaaho ke nakai gahua a koe? Ua amanaki ke moua noa e fakaatāaga. Kia liogi hagaao ke he mena ia. Ti fakailoa ke he takitaki gahua haau. (Nehe. 2:4, 5) Taha mena foki, kua nakai lata ia tautolu ke fakatuai ke tauteute e tau fakaholoaga ma e peleōafi, nofoaga, mo e falu matafeua kua lata. Kua fakakite he pulega mitaki pihia e loto fakaaue hokulo ha tautolu ma e laulau fakaagaaga ha Iehova. Kua lata he tau motua ke matakaki ki a lautolu ne manako lagomatai ma e tau fakaholoaga ha lautolu ma e fonoaga, mua atu ki a lautolu ne momotua lahi i loto he fakapotopotoaga.​—Kala. 6:10.

3. Ko e heigoa e tau mahani ne kua lata ke kitia ke he tau tagata ha Iehova he maaga he fonoaga?

³ Fakalilifu he Mahani Mitaki e Atua: He tokologa a tautolu ne fakapotopoto ke he tau fonoaga, kua eke ai e mahani mitaki ha tautolu mo fakamatala ke he maaga ia. Ti ko e heigoa mogoia ha tautolu kua lata ke taute? Ka haia a tautolu he tau motela, tau fale kai, mo e falu matakavi pisinisi he maaga ne fono ai, kua lata a lautolu ne fehagai mo tautolu ke fiafia ha ko e tau mahani Kerisiano ha tautolu, tuga e fakamanavalahi, mahani molū, mahani fakalatalata, mo e mahani totonu. (Kala. 5:22, 23; Filipi 4:5) Kua lata ia tautolu oti ke fakakite e fakaalofa ne “nakai mahani fuafuakelea, nakai kumi e ia hana tau mena, nakai ita vave.” Pete foki ka tutupu e tau mena uka mo e nakai hagahaga mitaki, kua manako a tautolu ke eke “e tau mena oti kana ke fakaheke ai ke he Atua.”​—1 Kori. 10:31; 13:5.

4. Maeke fēfē he tau matua ke lagomatai e fānau ha lautolu ke momoui ke he puhala kua fakaheke a Iehova?

⁴ He mole taha fonoaga, ne nava lahi taha tagata leveki hotela ke he mahani mo e tauteuteaga he tau fuata ha tautolu ati fakakite e manako haana ke “uta tumau e Tau Fakamoli a Iehova ke he hotela haana.” Kua fakafiafia ha e mena ia! Ko e fakahekeaga mitaki anei ke he fakaakoaga mo e levekiaga ne foaki e mutolu ma tau matua. Ko e mena nakai pulotu ma e tau matua ke toka e fānau ha lautolu ke nonofo he tau poko hotela ka e nakai fai levekiaga. Kua lata e fānau ke leveki fakamitaki. (Fakatai 29:15) Kia fakaheke he mahani mitaki ha lautolu a Iehova mo e fakafiafia e loto haana!​—Fakatai 27:11.

5. Maeke fēfē ia tautolu ke fakalilifu a Iehova ke he tau tapulu mo e tauteuteaga ha tautolu?

⁵ Tapulu mo e Tauteuteaga kua Gali: Kia igatia a tautolu ke lafi atu ke he lilifu ne lata he fonoaga he kalo mai he tui e tau tapulu mo e tauteuteaga fasone kua molea lahi, nakai gali, po kua fakateaga. Kua lata ai ke he tau magaaho ka fenoga atu po ke fenoga mai he maaga ne fono ai, magaaho ka lagomatai ke tauteute e matakavi ke fono, mo e ka o atu ke he tau fakaholoaga. Ko e tau fekafekau he Atua, kua lata a tautolu ke manamanatu fakamua ke he higoa mo e tuaga ha Iehova, nakai ke he manako fakatagata po ke hagahaga mitaki ha tautolu. Kua ha ha he tau ulu he magafaoa e matagahua ke kitia mooli kua fakakite he tauteuteaga he magafaoa ha lautolu e mahani gali mo e maimainā he tau magaaho oti.​—1 Timo. 2:9.

6. Ko e ha kua lata ia tautolu ke fakakite pihia e tau tauteuteaga lilifu he tau magaaho okioki he tau fakaholoaga he fonoaga?

⁶ Ti kua aoga foki ke fakatumau e tauteuteaga lilifu ka okioki he tau hotela, tau fale koloa, mo e tau fale kai. Kua latatonu ke tui foki e tau mena tui ne o atu ke he fonoaga kaeke ke kai a tautolu he taha mena. He tau e pine he fonoaga ka foaki mai ki a tautolu e magaaho ke fakamatala he ha magaaho.​—2 Kori. 6:3, 4.

7. Maeke fēfē ia tautolu ke lafi ke he maopoopo mo e fiafia he fonoaga? (Kikite e “Tau Fakamanatu he Fonoaga he Faahimotu.”)

⁷ Ne talahau tuai e Isaia: “To tatali a Iehova ke fakaalofa noa mai kia mutolu; ko e mena ia to matike a ia ke fakaalofa mai kia mutolu.” (Isaia 30:18a) Kua lata ke omoi he loto fakaaue ma e fakaalofa noa mo e totonu lahi ha Iehova a tautolu ke fakalilifu ki a ia ke he tau mahani mo e tau tauteuteaga ha tautolu ka fakapotopoto auloa ke he fonoaga. Kia fakalilifu he Fonoaga he Faahimotu “Kua Tata Mai e Laveakiaga!” e Atua ha tautolu mo e lagomatai a tautolu ke amanaki tumau ki a ia!

[Puha he lau 4]

Tau Fakamanatu he Fonoaga he Faahimotu

◼ Tau Magaaho he Polokalama: To kamata e polokalama he 9:30 a.m. he tau aho tolu oti. To hafagi e tau gutuhala he 8:00 a.m. He fai minuti ato kamata e fakaholoaga, to nofo e tagata nofoa i mua ka ta ai e leo kofe ke kamata. Lata mogoia ia tautolu oti ke kumi e tau nofoa ke kamata e polokalama he puhala lilifu. To fakahiku e polokalama he 5:15 p.m. he Aho Faraile, he 5:05 p.m. he Aho Faiumu, mo e he 4:10 p.m. he Aho Tapu.

◼ Paaka Motoka: He tau matakavi fonoaga oti ne moua e tautolu e pule ke he tau paaka motoka, to ha ha ai e tau paaka tokanoa ka e nakai totogi kaeke o mai mua. Ko e tau pine he fonoaga to eke mo fakamailoga ke paaka e motoka. Ko lautolu ni ne fai fakaatāaga mai he tufono maaga ma e tau tagata fai matematekelea ka paaka he tau paakaaga pauaki ma lautolu ia ni. Ha kua nakai mahani ke loga e tau paakaaga motoka, kua lata ke heke auloa e tau motoka ka maeke ka e nakai taha po ke ua ni e tagata ka heke i loto.

◼ Fakamau e Tau Nofoa: Kua lata ke fakamau e tau nofoa ma lautolu ni ne heke he motoka hau po ke nonofo mo koe i kaina.

◼ Kai Tupou Laā: Fakamolemole tamai e kai laā ka e ua o kehe mai he matakavi fonoaga ke kumi mena kai he okioki tupou laā. Ti fakaaoga ni e puha tuku kai tote ne hao i kelekele he tau nofoa. Ko e tau puha tuku kai lalahi, tau lupo hio, mo e tau kava kua nakai fakaatā ke he matakavi fonoaga.

◼ Tau Mena Fakaalofa: Kua lahi mahaki e tupe ke fakatoka e fakaholoaga he fonoaga he fahimotu. Maeke ia tautolu ke fakakite e loto fakaaue he foaki e tau mena fakaalofa ke he gahua he lalolagi katoa he Fale he Kautu ha tautolu po ke he fonoaga. Ko e tau tieke ne foaki ke he fonoaga kua lata ke tohi ke totogi ke he “Watch Tower Society.”

◼ Tau Pakia mo e Tau Mena Fakalutukia: Kua gūgū mai e tau tagata ne tali e tau fakalutukia ha kua loga lahi e hea he tau telefoni utafano ke he tau mena ikiiki. Kaeke tupu taha mena fakalutukia fakaekekafo he fonoaga, fakamolemole tala age ke he fekafekau ne tata mai, ko ia ka fakailoa fakamafiti ke he Faahi Lagomatai Matematekelea ke maeke he tagata gahua pauaki he feua ia ke fuafua e hagahaga kelea he tuaga ti kumi e lagomatai. Ka lata, to hea e lautolu e faahi gahua fakalutukia.

◼ Nakai Logona Mitaki: To fakapuloa e fakaholoaga ke he takaiaga ia ni he fale ke he letio FM. To taute e fakailoaaga ke he mena nei he kamataaga he fakaholoaga fakamua. Ke fakaaoga e foakiaga nei, lata ia koe ke tamai e tama letio FM mo e tau mena fanogonogo teliga.

◼ Tapakiaga: Ko e tau mena tapaki kua nakai lata ke tuku ke he fakatokaaga hila po ke fakatokaaga leo he fale fono ti lata ni ke fakaaoga ke he puhala ka nakai faguna e falu.

◼ Poki Ata: Kaeke poki ata a koe, kia nakai fakaaoga e fakalupa ke he magahala he tau fakaholoaga.

◼ Tau Fakahoko Fekau mo e Tau Telefoni Utafano: Lata e tau koloa nei ke fakatoka pauaki ke nakai fakatauhele.

◼ Tau Lolo Poki: Kua loga e tau fonoaga he mogonei kua ha ha i loto he fale ti kua fai matini fakahauhau. Ko e mena ia, kua lata ia tautolu ke fakakaupa e fakaaoga he tau lolo poki mo e fakamanogi neke auhia ai falu ne lauia he gagao uka ke fafagu po ke falu lekua pihia.​—1 Kori. 10:24.

◼ Tau Laupepa Aahi Atu: Ko e laupepa Please Follow Up (S-43) kua lata ke fakaaoga ke foaki e tau talahauaga hagaao ke he ha tagata ne fakakite e fiafia ha ko e fakamatala ha tautolu he tau magaaho noa he magahala he fonoaga. Kua lata he tau tagata fakailoa ke tamai taha po ke ua e laupepa aahi atu ia ke he fonoaga. To moua foki e tau laupepa he poko toka tohi. Kia age mogoia e tau laupepa kua fitā e fakapuke ke he tohikupu ka liu a koe ke he fakapotopotoaga.​—Kikite Ha Tautolu a Fekafekauaga he Kautu, Fepuari 2005 lau 6.

◼ Tau Motela: (1) Fakamolemole ua loga e poko ka fakamau ke he mena kua manako ki ai, ti ua loga e tagata ka nonofo he poko ke he mena kua fakaatā ai. (2) Kaeke lata ke liuaki e poko haau ne fakamau, fakailoa fakamafiti ke he hotela. (3) Uta ni e peleo uta koloa ka mau a koe ke fakaaoga. (4) Ua kaitunu he tau poko ne nakai fakaatā ke kaitunu. (5) Ko e tau Kerisiano, to nakai fakaaoga fakahehē e tautolu e tau kai pogipogi, kofe, mo e tau aisa ke fakaaoga he tau tagata nonofo he hotela he mogo ka nonofo ai a lautolu. (6) Fakatātā e tau fua he agaaga he fehagai mo e tau tagata gahua he hotela, mua atu he magaaho lavelave he hohoko atu laia mo e o kehe mai ai.