Magaaho ke Kai Fakaagaaga mo e Fiafia
1. Manamanatu fēfē a Iehova ke he tau manako fakaagaaga he tau fekafekau haana?
1 Ne manamanatu fakaalofa a Iehova ke he tau manako fakaagaaga he tau fekafekau haana. He hoge fakaagaaga e laulahi he tau tagata he lalolagi, nukua kai mena mitaki a tautolu. (Isaia 65:13) Taha puhala ne fagai fakaagaaga e Iehova a tautolu kakano he tau fonoaga he faahimotu ne lagataha he tau. Kua tauteute nakai a koe ke finatu ke he tau fakaholoaga oti he Fonoaga he Faahimotu “Takitaki he Agaaga he Atua” ne ha i mua? Kua fitā e fakatokatoka e galue fakaagaaga ne lolo mo e huhua mitaki.
2. Ko e heigoa kua putoia he pulega tuai ma e fonoaga?
2 Pulega Tuai: “Ko e tau manatu [po ke pulega] he tagata ne malolo ke gahua kua hiku ia ke he muhu mena.” (Fakatai 21:5) Ti, he fakaotioti e koe e tau pulega haau ke finatu ke he tau aho tolu oti he fonoaga, kia nakai fakauaua ke ole ke he takitaki gahua haau ke fai magaaho ke utakehe mai he gahuaaga kaeke kua lata. Kaeke kua manako a koe ke fai mena ke nofo ai, kua fakatokatoka nakai e tau mena nei? To manako foki a koe ke pulega ke kai auloa e tau kailaā haau mo e tau matakainaga he fonoaga. Taute e tau fakaholoaga ke finatu tuai ke he fonoaga he tau aho takitaha ke kumi e nofoa mo e fakalataha ke he lologo mo e liogi hafagi.
3. Ko e faga tapulu fēfē kua lata ke pulega a tautolu ke tui?
3 Kia mailoga e tautolu ke tui e tapulu kua gali mo e fakalatalata. (1 Timo. 2:9, 10) Kua foaki he tau fonoaga he faahimotu e magaaho mitaki lahi ki a tautolu ke fakamatala ke he maaga. He fakatumau e tauteuteaga lilifu he ha ha he maaga ka fono ai mo e tui e tau pine he fonoaga ha tautolu, to kehe mai a tautolu he tau tagata nakai talitonu ti gali ki a lautolu ne kitekite mai.
4. Ko e heigoa ka lagomatai a tautolu mo e magafaoa ha tautolu ke aoga lahi mai he polokalama?
4 Fanogonogo Fakamitaki: Kua nakai manako mooli a tautolu ke fakatō taha mena kai ne lehu mai he galue fakaagaaga nei! (Fakatai 22:17, 18) He muitua mo e Tohi Tapu ha tautolu he totou e tau kupu tohi mo e fakamau fakakū hifo e tau vala tala ka lagomatai a tautolu ke hagaaki fakalahi ke he polokalama mo e kalo mai he fakatauhele. Ti he afiafi, maeke ke fakaaoga e tau mena ne fakamau hifo e tautolu ke fakatutala ke he falu matapatu manatu mo e falu. He tau tau ē kua mole kua kitia falu fuata ne nonofo auloa he fonoaga ti fetutalaaki he magahala he polokalama po ke tohitohi he sela foni ha lautolu. Kaeke ke fai tama a tautolu, tau fuata mui foki, liga kua aoga ma tautolu ko e magafaoa ke nonofo auloa mo e fanogonogo ke he polokalama ka e nakai toka e fanau ke nonofo kehe mo e falu fuata foki.
5. Fakamalikiti fēfē e fiafia ha tautolu ke he fonoaga?
5 Olioli e Fefakalatahaaki: Kua olioli lahi e kai lolo ka taumafa auloa mo e tau kapitiga. (Fakatai 15:17) Pihia foki, kua olioli lahi a tautolu he fakalataha mo e tau matakainaga he fonoaga. Ti, he nakaila kamata e polokalama, kua mitaki lahi ke fakafeleveia atu ke he falu ne omai ke he fono ti olioli e fefakalatahaaki mo lautolu! (Sala. 133:1) He uiina hofihofi mai e tagata nofoa ki a tautolu ke nonofo ato kamata e leo kofe, lata ia tautolu ke oti e tala ti nonofo ke kamata e polokalama.
6. Talahau taha mena tupu fakatagata ke fakakite e puhala ka fakamatala a tautolu ke he tau tagata he maaga ne fono ai.
6 Kia Mataala ke Fakamatala: Kua fa foaki he tau fonoaga e magaaho mitaki lahi ke fakamatala atu. Kua tokologa a lautolu ne o he fono ne kua oatu ke he tau fale kai he hili e polokalama ti hūhū ki ai e tau tagata gahua fale kai mo e falu tagata foki hagaao ke he mataulu tala ne tohi i mua he pine he fonoaga ha lautolu. Ati tataki atu e mena nei ke he tau fakatutalaaga mo e foaki e fakamatala mitaki ke he kupu mooli. Ko e falu ia lautolu ne hūhū kua uiina ke he fonoaga ti kua omai foki.
7. Ko e ha kua lata ia tautolu ke o he fonoaga he faahimotu ha i mua?
7 Kua totou afe e tau matahola kua fakaaoga ke tauteute e polokalama, taute e fakaholoaga ma e tau fale, fakatokatoka e tau faahi gahua he fonoaga, mo e tauteute e tau lauga. Ko e tau gahua fakaalofa oti ne fakaaoga ke tauteute e galue fakaagaaga nei kua fakakite e manamanatu fakaalofa ha Iehova ma e tau tagata haana. Kia omai oti a ā tautolu mo e kai fakalahi! He taute pihia e tautolu, ka e nakai tuga e lalolagi, ‘to kalaga ai a tautolu ha ko e loto fiafia.’—Isaia 65:14.
[Puha he lau 4]
Tau Fakamanatu he Fonoaga he Faahimotu
◼ Tau Magaaho he Polokalama: To kamata e polokalama he 9:20 a.m. he tau aho tolu oti. To hafagi e tau gutuhala he 8:00 a.m. He kamata e leo kofe hafagi, lata ia tautolu oti ke nonofo ke kamata e polokalama he puhala lilifu. To fakahiku e polokalama he 4:55 p.m. he Aho Faraile mo e Aho Faiumu mo e he 4:00 p.m. he Aho Tapu.
◼ Paaka Motokā: He tau matakavi fonoaga oti ne moua e tautolu e pule ke he tau paaka motokā, to ha ha ai e tau paaka tokanoa ne nakai totogi, ma lautolu ka hohoko mua mai. Ko e tau pine he fonoaga to eke mo fakamailoga ke paaka e motokā. Ko lautolu hokoia he tau tagata matematekelea ne fai Mobility Parking Permit ka fakaatā ke paaka he mena pauaki ma lautolu ne matematekelea.
◼ Fakamau e Tau Nofoa: Kua lata ke toka e tau nofoa ma lautolu ni ne heke he motokā haau po ke nonofo mo koe he kaina taha.
◼ Kai Tupou Laā: Fakamolemole tamai e kailaā ka e ua o kehe mai he matakavi fonoaga ke kumi mena kai he okioki tupou laā. Ti fakaaoga ni e puha tuku kai tote ne hao i kelekele he nofoa haau. Ko e tau puha tuku kai lalahi, tau lupo hio, mo e tau kava kua nakai fakaatā ke he matakavi fonoaga.
◼ Tau Mena Fakaalofa: Maeke ia tautolu ke fakakite e loto fakaaue ma e tau fakaholoaga he fonoaga he foaki noa e tau mena fakaalofa ma e gahua he Kautu ke he Fale he Kautu ha tautolu po ke he fonoaga. Ko e tau tieke ne foaki ke he fonoaga kua lata ke tohi ke totogi ke he “Watch Tower.”
◼ Tau Pakia mo e Tau Mena Fakalutukia: Kaeke kua tupu taha mena fakalutukia fakaekekafo he fonoaga, fakamolemole tala age ke he fekafekau ne tata mai, ko ia ka fakailoa fakamafiti ke he First Aid ke maeke he tagata gahua pauaki he faahi lagomatai ia ke fuafua e hagahaga kelea he tuaga ti foaki e lagomatai. Ka lata, to hea he tagata gahua ha tautolu he faahi lagomatai ia e numera 111.
◼ Nakai Logona Mitaki: To fakapuloa e fakaholoaga he takaiaga ia ni he fale ke he letio FM. Ke fakaaoga e foakiaga nei, lata ia koe ke tamai e tama letio FM ne gahua he maka mo e tau mena fanogonogo teliga.
◼ Tau Peleō Tama mo e Tau Nofoa Fafo ne Fatufatu: Ko e tau peleō tama mo e tau nofoa fafo ne fatufatu kua nakai lata ke tamai ki loto he fonoaga. Ka kua fakaatā e tau nofoa motokā tama ka maeke ke pipi he nofoa he tapa ke he tau matua.
◼ Tau Lolo Poki: Kua loga e tau fonoaga ne taute i loto he tau fale ati falanaki a tautolu ke he matini fakahauhau. Ti, ko e mahani totonu a ia kaeke ke fakakaupā e tautolu e fakaaoga he tau lolo poki fakamanogi ne mahofi lahi neke auhia ai falu ne lauia he gagao uka ke fafagu po ke falu lekua pihia.—1 Kori. 10:24.
◼ Tau Laupepa Aahi Atu: Ko e laupepa Please Follow Up (S-43) kua lata ke fakaaoga ke foaki e tau talahauaga hagaao ke he ha tagata ne fakakite e fiafia ha ko e fakamatala ha tautolu he tau magaaho noa he magahala he fonoaga. Kua lata he tau tagata fakailoa ke tamai taha po ke ua e laupepa aahi atu ke he fonoaga. Kia age mogoia e tau laupepa kua fitā e fakapuke ke he Book Room ke taute po ke ke he tohikupu he fakapotopotoaga haau ka liu a koe.—Kikite Ha Tautolu a Fekafekauaga he Kautu, Fepuari 2005 lau 6.
◼ Tau Fale Kai: Kia fakaheke e higoa a Iehova ha ko e mahani mitaki haau he tau fale kai.
◼ Tau Motela: (1) Fakamolemole ua loga e poko ka fakamau ke he mena kua manako ki ai, ti ua loga e tagata ka nonofo he poko ke he mena kua fakaatā. (2) Kaeke kua lata ke liuaki e poko haau ne fakamau, fakailoa fakamafiti ke he motela. (3) Uta ni e peleō lau koloa ka mau a koe ke fakaaoga, ti liuaki fakaave ke fakaaoga he falu. (4) Ua kaitunu he tau poko ne nakai fakaatā ke kaitunu. (5) Aua neke fakaaoga fakahehē e tau kai pogipogi, kofe, po ke tau aisa ne foaki noa ke fakaaoga he tau tagata nonofo he motela he mogo ka nonofo ai a lautolu. (6) Fakatātā e tau fua he agaaga he fehagai mo e tau tagata gahua he motela he tau magaaho oti. (7) Kaeke ke tupu e lekua he poko motela haau, kia manatu ke talahau ke he Rooming Department he fonoaga.