Fakaholoaga Foou he Aho Toloaga Pauaki
Ko e mataulu ma e fakaholoaga he aho toloaga pauaki he tau he fekafekauaga he 2009 “Kia Mataala ke he Fekafekauaga ne Talia . . . , ke Fakamooli Ai e Koe” kua fakavē ke he Kolose 4:17. (NW) Ko e tau Kerisiano, ne uta fakahokulo e tautolu e tomatomaaga ia. Ko e foliaga ha tautolu ke taute tua fakamooli e fekafekauaga ha tautolu, tuga ne taute e Iesu. (Ioane 17:4) Ne fakatoka foki he aposetolo ko Paulo e fakafifitakiaga mitaki lahi mahaki ma tautolu ke he mena nei. Ne eketaha a ia ke fakakatoatoa e fekafekauaga haana.—Gahua 20:24.
Ko e vala he leveki takaiaga ka fakakite e puhala he tau tagata fakailoa kehekehe ne kautū mai he tau paleko he fekafekauaga ha lautolu. Ti ko e lauga “Feaki e Mena ne Tō e Koe” ka fakamaama e puhala ka lagomatai mooli e tautolu a lautolu ne “kotofa ke he moui tukulagi.” (Gahua 13:48) To fakatutala fakamua e tagata lauga ne ahiahi mai ke he tau kupu tohi takitaha, ia 2 Korinito 6:1-10, he lauga “Puhala ne Fakakite e Tautolu a Tautolu ko e Tau Fekafekau he Atua.” He magaaho afiafi, to fakatutala a ia ke he toloaga ke he mataulu “Matalahi ke he Haau a Fekafekauaga.” Nakai fakauaua to moua e mutolu e fakamalolōaga mai he tau vala “Olioli e Lautolu ne Ikiiki mo e Momotua e Fekafekauaga” mo e “Tau Fuata ne Fakamooli e Fekafekauaga.” Ko lautolu ne manako ke fakamailoga e tukulele ha lautolu ke he Atua he papatiso ke he vai kua lata ke fakailoa tuai ke he leveki fakapotopotoaga. Ko e vala aoga he tau toloaga mo e tau fonoaga oti ha tautolu ko e fakatutala ke he Ko e Kolo Toko. Tamai e lagaki haau ka fakaako he faahitapu he aho toloaga pauaki.
He mataala kua fakamooli e tautolu e fekafekauaga ha tautolu, kua lata ke iloa mooli e tautolu kua nakai fakapulefu he falu fakafiafia mo e tau matagahua a tautolu ke he mena ne tuku mai e Iehova ki a tautolu. Ko e fakamalolōaga faka-Tohi Tapu ne puhala mai he fakaholoaga he aho toloaga pauaki nei kua lata ke lagomatai a tautolu oti ke loto fakaaue ke he mena ka taute e tautolu ke fakatumau e hagaaki kua hako mo e mailoga kua taute katoatoa e tautolu e fekafekauaga.