“Talahau Fakatonu Atu”​—He Fakamatala ke he Tau Fale Tokoluga

1. Ko e heigoa ne putoia he ‘talahau fakatonu atu e tala mitaki’?

¹ Tuga e aposetolo ko Paulo, ko e manako ha tautolu ke “talahau fakatonu atu . . . e tala mitaki.” (Gahua 20:24) Ko e mena ia kua lata ia tautolu ke eketaha ke hokotia e fekau he Kautu ke he tokologa he matakavi ha tautolu. Kua putoia he mena nei e tau tagata tokologa ne nonofo he tau fale tokoluga (apartment). He falu magaaho, ko e paleko ke hūhū atu ke he tau poko he tau fale pihia. Pete ia, kua tokologa e tau tagata ne nonofo he tau fale tokoluga, ti ko e magaaho mitaki lahi ke fakapuloa e tautolu e tala mitaki.

2. Ko e ha kua lata ke moua e fakailoilo mo e fifiliaga mitaki he fakamatala ke he tau fale tokoluga.

² Ha kua matakutaku ke he matahavala mo e favale, kua loga fakahaga e tau fale tokoluga ne kua loka ti leoleo ai he tagata leveki gutuhala po ke hulu aki e tau pokiata takahao. (2 Timo. 3:1, 2) Kua liga fai fakaholoaga e leveki po ke takitaki he fale ke nakai fakaatā ha tagata ne nakai nofo i ai ke huhū ki loto. To liga tala mai e tagata leveki po ke takitaki ki a tautolu ke ō kehe mai i ai, mua atu ka gugū taha tagata ne nofo ai. Ko e mena ia, kua aoga ke fakailoilo mo e fakatātā e fifiliaga mitaki.

3. Magaaho fe kua latatonu ke gahua e tau fale tokoluga, ti ko e ha?

³ Magaaho ke Gahua: He tatai ni mo e falu matakavi foki, kua mitaki lahi ke fakamatala he tau fale tokoluga he tau magaaho ka liga nonofo e tau tagata he kaina. Liga tupu e tuahā ka o atu a tautolu he magaaho ka nakai tokologa e tagata ne nonofo i kaina. Tokologa e tagata fakailoa ne kautū he moua e tau tagata he kaina he tau magaaho afiafi ti pihia foki he tau pale laā afiafi Faiumu mo e afiafi Tapu. He gahua tuai he tau magaaho pogipogi, mua atu ke he tau matahiku vahā tapu, to liga fai ka gūgū atu ke he takitaki.

4, 5. Liga huhū atu fēfē a tautolu ki loto he falu fale tokoluga ne kua loka e gutuhala ki loto?

⁴ Huhū Atu ki Loto: Kua nakai lata e tau tagata fakailoa ke matutaki atu ke he tagata leveki po ke matakau he fale ato taute e fekafekauaga. Ka loka e fale ti ko e initakomo i fafo he gutuhala, kua maeke ia tautolu ke fakaaoga ai ke moua e tagata ne talia ke uta a tautolu ki loto ke tutala mo ia. Uta ni ke he vahega he fale tokoluga, to liga maeke ia tautolu ke tutala foki ke he taha gutuhala ke he taha gutuhala he fale tokoluga he mole e tutala mo e tagata ne fakaatā a tautolu ki loto. He falu magaaho foki, to pulotu ke toka e fale mo e fakaaoga e initakomo ke matutaki mo e taha tagata foki i loto. Kua lata ia tautolu ke fakaaoga e fifiliaga mitaki he fifili ko e tokofiha e tagata he fale tokoluga ia ka matutaki a koe ki ai he puhala nei he magaaho ia.

⁵ Liga manako falu tagata ne nonofo i ai ke tala age e koe ki a lautolu e kakano he aahi atu haau he puhala he initakomo. Ka pihia, talahau ko hai a koe ke he puhala totonu. Fakaaoga e higoa he tagata he kaina kaeke kua tū ai he initakomo. He puhala kū, talahau e matakupu haau. Ko e falu kua kautū he totou fakahako age e fakafeleveiaaga mai he tohi Reasoning.

6. Ko e heigoa kua lata ia tautolu ke taute ka gahua he tau fale tokoluga ne fai tagata leveki gutuhala?

⁶ Ka nakai fakaatā he tagata leveki gutuhala a tautolu ki loto ke gahua e tau fale tokoluga, kia lali a tautolu ke fakamatala ki a ia. Tokologa e tagata leveki gutuhala ne fiafia he totou e tau tohi ha tautolu. Liga maeke foki ia tautolu ke kamata e fakaakoaga Tohi Tapu mo e taute ai he poko fakatali. Ka fakaatā he tagata leveki gutuhala a tautolu ki loto ke aahi e tagata ne nofo i ai nukua fakakite e fiafia, kua mitaki lahi ke nakai nokonoko fakahanoa e falu gutuhala foki i loto ia.

7. Ko e heigoa kua lata ke tokaloto e tautolu hagaao ke he tau kato fakamatala ha tautolu?

⁷ Puhala Tauteute mo e Mahani: Kua matakehe lahi ka uta e tautolu e tau kato totō lalahi. Ko e mena ia, maeke ia tautolu ke fakaaoga e kato tote po ke nakai fai kato. Falu tagata fakailoa ne tuku e tau tohi foaki he faga tuku tohi tote ti totō e Tohi Tapu he lima ha lautolu po ke tuku he pokete.

8. Kua lata ke fakatokatoka fēfē e matakau ke fakamatala he tau fale tokoluga?

⁸ Kua mitaki lahi ke nakai fakapotopoto auloa, mua atu he tau poko fakatali po ke tau tūaga motokā, ha kua nakai aoga e onoonoaga pihia. Kua lata ke mataala fakalahi ka fakamatala he tau fale tokoluga ne lahi e matahavala. (Fakatai 22:3) Ma e fakatai, liga ua po ke tolu e hoa he tau tagata fakailoa ne gahua he taha e foloa ne maeke ke felogonaaki, liga fakafetokaki he nokonoko e gutuhala ka e fakatali e tau hoa ne toe.

9. Maeke fēfē ia tautolu ke fakakite e fakailoilo, ti ko e ha ne aoga e mena nei?

⁹ Ka huhū atu ki loto he fale tokoluga, kia fakameā e tau sevae haau ti pā e gutuhala ke mau. He fakailoilo pihia, kua fakatote hifo e tautolu e tau kakano ke gugū e tau tagata ne nonofo i ai. Ka haia i loto, o atu fakamafiti ke he lifi po ke foloa ka gahua ai ka e nakai lata ke heleaki he gutuhala ka huhū atu. To utakehe he mena nei e tuahā he tau tagata kitekite.

10. Maeke fēfē a tautolu ke kalo mai he hohā teao he tau avaloa?

¹⁰ Ke he loga he tau fale tokoluga, na fa taogo e tau leo he tau avaloa. Ko e mena ia, kia nakai vagahau fakaleo lahi ka e vagahau ni ke logona he tagata he kaina. Ka tutala ke he falu tagata fakailoa, kia fakatote hifo e leo haau, ka e tutala fakatotoka, mo e fakalatalata ke ua fakalagalaga e tuahā. Ke nakai tauhele teao e tau tagata ne nonofo ai, ne fehikitaki e falu tagata fakailoa mai he taha faahi he avaloa ke he taha faahi ato oti e foloa he gahua, ka e nakai nokonoko e taha gutuhala mo e taha gutuhala he gahua fakapapahi he avaloa. Lafi ki ai, ko e nokonoko fakaleolahi po ke fai pule e gutuhala ka fakamatakutaku a lautolu i loto.

11. Ko e heigoa e tau lagomataiaga ka lagomatai he nokonoko e tautolu e gutuhala ne fai pu takahao?

¹¹ Ka fai pū takahao e gutuhala, tutū he mena ne maeke e tagata i loto ke kitia a koe mo e hoa haau. Ono fakahako ke he pū takahao, ka mailoga e koe kua fai tagata hane onoono mai, ti fakafeleveia mafanatia ti kamata e fakataitaiaga haau. Ka hūhū e tagata, ‘Ko hai?’ kua liga mitaki ke tala age e higoa haau mo e tagata ne ō mo koe. Kua liga maeke mogoia he tagata he kaina ke totoka e logonaaga ke hafagi e gutuhala. Ka nakai, liga talahau agaia ne koe e fakataitaiaga haau pete ne nakai hafagi e ia e gutuhala.

12. Liga kalo fēfē a tautolu he tau lekua ka toka e tau tohi he tau kaina ne nakai fai tagata i ai?

¹² Nakai Fai Tagata he Kaina: Kua gugū tumau e tau tagata leveki ha kua oko e lautolu e tau tohi he avaloa mo e i fafo he fale. Ko e tau tohi ne toka i fafo he gutuhala kua mukamuka lahi ke mokulu ke he foloa ti otaota. Ko e mena ia, ko e ha tohi ne toka he tau kaina ne nakai fai tagata i ai kua lata ke tuku ke nakai kitia he tau tagata o fano.

13. Ko e heigoa kua lata ia tautolu ke taute ka feleveia mo e tagata he kaina ne ita?

¹³ Tau Tagata he Kaina ne Ita: Ka feleveia a tautolu mo e tagata he kaina ne ita ti amanaki ke hea e tagata leveki, kua mitaki lahi ke toka e foloa ia ti liliu atu he taha magaaho kehe. He falu magaaho, to pulotu ke o kehe mai he fale ke kalo mai neke taufetoko mo e tagata leveki. Pete foki kaeke ke nakai ole pauaki e tagata he kaina ke ua liliu atu ki a ia he tau mogo i mua, to mitaki ke fakamau hifo e numera he fale tokoluga ia ko e nakai liliu atu ti tuku ai mo e laupepa he matakavi. Fakalataha mo e tau nakai liliu atu, kua lata e tau kaina nei ke matutaki tumau atu ke iloa e tau manako he tagata he kaina.

14, 15. Ko e heigoa ha tautolu ka taute ka tala atu e hukui he fale tokoluga ki a tautolu ke o kehe?

¹⁴ Ka Tala Atu ki a Koe ke Fano Kehe: Kaeke kua gahua a koe he fale ti tala atu e tagata leveki, matakau leoleo, matakau leveki, po ke falu hukui he fale ia ke fano kehe, kua pulotu ke omaoma agataha. Ka maeke, kua manako a tautolu ke kalo mai he taufetoko mo e fakamatakutaku ke hokotaki mo e ta atu ke he leoleo. Laulahi ai, nakai ko e fili tagata e matakau gahua he fale tokoluga ke he Tau Fakamoli a Iehova ka ko e taute ai he matagahua ha lautolu.

¹⁵ He falu magaaho, ka tala atu e hukui he fale ia ki a koe ke fano kehe, liga maeke ia koe ke fakamaama fakatotonu mo e fakailoilo e kakano he aahi atu haau. (1 Pete. 3:15) Mailoga e tautolu e matagahua haana he leveki e tau tagata ne nonofo ai ke fiafia mo e tumau e puipuiaga he fale. Liga to fakaatā e ia a koe ke matutaki ke gahua he fale. Ka nakai, ti fano fakaeneene ki fafo. Ka maeke he tuaga, liga ole a koe ma e fakaatāaga ke toka tumau e tau tohi he poko fakatali po ke poko unu. (Kolo. 4:6) Kua lata e leveki fekafekau ke iloa e tau mena tutupu pihia.

16. Ko e heigoa kua lata ia tautolu ke taute ka tupu hololoa e tau lekua he lali ke gahua e fale tokoluga ia?

¹⁶ Liga fai magaaho he mole, maeke e tau tagata fakailoa ke lali fakatekiteki ke gahua i loto he fale. Pete ia, kaeke ke tupu hololoa e tau lekua, kua lata e tau motua ke matutaki atu ke he la ofisa ma e lagomataiaga ka e nakai lata e tau tagata fakailoa ke lali ni a lautolu ke fakatotoka e matalekua. Ka nakai maeke e tau tagata fakailoa ke gahua he tau fale tokoluga, taute e tau laliaga ke matutaki ke he tau tagata ne nonofo ai ke he falu puhala foki, tuga e fakamatala he telefoni po ke tohitohi. Ne taute he falu tagata fakailoa e gahua fakamatala i mua po ke takatakaiaga he fale ia he tau tulā pogipogi mo e afiafi ka ō e tau tagata ke gahua mo e liliu mai ki kaina.

17. Ko e ha e fakamatala ke he fale tokoluga kua aoga lahi?

¹⁷ Kua teitei hoko mai tuai e moumouaga he fakatokaaga kelea nei. Ko lautolu ni ne ui ke he higoa ha Iehova ka momoui. “Po ke tauui fefe a lautolu kia ia kua nakai tua ki ai a lautolu? ka e tua fefe a lautolu kia ia kua nakai fanogonogo atu ki ai a lautolu?” (Roma 10:13, 14) Tokologa kua “kotofa ke he moui tukulagi” ne nonofo he tau fale tokoluga. (Gahua 13:48) He fakailoilo mo e fakatātā e fifiliaga mitaki, maeke ia tautolu ke hokotia e tala mitaki ki a lautolu.