Fanogonogo mo e Fakaako
1. Ko e ha kua lata ke eketaha ke fanogonogo mo e fakaako he fonoaga faahimotu?
1 Nakai leva to kamata e tau fonoaga faahimotu he 2013. Lahi e gahua ne kua taute ke fakatokatoka e fakaholoaga ke lata mo e tau manako he fonua ke he lalolagi katoa. Kua taute nakai e koe e tau fakatokatokaaga ke hoko atu ke he tau aho ia ne tolu he fonoaga? Ko e tau fonoaga lalahi ne fa loga e tau mena fakatauhele, ti kua lata ke eketaha ke fanogonogo fakamitaki ke he fakaholoaga. Ha kua loaloa atu e tau vala he fakaholoaga ka fakatatai ke he tau feleveiaaga he fakapotopotoaga, kua lata ni ke fanogonogo fakalahi atu foki. Ke lafi atu, ha kua mamao e tau mena ne o mai ai, liga to mategūgū ni. Ko e heigoa ka lagomatai a tautolu ke mataala ke maeke ke fanogonogo mo e fakaako?—Teu. 31:12.
2. Liga tauteute fēfē e tautolu e tau loto ke lata mo e fakaholoaga he fonoaga?
2 Fakamua To Kamata e Fonoaga: Ha ha he faahi Kupega Hila ha tautolu e fakaholoaga he fonoaga, ne tutu ai e tau mataulu he tau lauga oti mo e taha po ke ua e matapatu kupu tohi. Ka maeke a tautolu ke moua e Initanete, to lagomatai ka onoono tuai ke he vala tala nei ke tauteute e tau loto ha tautolu ma e tau lauga. (Esera 7:10) He haau a Tapuakiaga Magafaoa he afiafi, maeke nakai ia koe ke fakaaoga taha magaaho ke ati hake e amaamanakiaga ke he fakaholoaga i mua?
3. Ko e heigoa ka lagomatai a tautolu ke fanogonogo fakamitaki?
3 Magaaho he Fakaholoaga: Ka maeke, fina atu tuai ke he tau fale ikiiki ato kamata e fakaholoaga. Tamate e telefoni utafano haau ke ua fakatauhele a koe he tau hea po ke tau fekau tohitohi po ke fakaohooho ke tohitohi he telefoni he magaaho he fakaholoaga. Kaeke ke fakamoui e telefoni haau, kua lata ni ke tuku he tuaga ke ua fakatauhele e falu kaeke kua fai tagata ka hea mai. Ka fakaaoga e koe e koloa hila tuga e tablet he magaaho he fonoaga, fakaaoga he puhala ke ua fakatauhele e falu. Lali ke ua kai po ke inu he magaaho he fakaholoaga. (Fakama. 3:1) Hagaaki fakatonu haau a mata ke he tagata lauga. Ka totou e kupu tohi, muitua ke he Tohi Tapu haau. Fakamau fakakūkū e tau manatu.
4. Lagomatai fēfē he tau mamatua e tau fanau ha lautolu ke fanogonogo mo e fakaako?
4 Kua manako foki a tautolu ke he tau fanau ha tautolu ke fanogonogo mo e fakaako. Pehē e Tau Fakatai 29:15: “Ko e tama kua toka noa kua fakamā ai e ia hana matua fifine.” Kua mitaki mogoia ke nonofo auloa e tau magafaoa ke maeke he tau mamatua ke kitia kua fanogonogo e tau fanau ke he fakaholoaga ka e nakai tutala, tohitohi he telefoni, po ke o fano. Pete ni ka ikiiki agaia a lautolu ke ai maama e tau mena oti ne kua fakatutala ki ai, na maeke e tau fanau ke fakaako ke aala mo e nonofo fakaeneene.
5. Ko e ha ne aoga ai ke liu kitekite ke he fakaholoaga, ti taute fēfē e tautolu e mena nei?
5 Ka Oti e Fakaholoaga he Tau Aho Takitaha: Ua ō leva he pō. Momohe tuai ke moua taha okioki mitaki. Ko e liu kitekite ke he tau mena ne logona e koe ka lagomatai a koe ke manatu loa. Ko e mena ia, kua aoga ke fakaaoga taha magaaho ke fakatutala mo e magafaoa hagaao ke he fakaholoaga he tau afiafi takitaha. Ka fina atu a koe ke he fale kai mo e falu kapitiga, ko e ha he uta e tau manatu haau ne fakamau ti talahau taha po ke ua e manatu ne fiafia pauaki a koe ki ai? Ka liu a koe ki kaina he oti e fonoaga, liga fakaaoga e koe taha magaaho he Tapuakiaga Magafaoa he afiafi ke fakatutala ke he tau puhala kua maeke ia mutolu ko e magafaoa ke fakaaoga e tau vala tala. Maeke foki ia koe ke fakaaoga taha magaaho he tau faahi tapu takitaha ke fakatutala ke he ha koloa foou ne fakatoka mai.
6. Kua lahi kia ka fakalataha atu noa ni ke he fonoaga? Fakamaama.
6 To nakai aoga e galue ka ai kai e tau mena kai ti tavili. Maeke a tautolu ke talahau pihia foki hagaao ke he galue fakaagaaga ka fakatoka mai he fonoaga faahimotu. Kia aoga katoatoa mai a tautolu ka fakalataha atu ke he tau fakaholoaga takitaha, he fanogonogo fakatekiteki, ti fakagahuahua e tau mena ne fakaako e tautolu.