Mau “Kia Lata mo e Iki”​—Aoga Agaia Kia?

Falu fekafekau he Atua ne nakai fai hoa kua talahau pihia. Iloa e lautolu kua manako a Iehova ke he tau fekafekau haana ke mau ni “kia lata mo e Iki,” kakano ai, ke mau ni ke he tau Kerisiano mooli. (1 Korinito 7:39) Ti ko e ha ne talahau he falu Kerisiano e tau mena nei?

KAKANO NE FAKAUAUA E FALU

Ko e tau Kerisiano ne talahau e tau mena nei kua liga logona hifo na tokologa atu e tau matakainaga fifine nakai mau ke he tau matakainaga taane nakai mau. He tau motu loga kua mooli e mena nei. Ma e fakatai, i Korea, ne 57 e pasene he tau Kerisiano nakai mau ko e tau matakainaga fifine ti 43 e pasene ko e tau matakainaga taane. I Colombia, 66 e pasene he tau Kerisiano ko e tau matakainaga fifine ti 34 e pasene ko e tau matakainaga taane.

He falu matakavi, ko e tau matua ne nakai ko e Tau Fakamoli ne liga poaki ke moua e tau tupe loga po ke falu mena fakaalofa tauuka ka mau e tau tama fifine ha lautolu. Ti ko e falu matakainaga taane ne nakai mau kua liga nakai fahia ke fakatau e tau mena fakaalofa nei. Ko e fua, ne tupetupe e falu matakainaga fifine to moua la nakai e lautolu e taane Kerisiano.a​—Kikite matahui tala.

LATATONU KE MAUOKAFUA KI A IEHOVA

Kaeke kua logona pihia foki a koe taha mogo, maeke ia koe ke mauokafua kua maama e Iehova e tuaga haau ti iloa tonu e logonaaga haau.​—2 Nofoaga he Tau Patuiki 6:29, 30.

I loto he Tohi Tapu, ne poaki agaia e Iehova ke mau ni a tautolu ke lata mo e Iki. Ko e ha? Ha kua iloa e ia e mena ne mua e mitaki ma tautolu ti manako a ia ke puipui a tautolu. Nakai manako a ia ke taute e tautolu e tau fifiliaga kelea ka fakamamahi po ke taute a tautolu ke nakai fiafia. He vahā ha Nehemia, tokologa e tau Iutaia ne faihoana ki a lautolu ne nakai fekafekau ke he Atua. Ati talahau e Nehemia e fakafifitakiaga kelea ha Solomona. “Ne ofania a ia he hana Atua, ne kotofa foki he Atua a ia ke eke mo patuiki kia Isaraela oti; ka e pete ia ne fakatupu he tau fifine he tau motu kehe e hala kia ia.” (Nehemia 13:23-26) Iloa e Iehova ko e tau fakamanatuaga haana kua mitaki ma tautolu, ti ko e kakano haia ne fakatonu e Ia ke he tau Kerisiano ke mau ni ke lata mo e Iki. (Salamo 19:7-10; Isaia 48:17, 18) Kua fakaaue lahi a tautolu ha kua foaki mai e ia ki a tautolu e fakatonuaga ne mitaki mo e mauokafua. Ka omaoma a tautolu ki a Iehova ko e ha tautolu a Pule, kua talia e tautolu ha ha ia ia e tonuhia ke tala mai ki a tautolu e mena ke taute.​—Tau Fakatai 1:5.

Mooli ai, kua nakai manako a koe ke ‘hahamo nakai tatai,’ kakano, ke mau mo e tagata ne nakai fakaalofa ki a Iehova. To fakaohooho he tagata ia a koe ke nakai matutaki e fekafekau ke he Atua. (2 Korinito 6:14) Ne hako tumau e fakatonuaga he Atua, ti tokologa e Kerisiano he vahā nei kua fifili fakapulotu ke omaoma ki a Iehova. Ka e nakai pihia e fifiliaga he falu.

AOGA AGAIA

Ko e matakainaga fifine ne higoa ko Maggy i Ausetalia ne kamata ke fakamahani kapitiga mo e tagata taane ne nakai ko e Kerisiano mooli.b (Kikite matahui tala.) Pehē a ia: “Loga e tau feleveiaaga haaku ne tonoa ha ko e fakalataha mo ia. Ti to hifo mafiti e tuaga fakaagaaga haaku.” Taha fifine fuata i Initia ne higoa ko Ratana ne fakamahani kapitiga mo e tagata he poko aoga kua kamata ke fakaako e Tohi Tapu. Ka kua fakaako ni e ia e Tohi Tapu ke kapitiga mo Ratana. Fakahiku, ne mamutu e fekafekauaga ha Ratana ki a Iehova ti matutaki ke he taha lotu ke mau mo ia.

Ko Ndenguè mai i Cameroon ne 19 e tau he mogo ne mau a ia ke he tagata taane ne nakai fekafekau ki a Iehova. Ato mau a laua, ne mavehe a ia ki a Ndenguè to matutaki ni a ia ke eke mo Fakamoli. Ka e, ua e faahi tapu he mole e mau ha laua, ne tala age a ia ki a Ndenguè kua nakai fakaatā a ia ke fano ke he tau feleveiaaga he fakapotopotoaga. Pehē a ia: “Logona hifo e au e matimati mo e tagi lahi. Mailoga e au kua nakai tuai pule au ke he moui haaku. Ti momoko tumau e logonaaga haaku.”

Mooli na fai Kerisiano kua mau ke he hoa ne nakai fekafekau ki a Iehova ka e totonu mo e mitaki agaia. Ka e pete ne totonu e hoa haau ne nakai fekafekau ki a Iehova, to lauia fēfē e fakafetuiaga haau mo Iehova? To fēfē e logonaaga haau he iloa kua nakai fanogonogo a koe ke he fakatonuaga ne foaki e ia ki a koe ke fiafia? Ti mua atu, to fēfē e logonaaga ha Iehova ke he mena ne taute e koe?​—Tau Fakatai 1:33.

Ko e tau matakainaga he lalolagi katoa ne kua omaoma ke he fakatonuaga ha Iehova ke mau ni “kia lata mo e Iki” kua talitonu ko e fifiliaga mitaki lahi mahaki anei. Eketaha e tau matakainaga taane mo e fifine ne nonofo takitokotaha ke fakafiafia a Iehova he mau ni mo e tagata kua tapuaki ki a Ia. Ko Michiko i Sapanī ne eketaha ke omaoma ke he Atua pete ne lali e magafaoa haana ke fakalagalaga a ia ke mau mo e tagata taane ne nakai fakaalofa ki a Iehova. Uka foki a ia ke onoono ke he tau kapitiga haana kua mau ke he tau Kerisiano mooli ka e nakaila mau a ia. Pehē a ia: “Fakamanatu e au ki a au ni ha ko Iehova ko e ‘Atua fiafia,’ ko e fiafia ha tautolu kua nakai fakavē ke he mau po ke nakai mau ha tautolu. Talitonu foki au kua foaki e ia ki a tautolu e tau manako ha tautolu he loto. Ti ka nakai moua e tautolu e hoa pete kua manako a tautolu ke mau, kua mitaki lahi mahaki ke nofo tokotaha he magaaho nei.” (1 Timoteo 1:11) Fai magaaho, ti mau e Michiko e matakainaga taane mitaki, ti fiafia a ia ha kua fanogonogo ke he fakatonuaga a Iehova.

Ha ha i ai falu matakainaga taane ne fakatali ke moua e tagata hako ke mau. Ma e fakatai, ko Bill mai Ausetalia ne talahau he falu mogo kua hihiga e manako haana ke he tau fifine ne nakai ko e Tau Fakamoli. Ka e nakai fakakapitiga tata a ia ke he taha ia lautolu ha kua nakai manako a ia ke kamata e fakafetuiaga ka fakahiku ke ‘hahamo mo e nakai tatai fakalataha’ mo ia kua nakai tua. He tau tau kua mole, ne fiafia foki a ia ke he falu matakainaga fifine, ka e nakai logona pihia a lautolu ki a ia. Ne 30 e tau he fakatali a Bill to moua e ia e fifine Kerisiano ne tatai e tau foliaga. Pehē a ia: “Nakai tokihala au. Logona e au e monuina ha kua ō tokoua a maua he fonua, fakaako tokoua, mo e tapuaki tokoua. Fiafia au ke feleveia mo e fio mo e tau kapitiga he hoana haaku ha ko lautolu ko e tau matakainaga tapuaki oti ha Iehova. Fakagahua e maua e tau matapatu fakaakoaga he Tohi Tapu ke he fakamauaga ha maua.”

HE FA E FAKATALI KI A IEHOVA

Ko e heigoa haau ka taute he fa e falanaki a koe ke he fakatonuaga ha Iehova mo e fakatali ke he taane po ke hoana ne fekafekau ki a Ia? Maeke a koe ke manamanatu ke he kakano ne nakai mau a koe. Ka logona hifo e koe ha kua manako a koe ke omaoma ke he poaki a Iehova, ti mauokafua a koe to fakafiafia he mena nei a Iehova. (1 Samuela 15:22; Tau Fakatai 27:11) Matutaki foki ke liogi tumau ki a Iehova mo e tala age fakamooli ki a ia e logonaaga haau. (Salamo 62:8) He eketaha katoatoa a koe ke totoko e kamatamata mo e tau manako hehē, to fakamalolō e fakafetuiaga haau mo Iehova he tau aho takitaha. To mauokafua a koe kua leveki e Iehova e tau manako haau mo e tau logonaaga haau ha kua uho a koe ki a ia. Nakai mavehe e ia to age e ia e taane po ke hoana ke he taha. Kaeke ko e fakamauaga e mena haau ne manako mooli ki ai, iloa e Iehova e puhala mitaki lahi mahaki ke fakamakona e tau manako haau.​—Salamo 145:16; Mataio 6:32.

He falu mogo liga logona hifo a koe tuga a Tavita, ne pehē: “Iehova na e, kia fakaave a koe ke fanogonogo mai kia au, ha ko e oti ne fai haku a moui; aua neke haga kehe hāu a fofoga ia au.” (Salamo 143:5-7, 10) Ua fakalolelole. Fakaatā a Iehova ke fakakite ki a koe e mena ne manako a ia ki a koe ke taute. Fanogonogo ki a Iehova he totou e Tohi Tapu mo e manamanatu fakahokulo ke he mena haau kua totou. To lagomatai he mena nei a koe ke iloa e manako ha Iehova ma haau mo e puhala ne lagomatai e ia e tau fekafekau haana he vahā i tuai. He fanogonogo ki a ia, to moua e koe e mauokafua ke fakatumau e omaoma ki a ia.

Ko e heigoa foki e mena haau ka taute ke fakatumau e fiafia mo e lavelave he nofo tokotaha agaia? Maeke a koe ke gahua ke fakamalolō e fakafetuiaga haau mo Iehova mo e feaki e higoa mitaki. Maeke foki a koe ke fakaako ke mahani fakamokoi, gahua malolō, mukamuka ke femataaki, mo e mahani fakamooli ki a Iehova. Kua latatonu e tau mahani nei ma e fakamauaga fiafia. (Kenese 24:16-21; Ruta 1:16, 17; 2:6, 7, 11; Tau Fakatai 31:10-27) Tuku fakamua e Kautu he lavelave tumau a koe ke he gahua he fonua mo e i loto he fakapotopotoaga. To puipui he tau mena nei a koe neke taute e tau fifiliaga nakai pulotu. Pehē a Bill he tau tau ne nofo tokotaha a ia: “Ne mole vave ai! Fakaaoga e au e magaaho he fekafekauaga ha Iehova ko e paionia.”

Ko e poaki ha Iehova ke mau ni “kia lata mo e Iki” ne nakai ko e aga tuai po ke mena kua mole. He fifili ke mau ke he Kerisiano mooli, kua fakaheke e tautolu a Iehova mo e to fiafia a tautolu. Talahau he Tohi Tapu: “Uhoaki e tagata kua matakutaku kia Iehova, kua fiafia lahi ke he hana tau poaki. Ha he fale hana e koloa mo e tau mena loga; to tumau tukulagi foki hana tututonu.” (Salamo 112:1, 3) Ti eketaha ke omaoma ke he poaki he Atua ke mau ni “kia lata mo e Iki.”