KIA MATAALA!
Kua Moumou Tuai e Lalolagi—Ko e Heigoa ne Talahau he Tohi Tapu?
“Nakai leva to hokotia a tautolu ke he matematekelea he hiki e matagi. Ko e tau taone lalahi kua tomo hifo ha ko e puke lahi e vai. Lahi mahaki e vela aafu. Tau afā matakutakuina. Tote lahi e vai. Loga e tau akau mo e tau manu kua galo. Nakai ko e tala fakavai po ke fakalahilahi. Tala mai he fakasaiene e tau mena ka tutupu mai he tau matafakatufono malolō hila.”—Tala ha António Guterres, ko e tohikupu lahi he United Nations, hagaao ke he Intergovernmental Panel on Climate Change ne fakatoka mai he hokotaki ia Aperila 4, 2022.
“Hataki mai he tau saienetisi ko e moumouaga he tau tau i mua ha ko e hikiaga he matagi to hokotia ke teitei 423 e paaka lalahi he motu i [United States] ne kua hagahaga kelea pauaki he lahi e matagi mafana. Ko e tau mena kelea ka tutupu kua tuga e tau matematekelea ne totou e tautolu he Tohi Tapu: ko e afi mo e hake he vai, tataka e aisa, hake he tahi mo e mafana e matagi.”—“Flooding Chaos in Yellowstone, a Sign of Crises to Come,” The New York Times, June 15, 2022.
Maeke nakai e tau lekua he takatakaiaga he lalolagi ke fakatotoka? Ka maeke, ko hai ka fakamafola ai? Manamanatu ke he mena ne talahau he Tohi Tapu.
Talahau tuai e lekua hagahaga kelea ke he takatakaiaga
Pehē e Tohi Tapu ko e Atua ka “moumou ai foki a lautolu kua moumou e lalolagi.” (Fakakiteaga 11:18) Fakaako he kupu nei he Tohi Tapu ki a tautolu tolu e mena:
1. Ko e tau gahua he tagata to fakahagahaga kelea lahi e lalolagi.
2. Ko e moumou e lalolagi to fakaoti.
3. Ko e Atua, ka fakamafola e tau lekua he takatakaiaga he palaneta, ka e nakai ko e tau tagata.
To tumau e palaneta he vahā i mua
Talahau he Tohi Tapu “ko e lalolagi kua tumau tukulagi.” (Fakamatalaaga 1:4) To nonofo tumau ai e tau tagata.
“To eke ni e motu ma e tau tagata tututonu, to nonofo muatua ai a lautolu.”—Salamo 37:29.
To liuaki mai e moui tupuolaola he palaneta.
“To fiafia ha ko lautolu e tutakale, mo e motu nakai fai vai; to olioli e motu taluē, mo e fiti mai tuga ne kaute.”—Isaia 35:1.