Logona Hifo Kia he Tau Fakamoli a Iehova ko Lautolu Ni e Tau Tagata ka Fakahao?

Nakai. Totou miliona ne momoui he tau senetenari kua mole ne nakai ko e Tau Fakamoli a Iehova kua lata ke moua e magaaho ma e fakamouiaga. Fakamaama he Tohi Tapu ko e lalolagi foou ne mavehe he Atua, “ke liu foki tutu mai a lautolu kua mamate, ko lautolu ne tututonu katoa mo lautolu ne hepehepe.” (Gahua 24:15) Lafi ki ai, tokologa kua momoui mogonei ne lata ke fekafekau ke he Atua, mo e to moua foki e lautolu e fakamouiaga. He ha tuaga ni, nakai ko e kotofaaga ha tautolu ke fakafili ko hai ka fakamoui po ke nakai fakamoui. Ko e kotofaaga ia ne tuku age ni ki a Iesu.​—Ioane 5:22, 27.