HŪHŪ HE TAU FUATA
Lagomatai Fēfē he Tohi Tapu a Au?—Vala 1: Kumikumi ke he Tohi Tapu Haau
“Lali au ke totou e Tohi Tapu, ka e uka he loa!”—Briana, 15.
Pihia nakai a koe? Maeke e vala tala nei ke lagomatai a koe!
Ko e ha ne lata ke totou e Tohi Tapu?
Kua uka nakai ia koe ke totou e Tohi Tapu? Ka pihia, mooli lahi. Liga manatu a koe, ko e Tohi Tapu ko e tohi ne loga e tau lau, ikiiki e tau matatohi, mo e nakai fai fakatino foki—ke tuga e TV mo e tau vitiō he initanete!
Manamanatu la: Ka moua e koe e puha koloa lahi tuai, fia kitia nakai a koe ko e heigoa i loto?
Ko e puha koloa pihia e Tohi Tapu. Haia i loto e tau kupu pulotu ke lagomatai a koe ke
Taute e tau fifiliaga mitaki
Mahani totonu ke he tau matua
Moua e tau kapitiga mitaki
Ke nakai tupetupe
Ko e puhala fē ne aoga e tohi tuai nei ma tautolu mogonei? Aoga ai “ko e tau Tohi Tapu oti kana mai he Agaga he Atua.” (2 Timoteo 3:16) Ko e fakaakoaga he Tohi Tapu ne moua mai he Tagata iloilo mua ue atu he lagi mo e lalolagi.
Ko e Tohi Tapu ko e puha koloa ne toka ai e tau kupu pulotu ne uho
Totou fēfē e au e Tohi Tapu?
Ko e taha puhala, ke totou e Tohi Tapu he kamataaga ke he fakaotiaga. Ti maeke ke maama e koe e fekau he Tohi Tapu. Loga e tau puhala ke totou e Tohi Tapu, tuga e tau fakatai ua nei:
Totou e koe e tau tohi ne 66 he Tohi Tapu, ne kamata mai ia Kenese ki a Fakakiteaga.
Totou e koe he magaaho ne tutupu e tau mena ne talahau he Tohi Tapu.
Lagomatai. Appendix A7 he New World Translation ne talahau e tau mena tutupu ke he moui ha Iesu he nofo he lalolagi.
Ko e puhala ke uaaki ke totou e Tohi Tapu, fifili e tala ne lata mo e paleko haau. Ma e fakatai:
Manako nakai a koe ke moua e tau kapitiga tata mooli? Totou e tala ki a Ionatana mo Tavita. (1 Samuela, tau veveheaga 18-20) Kumikumi e tau mahani ha Tavita ne loto a Ionatana ki ai ke kapitiga mo ia.
Manako nakai a koe ke fakamalolō e loto haau ke nakai taute e tau mena kelea? Totou e tala ki a Iosefa he puhala ne totoko e ia e mahani kelea. (Kenese, veveheaga 39) Kumikumi ko e moua fēfē e Iosefa e malolō ke nakai taute e mahani kelea.
Lagomatai fēfē he liogi a koe? Totou e tala ki a Nehemia. (Nehemia, veveheaga 2) Kumi e tau tali ke he tau liogi ha Nehemia.
Lagomatai: Ka totou e koe e Tohi Tapu, nofo he taha mena ne nakai hohā ke maeke a koe ke manamanatu.
Puhala ke toluaki ke totou e Tohi Tapu, fifili e taha tohi po ke salamo, ti totou, mo e manamanatu ke he puhala ka fakaaoga e koe. Ka oti he totou, hūhū hifo ki a koe ni e tau hūhū nei:
Ko e ha ne tuku e Iehova e tala nei i loto he Tohi Tapu?
Ko e heigoa ne fakakite ke he tau mahani ha Iehova po ke tau mena ne taute e ia?
Fakaaoga fēfē e au e talahauaga nei ke he moui haaku?
Lagomatai: Taute e foliaga! Tohi hifo e aho ka kamata e totouaga he Tohi Tapu haau.