Eke mo Tagata Fanogonogo Mitaki
1 Kua lata ke fakamahani ke fanogonogo fakamakutu. Kua lata foki ke manako e tagata fanogonogo ke ako mo e aoga mai he mena kua logona. Ti, kua peehi e Iesu e lata “po ke fefe ha mutolu a fanogonogo.”—Luka 8:18.
2 Hagaao tonu e mena nei ka o atu a tautolu ke he tau feleveiaaga he fakapotopotoaga, tau toloaga, mo e tau fonoaga. Ko e tau magaaho anei kua lata ia tautolu ke fanogonogo fakamakutu. (Hepe. 2:1) Ko e falu manatu anei ka lagomatai a koe ke eke mo tagata fanogonogo mitaki he tau fakalatahaaga Kerisiano nei.
◼ Loto fakaaue e aoga he tau feleveiaaga. Ko e tau puhala lalahi a ia nukua “fakaako e Iehova” mai he “fekafekau pule.”—Isa 54:13; Luka 12:42.
◼ Tauteute tuai. Liu fakamanatu e tohi ka fakatutala, ti manatu ke ta mai mo koe e Tohi Tapu mo e lagaki ni hau ke he tohi ka fakaako ki ai.
◼ He feleveiaaga, kia tauteute pauaki ke toka e manamanatuaga ki ai. Kua lata ke kalo kehe he tutala ke he falu kua nonofo mo koe mo e mamata atu foki ke he tau mena ne taute he falu. Lali ke nakai lavelave he manamanatu ke he tau mena ke taute e koe ka oti e feleveiaaga po ke hagaao ke he falu mena ni hau.
◼ Filifilia e manatu hane talahau mai. Huhu ki a koe ni: ‘Fakagahua fefe e mena nei ki a au? To fakagahua e au a fe?’
◼ Fakamaumau fakaku hifo e tau matapatu manatu mo e tau kupu Tohi Tapu. Kua lagomatai he mena nei a koe ke hagaaki e tau manatu hau ke he mena nukua fakatutala ki ai mo e lalafi ke he manatu hau he tau matapatu matakupu ka fakaaoga ki mui.
3 Fakaako e Tau Fanau Hau ke Fanogonogo: Kua lata e tau fanau mo e fakaakoaga fakaagaga. (Teu. 31:12) He tau vaha i tuai ko “lautolu ne maama he fanogonogo” he tau tagata he Atua ne fanogonogo fakamakutu he totou ki a lautolu e Fakatufono. (Nehe. 8:1-3) Ka fai vala e tau mamatua ke he tau feleveiaaga mo e fanogonogo fakalahi, to pihia foki e tau fanau ha lautolu. Nakai pulotu ke ta mai e tau koloa fakafiafia po ke tau pepa valivali ke fakanana aki e tau fanau. Ko e o teao noa ke he poko okioki kua fakalavelave aki foki e fanogonogoaga ha lautolu. Ha kua “lili ai e goagoa ke he loto he tama,” kua lata e tau matua ke lali fakalahi ke kitia kua nonofo taha mo e fanogonogo e tau fanau ha lautolu he tau feleveiaaga.—Fakatai 22:15.
4 He eke mo tau tagata fanogonogo mitaki, kua fakamoli a tautolu kua pulotu moli mo e manako ke “tolomaki atu [e] iloilo.”—Fakatai 1:5.