Fifitaki e Fakafili Tonu a Iehova
1 ‘Kua fiafia a Iehova ke he fakafili tonu.’ (Sala. 37:28) Ti, pete he fakave e ia to moumou e lalolagi nakai tututonu nei, ne fakatokatoka e ia e hatakiaga ke taogo atu fakamua. (Mare. 13:10) Kua foaki he mena nei ke he tau tagata e magaaho ke tokihala mo e ke fakahao. (2 Pete. 3:9) Kua tutuli kia a tautolu ke fifitaki e fakafili tonu a Iehova? Ko e fakaatukehe mo e matematekelea kia he tau magafaoa tagata kua omoi a tautolu ke talahau e amaamanakiaga he Kautu ke he falu? (Fakatai 3:27) Ko e manako ke he fakafili tonu ka fakalagalaga a tautolu ke gahua makaukau he fakamatala atu.
2 Fakamatala mo e Nakai Fili Tagata: He fakapuloa e finagalo he Atua ke he tau tagata oti mo e nakai fili tagata, kua ‘taute e tautolu e fakafili tonu.’ (Mika 6:8) Kua lata ia tautolu ke totoko e tau hagahaga nakai mitaki katoatoa ke fakafili tuai e falu he fakave ke he ha lautolu a tau foliga. (Iako. 2:1-4, 9) Ko e ha Iehova a “finagalo ke fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:4) Ko e kupu moli he Atua kua fakatupu e tau hikihikiaga mamahaki ke he tau momoui he tau tagata. (Hepe. 4:12) He loto fakaaue ke he mena moli nei kua omoi a tautolu ke tutala ke he tau tagata mo e mauokafua, pihia mo lautolu kua nakai fakateliga he magaaho fakamua.
3 Taha e matakainaga fifine ne gahua he fale koloa ne matakutaku ha ko e foliga he tagata fakatau tumau i ai. Moha ia, he lata tonu e magaaho, ne lali a ia ke fakamatala ki a ia hagaao ke he Parataiso ne mavehe he Atua. Ne vagahau fakahamu a ia kua nakai talitonu a ia ke he tau tala fakatai ti ko ia ko e hipi (hippie) mo e ko e tagata kai tulaki. Ka e nakai fakalolelole e matakainaga fifine. Taha aho ne huhu a ia ke he matakainaga fifine hagaao ke he ulu hana ne leleva, ti fakamaama fakailoilo e ia e mena ne talahau he Tohi Tapu hagaao ki ai. (1 Kori. 11:14) He ofo fuluola hana, he aho hake ne hifi fakamea e ia e hafe mo e hifi fakakuku e ulu! Ne ole a ia ma e fakaako Tohi Tapu, nukua fiafia e matakainaga tane ke taute, ti holo atu ke he tukuleleaga mo e papatisoaga. Tuga e tagata tane nei, tokologa ne fekafekau ki a Iehova he vaha nei kua loto fakaaue ma e tau laliaga tumau mo e nakai fili tagata ha lautolu ne tamai ki a lautolu e fekau he Kautu.
4 To nakai leva ti utakehe e Iehova e nakai tututonu mai he lalolagi. (2 Pete. 3:10, 13) He vala magaaho ne toe, kia fifitaki e tautolu e fakafili tonu a Iehova he foaki e magaaho ki a lautolu ke hao he moumouaga he lalolagi nakai tututonu ha Satani hane hoko mai.—1 Ioane 2:17.