Fakakite e Fiafia Fakatagata—He Hūhū e Tau Hūhū mo e Fanogonogo
1 Tokologa e tagata ne olioli he talahau e tau onoonoaga ha lautolu ka e nakai manako ke he tomatoma po ke fakatonu. Ko e tau fekafekau Kerisiano, mogoia, kua lata ia tautolu ke ako e puhala he taaki mai e tau tagata ke he tau hūhū.—Fakatai 20:5.
2 Kua lata e tau hūhū ha tautolu ke fakalagalaga, nakai fakamā. Ka fakamatala mai he taha fale ke he taha fale, taha e matakainaga taane ne hūhū, “Logona hifo nakai e koe to ha ha i ai e magaaho ka fakalilifu he tau tagata e falu?” Falanaki ke he tali, ne matutaki e ia, “Ko e heigoa e manatu hau ke he mena kua lata ke taute aki e mena nei?” po ke “Ko e ha ne logona pihia a koe?” He fakamatala nakai mautauteute mo e he tau matakavi tolo, ne hūhū foki taha matakainaga taane ki a lautolu ne fai fanau, “Ko e heigoa ne olioli lahi a koe he eke mo matua?” Ti hūhū a ia, “Ko e heigoa e tau kapaletū lalahi haau?” Mailoga ko e tau hūhū nei kua fakaatā e tau tagata ke talahau e tau onoonoaga ha lautolu ka e nakai fakamā a lautolu. Ha kua kehekehe e tau tutuaga, kua liga lata ia tautolu ke hikihiki e mataulu tala mo e puhala he tau hūhū ha tautolu ke felauaki mo lautolu he fonua ha tautolu.
3 Futiaki e Tau Tagata: Ka makai e tau tagata ke talahau e tau manatu ha lautolu, fanogonogo fakatekiteki ka e nakai fakatauhele. (Iako. 1:19) Fakatautonu fakamitaki e tau talahauaga ha lautolu. (Kolo. 4:6) Liga pehē a koe: “Ko e fuluola ha ia. Fakaaue he talahau mai e mena ia ki a au.” Nava ki a lautolu ka taute fakamoli e koe. Hūhū totonu atu ke he falu hūhū ke moua e tau mena ne manamanatu a lautolu mo e kakano ne logona pihia a lautolu ki ai. Kumi e tau mena ne fetataiaki e iloaaga. Ka manako a koe ke hagaaki e onoonoaga ha lautolu ke he kupu tohi, liga pehē a koe, “Kua manamanatu nakai a koe kua maeke e mena nei?” Aua neke pāpā maō po ke fakafetoko.—2 Timo. 2:24, 25.
4 Ko e puhala ne tali he falu e tau hūhū ha tautolu kua liga falanaki lahi ke he puhala fanogonogo ha tautolu. Mailoga he tau tagata ka fanogonogo moli a tautolu. Ne mailoga he leveki faifano, “Ka fakakite e koe e fakauka he fiafia ke fanogonogo ke he tau tagata, ha ha i ai e malolō ofoofogia ke futiaki ti ko e fakakiteaga homo ue atu he fiafia fakatagata mafanatia.” He fanogonogo ke he falu kua foaki ki a lautolu e lilifu, ti liga omoi a lautolu ke fanogonogo ke he tala mitaki ne tutuli a tautolu ke talahau.—Roma 12:10.