‘Talahau Atu e Kupu he Atua mo e Nakai Matakutaku’
1 Kua fakauaua ka koe ke tutala hagaao ke he tua haau ka fai magaaho he aoga po ke he gahuaaga? Uka kia ke fakamatala nakai mautali a koe ke he tau magafaoa mo e tau katofia po ke tau tagata ne nakai iloa e koe? Ko e heigoa ka lagomatai a tautolu oti ke fakaaoga e tau magaaho kua latatonu ke ‘talahau atu e kupu he Atua mo e nakai matakutaku’?—Filipi 1:14.
2 Ua Maimainā: To maimainā kia a koe ke lalago e kapitiga po ke magafaoa tata ne kua tukupau fakavai? Ko Iehova, ko e Kapitiga tata lahi mahaki ha tautolu, ne talahau fakakeukeu ki ai he fakamauaga tala. Ha ha ia tautolu e kotofaaga ue atu ke fakamatala ke lata mo e ha tautolu a Atua ne mua! (Isaia 43:10-12) Ko e fakaalofa hokulo ki a Iehova ka lagomatai a tautolu ke fehagai mo e tau logonaaga fakauaua po ke hopoate ti maeke ke omoi a tautolu ke vagahau, nakai maimainā ke fakamatala fakamalolō ke he kupu mooli.—Gahua 4:26, 29, 31.
3 Manatu ko e fekau ha tautolu ko e tala mitaki. To tamai e tau aoga tukulagi ki a lautolu ne omaoma ki ai. He hagaaki ke he uho he gahua fakamatala, ka e nakai ki a tautolu po ke tau tagata totoko ha tautolu, ka lagomatai a tautolu ke fakamatala fakamalolō.
4 Tau Fifitakiaga he Falu: Moua e tautolu e malolō mai he puhala fakamooli he falu ne talahau e kupu he Atua mo e nakai matakutaku. Ma e fakatai, ne fakailoa fakamalolō e Enoka e fakafiliaga ha Iehova ke he tau tagata agahala nakai mahani Atua. (Iuta 14, 15) Ne fakamatala tua fakamooli a Noa ke he tau tagata nakai mahalohalo. (Mata. 24:37-39) Ko e tau Kerisiano he senetenari fakamua ne ‘nakai ako mo e goagoa’ kua fakatumau ke fakamatala pete e totokoaga vevela. (Gahua 4:13, 18-20) Kua ha ha he Watchtower mo e Awake! e tau tala mooli he vahā foou nei ha lautolu kua fakagahua e tua ki a Iehova ne kautū mai he matakutaku tagata ti eke mo tau tagata fakamatala makai.
5 Kia fakamalolō a tautolu he manamanatu ke he puhala moui he tau fekafekau tua fakamooli i tuai ne fehagai mo e tau tutūaga uka. (1 Patu. 19:2, 3; Mare. 14:66-71) Kua “fakamalolo a [l]autolu ha ko e Atua ha tautolu” ati vagahau mo e nakai matakutaku. Ti pihia foki a tautolu!—1 Tesa. 2:2.