Veveheaga 21

I Loto he Sunako he Maaga ha Iesu

NE NAKAI fai fakauaua e lutu he fiafia i Nasareta ke he magaaho ne liu mai a Iesu ki kaina. Fakamua to fano a ia ke papatiso e Ioane he taha e tau mo e vala fakamua, ne talahaua a Iesu ko e tagata kamuta. Ka ko e magaaho nei kua talahaua a ia ko e tagata taute mana. Kua amaamanaki lahi a lautolu he hana maaga ke kitia a ia he taute falu he tau gahua ofoofogia ki a lautolu.

Ne lahi e amaamanakiaga ha lautolu he fano a Iesu, ke he sunako he maaga ke tuga he aga mau a ia ki ai. Ke he tapuakiaga, ne tu hake a ia ke totou, ti ko e tohi vakai he perofeta ko Isaia ne foaki age ki a ia. Ne moua e ia e kupu ne talahau a Ia ne fakauku he agaga ha Iehova ne toka he Tohi Tapu ha tautolu he vaha nei he Isa veveheaga 61.

He mole e totou hagaao ki a Ia ka fakamatala e fakahaoaga ma lautolu ne lili, liu fakaala e tau mata ha lautolu ne pouli, mo e hagaao ke he tau mafola ha Iehova, ne liuaki e Iesu e tohi vakai ke he fekafekau mo e nofo hifo. Ko e tau mata oti ne onoono fakatonutonu ki a ia. Ko e magaaho ne liga vagahau fakaloaloa a ia ke fakamaama: “Ko e aho nai kua fakamoli ai e tohi nai he fanogonogo ki ai a mutolu.”

Ne nava e tau tagata ke he hana a “tau kupu fakaalofa” mo e fevagavagahauaki: “Ka e nakai kia ko e tama a Iosefa a enei?” Ne iloa e ia e manako ha lautolu ke kitia a ia ka taute e tau mana, ne matutaki a Iesu: “To talahau mai ni e mutolu e kupu fakatai nai kia au, Ko e ekekafo na e, kia fakamalolo a e koe a koe; ko e tau mena oti ne logona e mautolu kua eke e koe i Kapanaumi, kia eke a foki e koe i hinai ke he māga moli hāu.” Ko e moli, ko e tau katofia fakamua ha Iesu, ne manatu kua lata ke kamata e fakamaulu ke he maaga moli, ke monuina fakamua e tau tagata hana. Ne logona e lautolu e tiaki e Iesu a lautolu.

Ne mailoga ha lautolu a tau manamanatuaga, ne talahau e Iesu e fakamauaga tala tuai ne lata tonu. Ne tokologa e tau takape i Isaraela he vaha ia Elia, he mailoga e ia, ka e nakai fakafano a Elia ke he taha ia lautolu ia. Ne finatu ni a ia ke he takape nakai ko e Isaraela i Saitonu, ne taute e ia e mana fakahao moui. Mo e ko e vaha foki ia Elisaio, ne tokologa e tau lepela, ka e fakamea ni e Elisaio a Naamanu mai i Suria.

Ne ita lahi ke he tau tala fakatatai kelea nei mai he tau fakamauaga tala tuai kua fakakite ha lautolu a lotokai mo e nakai fai tua, ko lautolu he sunako ne mamatike mo e vega a Iesu ki tua he maaga. Ke he papati he mouga ne tu ai a Nasareta, ne lali a lautolu ke poka hifo a ia he kaukau. Ka e hola a Iesu mai he tau lima ha lautolu mo e hao mamao atu. Luka 4:16-30; 1 Tau Patuiki 17:​8-16; 2 Tau Patuiki 5:​8-14.

▪ Ko e ha ne lutu he fiafia a Nasareta?

▪ Ko e heigoa e tau manatu he tau tagata ke he fakamatalaaga ha Iesu, ka ko e heigoa ne fakaita aki a lautolu?

▪ Ko e heigoa he tau tagata ne lali ke taute ki a Iesu?