Veveheaga 30

Tali Hana ke he Tau Tagata Hokotaki

KO E magaaho ne hokotaki he tau takitaki lotu Iutaia a Iesu he moumou e Sapati, ne tali a ia: “Kua gahua haku a Matua kua hoko mai ni ke he aho nei, ha ne gahua foki au.”

Pete ni e hokotaki he tau Farasaio, ka ko e gahua ha Iesu, nakai ko e tau gahua ne pa he fakatufono he Sapati. Ko e hana fakamatala mo e fakamalolo ko e gahua mai he Atua, mo e ko e fakafifitakiaga he Atua, kua matutaki tumau a ia ke gahua he tau aho oti. Ka e taha e mena, ko e tali hana kua une ki mua e ita he tau Iutaia mai he magaaho fakamua, mo e kumi ke kelipopo a ia. Ko e ha?

Ko e kakano, ko e magaaho nei, nakai ko e talitonu ni a lautolu kua moumou e Iesu e Sapati ka e manamanatu foki a lautolu ke he talahauaga hana ko e Tama he Atua ko e kupu kelea. Ka e taha e mena, ne nakai matakutaku a Iesu mo e tala age ki a lautolu foki hana a matutakiaga mitaki mo e Atua. “Ha ko e mena fakaalofa mai e Matua ke he Tama,” he talahau e ia, “kua fakakite mai foki kia ia e tau mena oti kana ne eke e ia.”

“Ha ko e mena, ke tuga e fakamatike mo e fakamomoui he Matua a lautolu kua mamate,” he matutaki e Iesu, “ke pihia foki e Tama kua fakamomoui foki e ia a lautolu kua loto a ia ki ai.” Ko e moli, kua fita e Tama he fakamomoui a lautolu he mamate ke he puhala fakaagaga! “Ko ia ne fanogonogo mai ke he haku a tau kupu, mo e tua kia ia ne fakafano mai au,” he talahau e Iesu, “kua hoko a ia ke he moui, mai he mate.” E, he matutaki e ia: “To hoko ke he aho, kua hoko nai foki ki ai, ke logona ai e lautolu ne mamate e leo he Tama he Atua; ko lautolu foki ke logona ai to momoui ai a lautolu.”

Pete ni he nakai la fai fakamauaga ia kua fakaliu tu mai e Iesu e taha he mate, ne tala age a ia ke he hana a tau tagata hokotaki to ha ha i ai moli e liliu tutu mai he mamate. “Aua neke ofo a mutolu he mena ia,” he talahau e ia, “ha ko e mena hoko ke he aho ke logona ai ke he hana leo a lautolu katoa ha he tau tukuaga he tau fakamanatuaga, mo e o mai ai.”

Ke hoko mai ke he magaaho ia, ko e moli ne nakai la fakamaama e Iesu ke he tau tagata e hana a kotofaaga aoga mahino mo e maama he finagalo he Atua. Ka ko e tau tagata hokotaki ha Iesu ne loga e tau fakamoli fakalataha mo ia hagaao ia ke he tau mena nei. “Ne fakafano atu e mutolu e falu kia Ioane,” he fakamanatu age e Iesu “ti kua talahau tuai e ia ke he mena moli.”

Ko e ua tau fakamua, ko Ioane ko e Papatiso ne tala age ke he tau takitaki lotu Iutaia nei hagaao ki a Ia ka mui mai ia ia. Ne fakamanatu age ki a lautolu e fakatokolugaaga ha lautolu fakamua ki a Ioane ne kua tuku mogonei ke he fale puipui, ne pehe a Iesu: “Ne loto foki a mutolu ke he taha magaaho ke fiafia ke he hana maama.” Ne fakamanatu e Iesu e mena nei ki a lautolu mo e amaamanakiaga ke lagomatai, e, ke fakamomoui a lautolu. Ka e nakai falanaki a ia ke he gahua fakamoli ha Ioane.

“Ko e tau gahua ia ha ne eke e au, [fakalataha mo e mana ne taute la ia e ia] kua talahau ia kia au, ne fakafano mai au he Matua.” Nakai ko e mena ia ni hokoia, he matutaki e Iesu: “Ko e Matua foki ne fakafano mai au, ko ia ni kua talahau a au.” Ne talahau fakamoli he Atua a Iesu, tuga he hana papatisoaga, ne pehe: “Ko e haku a Tama fakahele hanā.”

Ko e moli, ko e tau tagata ne hokotaki a Iesu ne nakai fai kakano he tiaki a ia. Ko e tau Tohiaga Tapu ne talahau e lautolu ko e kumi a lautolu ki ai ne fakamoli hagaao ki a ia! “Ha ko e mena ane mai talia e mutolu a Mose, po kua talia mai e mutolu au,” ti fakaoti e Iesu, “ha ko e mena tohi e ia kia au. Kaeke kua nakai talia e mutolu hana a tau tohi, po ke talia fefe e mutolu haku a tau kupu?” Ioane 5:​17- 47; 1:​19-27; Mataio 3:17.

▪ Ko e ha e gahua ha Iesu ne nakai ko e moumou he Sapati?

▪ Fakamaama fefe e Iesu e hana a kotofaaga aoga lahi ke he finagalo he Atua?

▪ Ke fakamoli ko ia ko e Tama he Atua, ko hai e tau fakamoli ne tuhi a Iesu ki ai?