Veveheaga 33

Fakamoliaga he Perofetaaga ha Isaia

HE MOLE he iloa e Iesu e kolo he tau Farasaio mo e matakau fakatufono ha Herota ke kelipopo a ia, ko ia mo e hana a tau tutaki ne o atu ke he Tahi i Kalilaia. Ha ha hinai e tau tagata tokologa mai i Palesetaina oti, mo lautolu i fafo he hana a tau katofia, ne tolo mai ki a ia. Ne tokologa ne fakamalolo e ia, ti ko e mena ne tupu ko lautolu mo e tau gagao ne tautaomi mai ke piki atu ki a ia.

Ha kua tokologa lahi e tau tagata, ne tala age a Iesu ke he hana tau tutaki ke fai foulua tumau ke mautali ki a ia. He maeke ke fano kehe a ia mai he mataafaga, kua nakai tautaomi mai e moto tagata ki a ia. Maeke ia ia ke fakaako a lautolu mai he foulua po ke fano ke he taha matakavi foki he mataafaga ke lagomatai a lautolu i ai.

Ne mailoga he tutaki ko Mataio kua fakamoli he tau gahua ha Iesu e “kupu he perofeta ko Isaia.” Ne fatiaki mai e Mataio e perofetaaga ne fakamoli e Iesu:

“Kitiala, ko e haku a fekafekau kua fifili e au; ko e haku a fakahele kua fiafia ki ai haku a loto; to tuku atu e au haku agaga ki luga ia ia, to fakakite atu e ia e fakafiliaga ke he tau motu kehe. Nakai fetoko a ia, ti nakai hea foki a ia; nakai logona foki e taha hana leo ke he tau puhala; Nakai papaki e ia e kaho kua maihiihi, nakai tamate foki e ia e vavae ne puho tote; ato fakakautu e ia e fakafiliaga. Ko e hana higoa foki ke amaamanaki ai e tau motu kehe.”

Ko e moli, ko Iesu, ko e fekafekau fakahele ne fiafia e Atua ki ai. Ne fakamaama fakamitaki e Iesu e fakafili tonu, ne fakapulefu he tau kupu toka tuai fakalotu. Ha ko e ha lautolu a fakagahuaaga nakai tonu he fakatufono he Atua, ko e tau Farasaio to nakai lagomatai e tagata gagao he Sapati! Ha kua fakamaama e ia e fakafili tonu he Atua, ne fakaokioki e Iesu e tau tagata mai he kavega he tau aga tuai kua nakai tonu, ti ko e mena ia, ne lali e tau takitaki lotu ke kelipopo a ia.

Ko e heigoa e kakano he ‘nakai fetoko a ia, nakai logona foki he taha hana leo ke he tau puhala’? He magaaho ne fakamalolo e ia e tau tagata, ne ‘hataki e Iesu a lautolu neke talahau fakapuloa a ia.’ Ne nakai manako a ia ke fakapuloa fakahoha a ia he tau puhala po ke tau hokotaki fakakeukeu mai he taha ke he taha.

Ko e taha mena foki, ne uta e Iesu hana fekau mafanatia ke he tau tagata ne fakatai ko e kaho kua maihiihi, maloku mo e taholi. Ko lautolu kua tuga e vavae ne puho tote kua mena noa e kikila, kua toe tote ke mate. Ne nakai papaki e Iesu e kaho kua maihiihi, po ke tamate e ia e vavae ne lupalupa mo e ahua. Ka ko e fakaalofa hofihofi ne lagaki hake e ia a lautolu ne mahani molu. Ko e moli, ko Iesu ni ke amaamanaki ki ai e tau motu! Mataio 12:​15-21; Mareko 3:​7-12; Isaia 42:​1-4.

▪ Fakamaama fefe e Iesu e fakafiliaga tonu, nakai fetoko po ke logona foki he taha hana leo ke he tau puhala?

▪ Ko hai ne tuga e kaho kua maihiihi mo e vavae ne puho tote, mo e taute fefe e Iesu a lautolu?