Veveheaga 55

Tokologa e Tau Tutaki ne Tiaki e Muitua ki a Iesu

HANE fa e fakaako a Iesu he sunako i Kapanaumi hagaao ke he hana a vala ko e areto moli mai he lagi. Ko e hana a lauga ko e fakalaulahiaga he fakatutalaaga ne kamata mo e tau tagata ne moua a ia he ha lautolu a liliu mai he fahi uta he Tahi i Kalilaia, ne kua fita a lautolu he kai e tau areto mo e tau ika ne moua mai fakamana.

Ne matutaki e Iesu hana a vagahau pehe: “Ko e areto foki ke atu e au, ko e hoku tino haia, ke atu e au mo moui he lalolagi.” Ko e ua tau fakamua, he vaha tau tupu he 30 V.N., ne tala age e Iesu ki a Nikotemo e fakaalofa hofihofi he Atua ke he lalolagi ti foaki mai e ia hana Tama ko e Fakamoui. Ti ko e mena ia, ati fakakite ai e Iesu he magaaho nei ko e ha tagata mai he lalolagi ka kai hana a tino ko e mena fakatai, ha ko e tua ke he hana lukutoto to taute mafiti e ia, ke moua e moui tukulagi.

Ka e taha e mena, ne tupetupe e tau tagata ha ko e tau kupu ha Iesu. “Ke maeke fefe he tagata nai ke ta mai hana tino kia tautolu ke kai ai?” he huhu e lautolu. Ne manako a Iesu ke maama he hana tau tagata fanogonogo, ko e kai kehe hana tino ko e mena fakatai. Ke peehi e mena nei, ne talahau e ia e taha mena, ne une ki mua e totoko kaeke kua nakai maama ha ko e mena fakatai.

“Kaeke kua nakai kai e mutolu e tino he Tama he tagata, ti nakai inu foki hana toto,” he talahau e Iesu, “nakai ha i loto ia mutolu e moui. Ko ia ne kai hoku tino, mo e inu hoku toto, ha ha ia ia e moui tukulagi; to fakatu foki e au a ia ke he aho fakamuiaki; ha ko e hoku tino ko e mena kai moli haia, ko e hoku toto foki ko e mena inu moli haia. Ko ia ke kai hoku tino, mo e inu hoku toto, to tumau a ia kia au, ko au foki kia ia.”

Ko e moli, kelea lahi e fakaakoaga ha Iesu kaeke ko e talahau a ia ke kai tagata moli. Ka e taha e mena, nakai ko e talahau a Iesu ke kai moli e tino mo e inu e toto. Ko e peehi mai a ia, ko lautolu oti ka moua e moui tukulagi kua lata ke tua ke he lukutoto ka taute e ia he magaaho ka poa e ia hana tino mitaki katoatoa mo e liligi foki hana toto he moui. Ka e taha e mena, tokologa foki hana tau tutaki ne nakai lali ke maama hana fakaakoaga ati totoko ai: “Ko e kupu uka a ena; to maeke ia hai ke fanogonogo ki ai.”

Ne fioia e Iesu kua tokologa hana tau tutaki ne loma, ati pehe a Iesu: “Kua tupetupe kia a mutolu ke he mena ia? Po ke fefe ka kikite atu a mutolu ke he Tama he tagata, ha ne hake a ia ke he mena ne nofo ai i tuai. . . . ko e tau kupu kua tala atu e au kia mutolu, ko e agaga ia, ko e moui foki ia. Ka ko e falu ni ha mutolu nakai talia.”

Ne matutaki a Iesu: “Ko e mena ia ne tala atu ai e au kia mutolu, nakai maeke ia taha ke hau kia au, ka nakai foaki kia ia he haku a Matua.” Ko e mena ia ne tokologa hana tau tutaki ne o kehe mo e nakai mumui ki a ia. Ko e mena ia ne fuluhi a Iesu ke he hana a tau aposetolo 12 mo e huhu: “Po ke fia o kehe foki a mutolu?”

Ne tali a Peteru: “Ko e Iki na e, ke o kia a mautolu kia hai? Ha ha ia koe e tau kupu he moui tukulagi. Kua talia e mautolu, mo e iloa tuai e mautolu ko koe ko e Keriso, ko e Tama he Atua moui.” Ko e mitaki ha ia he talahauaga he fakamoli, pete ni ko Peteru mo e falu he tau aposetolo foki ne liga nakai katoatoa e maamaaga he fakaakoaga ha Iesu hagaao ke he mena nei!

Pete ni he fiafia ke he tali ha Peteru, ne kitia e Iesu: “Nakai kia ko e mena fifili e au a mutolu ne tokohogofulu ma ua? Ka ko e taha ia mutolu ko e tiapolo a ia.” He kua vagahau a ia hagaao ki a Iuta Isakariota. Liga ko e magaaho tonu ia ne mailoga e Iesu ki a Iuta e “kamataaga,” po ke hauaga, he puhala hepe.

Ne fakamomoko e Iesu e tau tagata he totoko e ia ha lautolu a lali ke taute a ia mo patuiki, ti liga fakakakano a lautolu, ‘Maeke fefe ke pehe ko e Mesia a nei ka e nakai uta e ia e tuaga tonuhia kia ia?’ Ko e mena nei foki, mata agaia ke he tau loto he tau tagata. Ioane 6:​51-71; 3:16.

▪ Ko hai ne foaki ki ai e Iesu hana tino, mo e ‘kai fefe e lautolu hana tino’?

▪ Ko e heigoa foki falu kupu ha Iesu ne fakaofo aki e tau tagata, ka ko e heigoa hana ne peehi ke maama?

▪ Ko e magaaho ne tokologa ne tiaki ke mumui ki a Iesu, ko e heigoa e tali ha Peteru?