Veveheaga 62

Ko e Fakaakoaga he Mahani Fakatokolalo

MOLE e fakamalolo he tama tane hu temoni he matakavi ne tata ki Kaisaria Filipi, ne manako a Iesu ke liu ki kaina i Kapanaumi. Ka e taha e mena, ne manako a ia ke fakalataha mo e hana a tau tutaki hoko lautolu ni ke he fenoga, ke maeke ia ia ke tauteute a lautolu ma e hana a mate mo e ha lautolu a tau gahua ka mole atu a ia. “Kua tuku atu e Tama he tagata ke he tau lima he tau tagata,” he fakamaama age e ia, “to kelipopo foki e lautolu a ia; ka oti he keli a ia, ti liu foki tu a ia ke he aho tolu.”

Pete ni he vagahau e Iesu e mena nei fakamua, mo e toko tolu e aposetolo ne kitia mata e fakafaliuaga ke he magahala he hana ‘fano kehe’ ne fakatutala ki ai, ko e hana a tau tutaki ne nakai la maama hagaao ke he mena ia. Pete he nakai lali taha ha lautolu ke fakatikai hana a kelipopoaga tuga he talahau e Peteru fakamua, ne matakutaku a lautolu ke huhu fakalahi hagaao ke he mena ia.

Ne hohoko a lautolu ki Kapanaumi, tuga ko e matapatu kaina ke he feua fakamatala ha Iesu. Ko e maaga foki ha Peteru mo e falu foki he tau aposetolo. Ke he mena ia, ko e tau tagata ne oko e tau tukuhau he faituga ne o mai ki a Peteru. Liga ko e lali ke putoia a Iesu ke moumou e aga mo e mahani motu, he huhu a lautolu: “Nakai kia age he akoako ha mutolu e poa titarama [he faituga]?”

“Mena age,” he talahau e Peteru.

Ko Iesu, liga hoko atu la ia ki fale he magaaho ia ni, mo e mailoga e mena ne tupu. Ti pete ni he nakai la talahau e Peteru, ne huhu a Iesu: “Simona na e, kua manatu a koe ke ha? Kua talia telu mo e poa mai ia hai kia he tau patuiki he lalolagi? ko e fanau ha lautolu kia, po ke tau tagata kehe?”

“Ko e tau tagata kehe,” he tali e Peteru.

“Ko e mena ia ni kua tokanoa ai e fanau,” he mailoga e Iesu. Ha ko e Matua ha Iesu e Patuiki he lalolagi mo e lagi katoatoa, ko Ia ne tapuaki ki ai he faituga, ti nakai ko e fakatufono kua lata ma e Tama he Atua ke totogi e tukuhau he faituga. “Neke tupetupe foki a lautolu kia tautolu,” he talahau e Iesu, “kia fano a a koe ke he vai, ti liti ai taha matau; ko e ika fakamua ke moua e koe, kia toto a, mo e lei e koe hana gutu; ati moua ai e koe e satatara [fa e titarama]; kia uta e koe e mena ia mo e age kia lautolu ma taua.”

Ko e magaaho ne fakalataha e tau tutaki he hohoko a lautolu ki Kapanaumi, liga ko e fale ha Peteru, ne huhu a lautolu: “Kua mua a hai ia lautolu ha ha he kautu he lagi?” Ne iloa e Iesu e mena ne fakalagalaga aki e huhu ha lautolu, he mailoga e ia e tau mena ne tutupu ia lautolu he mumui ia ia he liliu mai a lautolu i Kaisaria Filipi. Ti huhu a ia: “Ko e ha ne taufetoko ai a mutolu ke he magahehala?” Fakama ai, kua fakanono e tau tutaki ha ko e mena taufetoko a lautolu ko hai ha lautolu ne mua atu.

Mole atu e tolu e tau tau he tau fakaakoaga ha Iesu, kua mataga lahi kia ke taufetoko pihia e tau tutaki? Moli, fakakite he mena nei e malolo he nakai mitaki katoatoa he tagata, pihia foki ni mo e tau feakiaga fakalotu. Ko e lotu Iutaia ne feaki hake e tau tutaki ne peehi lahi e tuaga po ke vahega ke he tau tauteaga mena oti. Ko e taha mena foki, liga ko Peteru, ha kua mavehe e Iesu e mouaaga ke he falu a “kei” pauaki ke he Kautu, nukua tokoluga e logonaaga. Ko Iakopo mo Ioane liga tatai foki e tau manamanatuaga ha kua fifili ke kitia mata e fakafaliuaga ha Iesu.

Ko e heigoa ni e mena ne tupu ne taute e Iesu e fakataiaga kehe lahi ha ko e lali ke fakahako he tau aga ha lautolu. Ne ui e ia e tama tote, fakatu a ia he uho ha lautolu, mo e nikiti e ia a ia ke he hana tau lima, mo e pehe: “Ka nakai mafoki a mutolu ti eke ni mo tau tama ikiiki, ti nakai ni huhu atu a mutolu ke he kautu he lagi. Hanai, ko ia ke fakatokolalo e ia a ia ke tuga e tama tote nai, to mua a ia ia lautolu ha ha he kautu he lagi. Ka talia e taha ha tama tote pehenai he haku a higoa, kua talia e ia au.”

Ko e mitaki ha ia he puhala ne fakahako aki hana a tau tutaki! Ne nakai ita a Iesu ki a lautolu mo e ui a lautolu ko e tau fakatokoluga, lotokai, mo e foli tuaga. Nakai, ka e fakatai e ia hana fakaakoaga fakatonutonu he fakaaoga e ia e fakatai ke he fanau ikiiki, ne mahani fakatokolalo mo e ataina mai he foli tuaga mo e nakai manamanatu ke he tau tutuaga ha lautolu. Ti fakakite e Iesu ko e hana a tau tutaki kua lata ke feaki e tau mahani pehenai ne mailoga e fakatokolalo he tau fanau ikiiki. Tuga ne fakahiku aki e Iesu: “Ha ko ia ne tote ue atu ia mutolu oti, to mua a ia ni.” Mataio 17:​22-27; 18:​1-5; Mareko 9:​30-37; Luka 9:​43-48.

▪ He liliu ki Kapanaumi, ko e heigoa e fakaakoaga ne liu a Iesu fatiaki, mo e talia fefe?

▪ Ko e ha ne nakai lata a Iesu ke totogi e tukuhau he faituga, ka ko e ha ne totogi ai e ia?

▪ Ko e heigoa ne fakatupu aki e taufetoko he tau tutaki, mo e fakahako fefe e Iesu a lautolu?