Veveheaga 50

Tauteuteaga ke Lata mo e Tau Favaleaga

MOLE atu e fakaako e ia hana tau aposetolo ke he tau puhala ke uta aki e gahua fakamatala, ne hataki a Iesu ki a lautolu hagaao ke he tau tagata totoko. Ne pehe a ia: “Kitiala, kua fakafano atu e au a mutolu tuga e tau mamoe ke he tau vaha loto he tau luko . . . A mutolu ni mo e tau tagata; ha ko e mena tuku atu e lautolu a mutolu ke he tau fono, mo e fahi e lautolu a mutolu ke he tau sunako ha lautolu. Ke takitaki atu foki a mutolu ki mua he tau iki mo e tau patuiki ha ko au ni.”

Pete ni he lahi e favale ka feleveia mo e hana tau tutaki, ne mavehe fakamalolo a Iesu: “Ka tuku atu e lautolu a mutolu, aua neke fakaatukehe a mutolu, po ke fefe, po ke heigoa foki ke tala atu ai e mutolu; ha ko e mena foaki mai kia mutolu ke he magaho ia ni e kupu ke tala age e mutolu. Ha ko e mena nakai ko mutolu kua vagahau atu, ka ko e agaga he Matua ha mutolu ke vagahau mai ai i loto ia mutolu.”

Ne matutaki a Iesu: “To tuku atu he matakainaga hana matakainaga kia mate, to tuku atu foki he matua hana tama; to tutu atu foki e fanau ke he tau matua ha lautolu, ti kelipopo e lautolu a lautolu.” Ne lafi atu foki e ia: “To fakavihia foki a mutolu he tau tagata oti ha ko e haku a higoa; ka ko ia ka tumau ato hoko ke he fakahikuaga, to fakamoui na ia.”

Ne matapatu aoga e gahua fakamatala. Ko e kakano nei ne peehi e Iesu e lata ke lotomatala ke tumau e ataina ke taute e gahua ia. “Ka favale a lautolu kia mutolu ke he taha māga, ti fehola a mutolu ke he taha,” he talahau e ia, “ha ko e moli ke tala atu e au kia mutolu, nakai kati e tau māga a Isaraela kia mutolu, ato hau e Tama he tagata.”

Ko e moli ne foaki mai e Iesu e tau fakaakoaga nei, hatakiaga, mo e tau fakamaloloaga ke he hana tau aposetolo 12, ka ko e kakano foki ma lautolu ka gahua fakalataha ke he fakamatalaaga he lalolagi katoa ka mole hana mate mo e liu tu mai. Ko e fakakite e mena nei ke he hana talahauaga ko e hana tau tutaki to ‘fakavihia ia he tau tagata oti,’ nakai ni ko e tau Isaraela hokoia ne fakafano e tau aposetolo ke fakamatala ki ai. Ko e taha mena foki, ne nakai takitaki atu ki mua he tau kovana mo e tau patuiki e tau aposetolo he magaaho ne fakafano e Iesu a lautolu ke he ha lautolu a gahua fakamatala ku. Ko e taha mena foki, ko lautolu ne talitonu ne nakai tuku atu ke mamate he tau magafaoa ha lautolu.

Ti ko e magaaho ne pehe a ia ko e hana tau tutaki to nakai katoa e takai he ha lautolu a fakamatala “ato hau e Tama he tagata,” ne talahau fakaperofeta mai e Iesu ki a tautolu ko e hana tau tutaki to nakai fakaoti e viko takai he lalolagi katoa e gahua fakamatala ke he Kautu he Atua ne kua fakatu ato hoko mai e Patuiki lilifu ko Iesu Keriso ko e fekafekau ha Iehova ke he kelipopoaga ia Amaketo.

Ne matutaki hana tau fakaakoaga ke he gahua fakamatala, ne pehe a Iesu: “Nakai mua e tutaki ke he akoako, nakai mua foki e fekafekau ke he hana iki.” Ti ko lautolu ne mumui ki a Iesu kua lata ke amaamanaki ke moua e ekefakakelea taha ia mo e favale tuga ne moua e ia ha ko e fakamatala ke he Kautu he Atua. Ka e taha e mena ne tomatoma e ia: “Aua foki neke matakutaku a mutolu kia lautolu ke kelipopo e tino, ka e nakai maeke ke kelipopo e solu; ka e mitaki ke matakutaku a mutolu kia ia kua maeke ke fakaoti e solu katoa mo e tino i Kehena.”

Ko Iesu ka taute e fakafifitakiaga he mena nei. To fakauka mo e nakai matakutaku a ia he mate mo e nakai moumou hana fakamoli ki a Ia ne ha ha i ai e malolo katoa, ko Iehova ko e Atua. E, ko Iehova ka utakehe e “solu” (kakano ke he mena nei ko e falanaki ne amaamanakiaga a anoiha ke he solu moui) po ke liu fakatu mai e tagata ke fiafia e moui tukulagi. Ko e fakaalofa hofihofi ha a ia he Matua ko Iehova he lagi!

Ne mui mai e fakamalolo ha Iesu ke he hana tau tutaki ke he fakataiaga ne fakamaama fakalahi mai e fakaalofa ha Iesu ki a lautolu. “Nakai kia fakafua ua e manu ikiiki ke he asari?” he huhu e ia. “Nakai to foki taha ia laua ke he kelekele ka noa mo e Matua ha mutolu. Ka kua oti kana he totou ha mutolu a tau lauulu. Ko e mena ia, ua matakutaku ai a mutolu; mena mua a mutolu ke he tau manu ikiiki loga.”

Ko e fekau ke he Kautu ne poaki e Iesu hana tau tutaki ke fakapuloa, to fakamavehevehe e tau magafaoa, he talia ai he falu i loto he magafaoa ka e tiaki ai he falu. “Aua neke manatu a mutolu kua hau au ke ta atu ai e mafola ke he lalolagi,” he talahau e ia. “Nakai hau au ke ta atu e mafola, ka ko e pelu.” Ko e mena ia, ke talia he taha he magafaoa e kupu moli he Tohi Tapu kua lata ni ke fakamalolo. “Ko e tagata ne lahi hana fakaalofa ke he hana matua tane po ke hana matua fifine, ka e fakatote mai kia au, nakai aoga a ia kia au,” he kitia e Iesu, “ko ia foki kua lahi hana fakaalofa ke he hana tama tane po ke hana tama fifine, ka e fakatote mai kia au, nakai aoga a ia kia au.”

Ke he fakahikuaga he hana tau fakaakoaga, ne fakamaama e Iesu ko lautolu ne talia hana tau tutaki ne talia foki a ia. “Ko ia foki ka age taha kapiniu he magavai momoko hokoia ke inu he taha ia lautolu nai kua fakateaga ke he higoa he tutaki; ko e moli, ke tala atu e au kia mutolu, nakai moumou hana taui.” Mataio 10:​16-42.

▪ Ko e heigoa e tau hatakiaga ne foaki e Iesu ke he hana tau tutaki?

▪ Ko e heigoa e tau fakamaloloaga mo e tau fakamafanaaga ne foaki age e ia ki a lautolu?

▪ Ko e ha e tau fakaakoaga ha Iesu ne hagaao foki ke he tau Kerisiano he vaha fou nei?

▪ Ko e heigoa e puhala ne nakai tokoluga hake e tutaki ha Iesu ke he hana akoako?