Ko e Kumiaga ke he Tau Tali

“He iloa e tali ke he ‘puhala’ ke leveki he tagata a ia, ti kua takele a tautolu he tau koloa ne nakai fa mahani ke olioli ki ai—ko e matini fakahauhau, tau CD tagi mitaki, mo e tau fua lakau ne moua he tau katoa—ati taute a tautolu ke manamanatu ke he ‘kakano’ ne momoui a tautolu. Ko e ha ne fakamakamaka ke he moui fakatepetepe nei? Ko e heigoa e kakano?”—David G. Myers ko e porofesa he manamanatuaga he Hope College, Holland, Michigan, U.S.A.

TO TALI fēfē e koe e tau hūhū ne talahau he porofesa nei? Liga manamanatu e falu po kua aoga nakai he fakaaoga taha magaaho ke kumi e tau tali. Ka lali ke fakaheu e tau hūhū pihia kua tuga ke fakaheu e tega maka i loto he sevae haau—na maeke agaia a koe ke fano he fenoga haau, ka ko e fenoga nakai fiafia.

Kaeke kua manamanatu a koe na fai kakano foki kia e moui, kua nakai ko koe ni ne pihia. Hagaao ke he World Values Survey (Kumikumi ke he Tau Mena Aoga he Lalolagi), ko e taha kumikumiaga lahi ne taute foou nei ke he tau mena kua aoga ke he tagata, kua tokologa fakahaga e tagata he tau motu loga ne manamanatu ke he “hagaaoaga mo e kakano he moui.”

Ka manako a koe ke moua e mafola mooli he loto, kua lata ia koe ke kumi e tau tali ke he tolu e hūhū aoga lahi mahaki.

O mai i fe a tautolu?

Ko e heigoa e kakano he moui?

Ko e heigoa kua fakatoka ma e vahā anoiha?

Moua e koe i fe e tau tali mauokafua ke he tau hūhū nei? He nakai talahau fuafua manatu po ke he iloilo fakatagata, to fakakite mai he tau lau tohi i mua e tau tali ne moua i loto he Kupu he Atua, ko e Tohi Tapu. Kua uiina e mautolu a koe ke hafagi e Tohi Tapu haau ti kumi e koe e tau talahauaga i ai.