“Lagomatai Ai Au ke Hokotia ke he Tau Loto he Tau Tagata”
KO E taone he kautahi ko Porto Alegre, he faahi toga ha Parasili, ne fakahoko i ai he taha mogo e fonoaga he lalolagi katoa hagaao ke he tau matakupu he kaufakalatahaaga. Totou hogofulu afe e tau tagata mai he 135 e motu ne fakalataha atu ke he fonoaga. He okioki fakakū, ko e matakau he Tau Fakamoli mai he fakapotopotoaga i Porto Alegre ne o atu ke he tokologa e tagata he fonoaga ke fakamatala ki a lautolu e fekau he Kautu i loto he Tohi Tapu. Matutaki fēfē a lautolu?
“Fakaaoga e mautolu e tohi tote Good News for People of All Nations,” he talahau e Elizabete, ko e paionia. Ne lafi e ia: “Tokologa e tagata he fonoaga ne nakaila logona e tala mitaki ke he Kautu, ka e talia fiafia e lautolu e fekau ha mautolu. Ne tutala a mautolu ke he tau tagata mai i Initia, Isaraela, Falani, Polivia, Nigeria, mo Saina. Ma e falu ia lautolu, kua fai tohi faka-Tohi Tapu a mautolu ke he vagahau ha lautolu, ne talia fiafia e lautolu.”
I Mesikō, ne fakaaoga foki he paionia ne higoa ko Raúl e tohi tote nei ti mitaki e tau fua ne moua. Fai magaaho kua mole, ne fina atu a ia ke he tagata taane Arapi kua 80 e tau he moui ne mate laia e hoana haana. He mole e totou he tagata e lau he tohi tote ne tutala ke he fekau he Kautu ke he vagahau Arapi, ne hihina e tau mata haana he fiafia. Ko e ha? Ko e maveheaga he Atua to nakai tuai fai mate, he talahau ia Fakakiteaga 21:3, 4, ne aamotia lahi ki a ia he totou e ia ke he vagahau motu haana. Taha mogo foki, he fakamatala a Raúl he magaaho noa ne feleveia a ia mo e tagata taane vagahau Potukala. Ne mate foki e fakahele he tagata ia—ko e tama taane haana. Ne toka e Raúl a ia ke totou e lau mai he tohi tote ke he vagahau Potukala. He mole e totou, ne fakakite he tagata kua manako a ia ke iloa lahi hagaao ke he Tohi Tapu ti talia e ia e fakaako Tohi Tapu.
Ne fakaaoga e Raúl e Good News for People of All Nations ke fakamatala ki a lautolu ne vagahau Amenia, Falani, Hinitī, Korea, Mixe, Peritania, Peresia, Rusia, Saina, Sihamani, mo e Zapotec. Pehē a ia: “Kitia e au e aoga lahi ke fakaaoga e kanavaakau nei he gahua haaku he fonua. Kua lagomatai au ke hokotia ke he tau loto he tau tagata pete he nakai iloa e au e vagahau ha lautolu.”
Ha kua tokologa atu e tau tagata ne o fenoga mo e nonofo he tau motu kehe, to lahi e magaaho ha tautolu ke feleveia mo lautolu ne vagahau kehe. To maeke ia tautolu ke tutala mo lautolu ke he fekau he Kautu he fakaaoga e tohi tote Good News for People of All Nations. Fai lagaki nakai a koe ne uta mo koe?
[Tau Fakatino he lau 32]
Raúl mo e tohi tote ne lagomatai a ia ke hokotia ke he tau loto he tau tagata