Matutaki mo e Takaiaga Fakaagaaga
KUA age he Atua Malolō Ue Atu e falu kotofaaga pauaki ke he falu mena momoui fakaagaaga. Ma e fakatai, ne tuku age e ia e pule ke he lalolagi ki a Iesu Keriso, ti kotofa e ia e tau agelu fakamooli ke lagomatai ke takitaki e fakamatala atu he tala mitaki. (Fakakiteaga 14:6) Ka kua kehe e tau liogi. Ne nakai tuku age e ia e fanogonogo ke he tau liogi. Kua tonuhia ke tuku atu e tau liogi ha tautolu ke he Atua hokoia ni.
Ko Iehova ko e “[F]anogonogo liogi.” (Salamo 65:2) Kua fanogonogo a ia ke he tau liogi ha tautolu ti tali ai e ia. Hagaao ke he liogi, ne tohi he aposetolo ko Ioane ke he tau fekafekau fakahele ha Iehova: “Kaeke ke ole atu ai e tautolu ha mena ke lata mo e hana finagalo, ti fanogonogo mai [e Atua] kia tautolu. Kaeke foki kua iloa e tautolu kua fanogonogo mai a ia kia tautolu ke he tau mena oti ka ole atu ai, kua iloa e tautolu kua moua e tautolu e tau mena kua ole atu ai a tautolu kia ia.”—1 Ioane 5:14, 15.
Nakai manako e tau agelu fakamooli ke ui atu po ke liogi a tautolu ki a lautolu. Kua maama mo e lalago e lautolu e fakatokaaga he Atua ma e liogi, ne lauia fakahako ai a lautolu he falu magaaho. Ke he puhala fe? He magaaho ne liogi e perofeta ko Tanielu ki a Iehova hagaao ke he moumouaga ha Ierusalema, ne tali he Atua e liogi ha Tanielu he fakafano age e agelu ko Kaperielu mo e fekau atihake.—Tanielu 9:3, 20-22.
Tau Fekau Mai he Tau Tagata Mamate?
Lata nakai ia tautolu ke lali ke matutaki mo lautolu ne mamate? Loga e tala ke he tau tagata ne talahau kua liga tutala mo e tau agaaga he tau tagata mamate. Ma e fakatai, ko e fifine i Ailani ne fakafeleveia atu e agaaga hulalo ti pehē kua tutala a ia mo Fred he po fakamua, ko e taane he fifine ia. Ka kua mate a Fred he falu faahi tapu fakamua atu. Ne matutaki atu e agaaga hulalo ke fakakite e tau mena ne talahau e “Fred” ko e tau mena ne talitonu e hoana ko ia ni ne iloa. Nukua mukamuka ha ia ma e hoana ke pehē kua moui a Fred he lalolagi fakaagaaga ti kua lali ke matutaki mo ia he puhala mai he agaaga hulalo. Ka ko e fakahikuaga ia kua fekehekeheaki mo e talahauaga maaliali he Tohi Tapu hagaao ke he tuaga he tau tagata mamate.—Kikite e puha i lalo.
Maeke fēfē mogoia ke fakamaama e tau tala pehēnei? Taha puhala fakavaia ne fakaaoga he tau temoni ko e fifitaki e aga he tagata mate, ke he tala nei, ko Fred. Ko e fakafualoto? Ke fuluhi kehe e tau tagata mai he tau fakaakoaga he Tohi Tapu mo e ke fakalolelole e tua mo e falanaki ki a Iehova. Nakai fakauaua ai, kua fakahehē e Satani mo e tau temoni e tau tagata “ke he malolo oti, mo e tau fakamailoga, mo e tau mana pikopiko, mo e tau mena fakahehe oti he mahani kelea kia lautolu kua malaia.”—2 Tesalonia 2:9, 10.
Ke pihia, na ha ha i ai e tau taulatua mo lautolu ne fakalataha mo lautolu ne talitonu mooli kua matutaki a lautolu mo e tau tagata mamate. Ka ko e mena mooli, kaeke kua matutaki a lautolu mo e ha mena fakaagaaga, kua matutaki a lautolu mo e tau agaaga ne totoko ki a Iehova. Pihia foki, kua ha ha ai a lautolu ne talitonu kua tapuaki a lautolu ke he Atua ka kua hehē ai. Ne omoomoi e aposetolo ko Paulo ke tohi e hatakiaga malolō nei: “Ko e tau mena kua keli mo poa he tau motu kehe, kua keli mo poa ai e lautolu ke he tau temoni, ka e nakai ke he Atua.”—1 Korinito 10:20, 21.
He iloa na maeke a tautolu ke liogi ki a Ia kua Mua Ue Atu ne ofania mo e leveki a tautolu, ko e ha mogoia kua manako a tautolu ke liogi ke he ha mena fakaagaaga foki? Ka mole ia, kua foaki mai he Tohi Tapu e fakamafanaaga nei: “Ko e tau fofoga a Iehova kua o tafeliuaki ai ke he lalolagi oti, ke lagomatai kia lautolu kua katoatoa ha lautolu a tau loto kia ia.”—2 Nofoaga he Tau Patuiki 16:9.
[Blurb he lau 9]
He iloa na maeke a tautolu ke liogi ki a Ia kua Mua Ue Atu ne ofania mo e leveki a tautolu, ko e ha mogoia kua manako a tautolu ke liogi ke he ha mena fakaagaaga foki?
[Puha/Fakatino he lau 8]
Mooli mo e Nakai Mooli
MOOLI: NA FAI SATANI
“Ko Satani ni kua faliu e ia a ia mo agelu he maama.”—2 Korinito 11:14.
“Kia nonofo fakalatalata a mutolu, kia mataala a mutolu ha ko ia kua eke a mutolu mo tau fi hana, ko e [T]iapolo ia, kua faifano a ia tuga ne leona tagi, kua kumi kia falu ke faiola ai e ia.”—1 Peteru 5:8.
“Ko ia kua hala, mai he [T]iapolo a ia; ha ko e mena kua hala e [T]iapolo tali mai he kamataaga.”—1 Ioane 3:8.
“Ko e mena ia kia omaoma ai a mutolu ke he Atua; kia totoko atu a mutolu ke he [T]iapolo, ti hola kehe ai a ia ia mutolu.”—Iakopo 4:7.
“Ko e [T]iapolo . . . ko e keli tagata a ia tali mai he kamataaga, ti nakai tumau ni a ia ke he mena moli, ha kua nakai tokai i loto ia ia e mena moli; ka vagahau a ia ke he vagahau pikopiko, ko e hana ni a ia ke vagahau aki, ha ko e pikopiko a ia, mo e matua he pikopiko.”—Ioane 8:44.
NAKAI MOOLI: KA MAMATE TO O ATU OTI KE HE TAKAIAGA FAKAAGAAGA
“To kai foki e koe hau a mena kai mo e kavakava he hau a mata, ato liu a koe ke he kelekele; ha ko e mena eke mai ai a koe; ha ko e efuefu ni a koe, to liu foki a koe ke he efuefu.”—Kenese 3:19.
“Ha ko lautolu kua momoui, kua iloa e lautolu to mamate a lautolu; ka ko lautolu ne mamate nakai iloa e lautolu ha mena.”—Fakamatalaaga 9:5.
“Ko e tau mena oti kua iloa he tau lima hāu ke eke, kia eke a mo e hāu a malolo; ha kua nakai fai gahua, po ke manamanatu, po ke mena kua iloa, po ke iloilo ke he tukuaga, kua fina atu ki ai a koe.”—Fakamatalaaga 9:10.
“Kua fina atu hana agaga, kua liu a ia ke he kelekele ne eke aki a ia, ko e aho ia ni kua mate ai hana tau manatu.”—Salamo 146:4.
MOOLI: LEVEKI HE TAU AGELU FAKAMOOLI A TAUTOLU
“Kua fakatu e fale api he agelu a Iehova ke pa takai a lautolu kua matakutaku kia ia, ke laveaki foki e ia a lautolu.”—Salamo 34:7; 91:11.
“Nakai kia ko e tau agaga [tau agelu] ke fekafekau ai a lautolu oti, kua fakafano mai a lautolu ke fekafekau ma lautolu ke moua ai e moui?”—Heperu 1:14.
“Ne kitia foki e au e taha agelu kua lele ke he pulagi, ha ia ia e vagahau mitaki tukulagi ke fakamatala atu kia lautolu kua nonofo ke he lalolagi, mo e tau motu kehe oti, mo e tau magafaoa, mo e tau vagahau kehekehe, mo e tau motu, Kua pehe atu mo e leo lahi, Kia matakutaku a mutolu ke he Atua; mo e ta age kia ia e fakahekeaga.”—Fakakiteaga 14:6, 7.
NAKAI MOOLI: FAKATAUFATA A IESU MO E ATUA
“Kua loto au ke iloa ai e mutolu ko e ulu he tau tane oti ko Keriso haia, ko e ulu he hoana ko e tane haia, ka ko e ulu a Keriso ko e Atua haia.”—1 Korinito 11:3.
“Ka oti he tuku e tau mena oti ki lalo ia ia, ti tuku ai foki e Tama ki lalo ia ia ne tuku ai e tau mena oti ki lalo ia ia, kia pule okooko e Atua ke he tau mena oti kana.”—1 Korinito 15:28.
“Ko e moli, ko e moli, ke tala atu e au kia mutolu, nakai maeke ke he Tama ke eke taha mena, ko ia ni hokoia; ka ko e tau mena ne kikite atu ke he Matua ha ne eke.”—Ioane 5:19.