Tau Fakakiteaga ke he Takaiaga Fakaagaaga
ONOONO fakamakutukutu ke he lagi ke he loa he haau a manako, ka e to nakai kitia e koe ha mena moui fakaagaaga. Fakateliga, ka e to nakai logona e koe ha mena moui fakaagaaga. Ka e liga iloa moolioli e koe na fai mena fakaagaaga. Kua mua atu e lotomatala mo e malolō ha lautolu, ti igatia mo e tau higoa mo e tau aga. Falu ne mitaki ki a tautolu; falu ne manako ke fakahagahaga kelea a tautolu. Kua mamata a lautolu oti ki a tautolu.
Ko e Atua mooli ko e Agaaga ni a ia. (Ioane 4:24) Kua kehe lahi e higoa haana ne fakakite aki a ia mai he tau atua fakavai ne loga. Ko e higoa haana ko Iehova. (Salamo 83:18) Ne tohi he salamo: “Ha kua homo a Iehova, ti lata ni ke fakaheke fakalahi kia ia; kua mua e matakutaku kia ia ke he tau atua oti. Ha ko e tau tupua e tau atua oti he tau motu; ka ko Iehova, ne eke e ia e lagi. Ha ha i mua hana e fakahekeaga mo e fulufuluola; ha he faituga hana e malolo mo e lilifu.”—Salamo 96:4-6.
Tau Fakakiteaga he Atua Mooli
“Nakai fakai ni taha [k]e kitia e Atua,” he talahau he Tohi Tapu ki a tautolu. (Ioane 1:18) Ko e foliga mo e fulufuluola haana kua nakai maama katoatoa e tautolu, tuga ni e tau lanu kehekehe ne nakai iloa he tagata matapouli. Ka e tuga ni e faiaoga mitaki ne fakamaama e tau matakupu uka ke he tau tama aoga he fakaaoga e tau kupu ne maeke ia lautolu ke maama, kua fakamaama pihia he Atua, puhala mai he Kupu haana ko e Tohi Tapu hagaao ke he tau mena ne nakai maeke ia tautolu ke kitia aki e tau mena ne maeke ia tautolu ke kitia. He tau fakakiteaga ne omoomoi he agaaga tapu ne age ki a lautolu ne tua fakamooli i tuai, ne lagomatai e Iehova a tautolu ke kitia e lotopā he lagi mo e maama e fakafetuiaga ha tautolu mo lautolu ne ha ha i ai.
Ma e fakatai, taha e fakakiteaga ne age ke he perofeta ko Esekielu ne matutaki e lilifu ha Iehova mo e afi, maama kikila, maka safaira, mo e tagaloa. He taha fakakiteaga, ne kitia he aposetolo ko Ioane a Iehova he nofoaiki haana ti pehē ko e Atua “kua tuga e maka iasepi mo e salikea hana a tino mai,” ti lafi “kua agaagai foki e nofoaiki he tagaloa tuga e samaraki hana tino mai.” Ko e tau fakamaamaaga pihia kua tala mai ki a tautolu e tuaga ha Iehova kua kehe ue atu mo e kikila fulufuluola, olioli, mo e mafola.—Fakakiteaga 4:2, 3; Esekielu 1:26-28.
Ne fai fakakiteaga foki e perofeta ko Tanielu hagaao ki a Iehova, ne kitia e ia “hogofulu e afe kua taki hogofulu e afe [he tau mena momoui fakaagelu] ne tutu ki mua [ha Iehova].” (Tanielu 7:10) Ko e fakakiteaga ofoofogia mooli a ia! Ke kitia e fakakiteaga ke he taha e agelu ko e mena ofoofogia lahi mahaki, ka e lali la ke fakatino e tau hogofulu afe he tau mena momoui fakaagelu mitaki katoatoa!
Kavi ke he laga 300 e totoku e tau agelu i loto he Tohi Tapu, ti putoia he tau fakapapahiaga ha lautolu e tau serafi mo e tau kerupi. Ko e kupu Heleni mo e Heperu ne fakaliliu “agelu” i loto he Tohi Tapu ne kakano “tau fekau.” Maeke foki e tau agelu ke fematutakiaki, ti matutaki foki a lautolu he vahā fakamua mo e tau tagata. Ko e tau agelu ne nakai ko e tau tagata fakamua atu ne nonofo he lalolagi. Ne leva tigahau e tufuga e Iehova e tau mena momoui fakaagaaga nei ato tufuga e ia e tagata.—Iopu 38:4-7.
He fakakiteaga ha Tanielu, ne tokologa lahi e tau agelu ne fakapotopoto ke kitia e mena ofoofogia ne tupu. Ati kitia e Tanielu “taha kua tuga e Tama he tagata” ne hoko mai ke he nofoaiki ha Iehova ke age ki ai e “pule, mo e fakahekeaga, mo e kautu, kia fekafekau kia ia e tau motu oti, mo e tau kautu, mo e tau vagahau kehekehe.” (Tanielu 7:13, 14) Ko e “Tama he tagata,” ko e fakavēaga he takaiaga fakaagaaga, ko ia ko Iesu Keriso ne liu tu mai ti kotofa ke pule ke he lalolagi katoa. Ko e pule haana to nakai leva ti hukui e tau fakatufono oti kana he tagata mo e tamai e fakaotiaga ke he gagao, momoko, pehia, nonofogati, mo e mate foki.—Tanielu 2:44.
He patuiki a Iesu, to tamai mooli e fiafia lahi ke he tokologa he tau agelu fakamooli ne manako ke moua he tau tagata e mena mitaki lahi mahaki. Ka e momoko ai ha kua nakai pihia e logonaaga he tau mena momoui fakaagaaga oti.
Tau Fī he Atua mo e Tagata
He kamataaga he fakamauaga tala he tagata, taha he tau agelu ne manako lahi mahaki ke tapuaki age ki a ia, ne totoko ki a Iehova ti taute e ia a ia mo Satani, kakano ko e “Fai Fi.” Ko e matapatu he kelea muitui, ko Satani ne totoko velagia ki a Iehova ne fakakite mai e aga fakaalofa. Ne kau e falu agelu mo Satani he haana totokoaga. Fakahigoa he Tohi Tapu a lautolu ko e tau temoni. Tuga a Satani, ne taute he tau temoni a lautolu ni mo tau fī favale lahi he tau tagata. Laulahi he matematekelea he lalolagi, ko e nakai fakafili tonu, gagao, nonofogati, mo e tau felakutaki ko e tau fua he fakaohoohoaga ha lautolu.
Pete ko e aga tuai ke tutala hagaao ki a Satani i loto he tau lotu loga ha Kerisitenitome, ne fakakite he tohi a Iopu he Tohi Tapu e fakamaamaaga ke he mahani mo e tau manako he agelu totoko nei. Pehē mai: “Kua hoko ke he taha aho ti o mai ai e tau tama tane he Atua ke tutu ai a lautolu ki mua a Iehova; ti hau ai foki a Satani fakalataha mo lautolu.” Ke he fakatutalaaga ne mui mai, ne tukupau fakakelea e Satani ko e tagata ko Iopu ne fekafekau hokoia ke he Atua ha ko e tau mena ne moua e ia. He lali ke fakamooli e tukupau haana, ne fakahoko e Satani e matematekelea lahi mahaki ki a Iopu, he tamate e tau manu mo e tau tama tokohogofulu haana. Ka mole ia, ne tā e Satani a Iopu ke he gagao fufula kelea ne kaputia e tino katoa haana. Ne kaumahala e tau totokoaga oti ha Satani ke fakamooli e manako haana.—Iopu 1:6-19; 2:7.
Kua fai kakano mitaki ati leva lahi e fakauka a Iehova ki a Satani, ka e to nakai pihia tukulagi a ia. Nakai leva to fakaotioti a Satani. Kua fitā e tau lakaaga fakamua he fakatoka ti kua fakamaama he tohi ha Fakakiteaga, to hafagi e ie puipui ke fakakite foki taha mena tupu aoga lahi he takaiaga fakaagaaga ne liga nakai maeke a tautolu ke kitia. Totou e tautolu: “Kua tau foki a lautolu he lagi; ko Mekaeli [ko Iesu Keriso ne liu tu mai] mo e hana tau agelu kua tau ke he tarako [Satani], ko e tarako foki kua tau a ia mo e hana tau agelu; ka e nakai kautu a lautolu, ti nakai tuai moua foki ha mena ke he lagi ke nonofo ai a lautolu. Ti liti hifo ni e tarako lahi, ko e gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti; kua liti hifo a ia ke he lalolagi, kua liti hifo foki hana tau agelu fakalataha mo ia.”—Fakakiteaga 12:7-9.
Mailoga kua talahau ko Satani hane “fakahehe e lalolagi oti.” Ne fakahehe e ia e tau tagata he fakaohooho e tau pikopiko fakalotu ke fuluhi kehe a lautolu mai ia Iehova mo e haana Kupu. Ko e taha pikopiko ia ka mamate e tau tagata to o atu oti a lautolu ke he takaiaga fakaagaaga. Loga e talahauaga kehekehe hagaao ke he manatu nei. Ma e fakatai, i Aferika mo Asia, tokologa ne talitonu ka mamate kua o atu e tau tagata ke he lalolagi fakaagaaga ne takele ai e tau tupuna ha lautolu. Ko e tau fakaakoaga ke he pulekatolia mo e tukuaga ne fakavē foki ke he manatu na moui agaia e tagata ka mate.
Ka Mole e Mate To Moui Kia he Lagi?
Ka e kua e taofiaga ne talitonu e tau miliona ki ai he lalolagi katoa, na o oti e tau tagata mahani mitaki ke he lagi? Mooli, na fai tagata mahani mitaki ka o atu ki ai, ka e mena tote e numera ha lautolu ka fakatatai ke he tau piliona ne kua mamate. Ne fakakite he Tohi Tapu ko e 144,000 e tagata ka “fakafua mai he lalolagi” ti eke mo “tau ekepoa” mo e “tau patuiki ke he lalolagi.” (Fakakiteaga 5:9, 10; 14:1, 3) Fakalataha mo e Tama he tagata, ko Iesu Keriso, ko lautolu haia he fakatufono he lagi, ko e Kautu he Atua. Ko e fakatufono ia ka fakaotioti a Satani mo e tau temoni haana ti taute e lalolagi mo parataiso. Laulahi ia lautolu ne mamate to liu momoui he taha magaaho i mua ti amaamanaki ke momoui tukulagi he Parataiso he lalolagi.—Luka 23:43
Ke fakahiku aki mogoia, kua tokologa ne takele he takaiaga fakaagaaga. Mua ue atu ia lautolu ia ko Iehova ko e Atua, ko e Tufuga he tau mena momoui oti kana. Hane fekafekau fakamooli ki a ia ko e tau agelu ne totou hogofulu afe. Ko e tau agelu ne toe ne takitaki e Satani, ne totoko ki a Iehova mo e lali ke fakahehē e tau tagata. Lafi ki ai, ne fakakaupā ni e numera he tau tagata ne “fakafua,” po ke fifili, mai he lalolagi ke taute e tau kotofaaga pauaki he lagi. He tokaloto e mena nai, kia kumikumi a tautolu mogonei ki a lautolu ka matutaki ki ai he takaiaga fakaagaaga mo e puhala kua lata ia tautolu ke matutaki.