Emyatsi y’Emighulu y’Erimbere

20 Oko mwanzo w’omwaka,* omughulu abami bakayalwa, Yoabu mwasondola abasuda, amayatoghotya ekihugho ky’Abaamoni; mwayatimba oko muyi we Raba atoke erilwa nagho, aliwe Daudi abya iniabirisighala e Yerusalema. Yoabu mwalwa n’omuyi we Raba, amatoghotyagho. 2 Daudi mwimya embita eyabya oko mutwe wa Malkamu. Mwafumbula ngoko embita eyo yabya ikaluamo etalanta* nguma y’ehoro, kandi iyipambire omo mabwe w’obughuli; embita eyo muyahirwa oko mutwe wa Daudi. Daudi mwanyegha n’ebindu binene omo muyi oyo. 3 Mwaheka n’abakalani b’omo muyi oyo, amayabaha emibiiri y’erikaswa y’eritwa amabwe omo misumeno, y’erikola omo byombo ebitwire eby’ekyuma n’omo syombasa. Daudi kw’akolera atya emiyi yosi y’Abaamoni. Oko mwiso, Daudi n’abasuda biwe bosi mubasuba e Yerusalema.

4 Enyuma sy’aho, Abaisraeli mubalwa n’Abafilistini e Gezeri. Oko mughulu oyo, Sibekai Omuhushati mwita Sipai oyo wabya w’oko Barefaimu, neryo Abafilistini mubasingwa.

5 Kandi Abaisraeli mubalwa n’Abafilistini, neryo Elhanani mughala wa Yairi mwita Lami mughala wa Goliata Omugiti. Omuti w’eritumo rya Goliata abya munene ng’omuti w’erilukirako.

6 Awandi malwa mwabya e Gati. Omo muyi oyo mwabya mwikere omulume muli-muli, abya n’eminwe 6 oko buli byala n’amanono 6 oko buli kisando; eminwe n’amanono, ebyosi byabya 24; naye abya w’oko Barefaimu. 7 Iniakabera eripuma* Abaisraeli, neryo Yonatani mughala wa Shimea, mughala wabo Daudi mwamwita.

8 Abafilistini abo babya b’oko Barefaimu ababya bikere e Gati, Daudi n’abasuda biwe mubitabo.