Emyatsi y’Emighulu y’Akabiri
17 Neryo mughala wiwe Yehoshafati mwabya mwami omo mwanya wiwe. Yehoshafati mwawatya obutabali bwiwe omo Israeli. 2 Mwahira abasuda omo miyi yosi ye Yuda eyiwatire, amahira n’esyokambi sy’abasuda omo kihugho kye Yuda, n’omo miyi ye Efraimu eyo Asa baba wiwe ahamba. 3 Yehova mwataleka Yehoshafati kundi mwabya nga tata-kulu wiwe Daudi, kandi mwatakolera Esyobaali. 4 Kundi mwasondya-sondya oMungu wa baba wiwe, kandi mwakwama* emighambo yiwe, iye mwatakola ngoko Abaisraeli babya bakakola. 5 Yehova mwawatikya Yehoshafati, neryo obwami bwiwe mubwasika, n’abandu bosi be Yuda mubabya bakamuletera ebihembo. Mwabya muteke, n’abandu mubamusikya kutsibu. 6 Mwakwama esyonzira sya Yehova n’obutubaha, kandi nibya mwalusya omo Yuda mw’emyanya y’endata n’emiti mibuyirire.*
7 Omo mwaka w’akasatu w’obutabali bwiwe, mwatuma abandu ati bayende abakulu b’omo butabali bwiwe, ni bugha ambu, ye Ben-haili, Obadia, Zekaria, Netaneli, na Mikaya batoke erikangirirya abandu b’omo miyi ye Yuda. 8 Babya n’Abalawi: Shemaya, Netania, Zebadia, Asaheli, Shemiramoti, Yehonatani, Adonia, Tobiya, na Tobu-adonia, kandi babya n’omuhereri Elishama n’omuhereri Yehoramu. 9 Mubaheka ekitabu ky’Emighambo ya Yehova, bamatsuka erikangirirya abandu be Yuda. Mubatimba omo miyi yosi ye Yuda, bakakangirirya abandu.
10 Yehova mwahira omo bandu b’omo mami wosi awabya atimbire oko Yuda mo buba, neryo mubatalwa na Yehoshafati. 11 N’Abafilistini mubaletera Yehoshafati y’ebihembo n’engemo y’esyofranga; Abaarabu mubamuletera esyombangale 7 700 n’esyombaya 7 700 esyo bimaya omo bihangulo byabo.
12 Yehoshafati mwalola embere eribya n’akaghala, kandi mwalola embere erihimba emyanya eyo mundu ateangahikamo bweghu-bweghu n’emiyi eyirimo amadepo e Yuda. 13 Mwakola emyatsi minene-minene omo miyi ye Yuda. Kandi mwayira oko basuda, abasuda b’amaka e Yerusalema. 14 Abasuda abo mubapangwa mo bikuto-bikuto erikwamana n’ebitunga byabo: Abakulu b’amaelfu b’omo kihanda kya Yuda babya: Adna omukulu, abya n’abasuda b’amaka 300 000. 15 Abya akimanira Yehohanani omukulu; oyu naye abya n’abasuda 280 000. 16 Kandi abya akimanira Amazia mughala wa Zikri, oyo wayiherera erikolera Yehova. Oyu naye abya n’abasuda b’amaka 200 000. 17 Omo kihanda kya Benyamini mwabya Eliada, omusuda w’amaka; oyu naye abya n’abasuda 200 000 ababya bahekire obuta* n’esyongabo. 18 Abya akimanira Yehozabadi, oyu naye abya n’abasuda 180 000 ababya n’ebindu by’amalwa. 19 Abasuda abo babya bakakolera omwami, mubaongezeka oko basuda abo mwami ahira omo miyi eyiwatire omo kiharo kyosi kye Yuda.