Esyonyimbo
Oko musondoli. Ni lw’abaghala ba Kora. Ni lw’erimba omo mimbire ye Alamoti.* Olwimbo.
46 OMungu ni busayiro bwetu n’amaka wetu,
Obuwatikya obo twangabana bweghu-bweghu omughulu w’obulighe.
2 Busana n’ekyo sitwangubaha nomo ekihugho kyangabinduka,
Nomo ebitwa byangatoghera omo mitobero y’engetse,
3 Nomo amaghetse wayo angahuha n’erighunga,
Nomo ebitwa byangatitimana busana n’erighunga ryayo. (Sela)
4 Olusi olo ehyusi hyalo hikaleta obutseme omo muyi w’oMungu,
Etabernakulo ngulu eyibuyirire ey’ow’Endata Kutsibu.
5 OMungu ali omo muyi oyo; omuyi oyo syangakindwa.
OMungu akendisyawatikyagho omo mitsange.
6 Ebihanda mubyabya omw’ibulungana, amami mwakindwa;
Mwasumba omulenge wiwe, n’ekitaka mukyayeyuka.*
7 Yehova w’emilondo ali haghuma netu,
OMungu wa Yakobo ni busayiro bwetu obusikire.* (Sela)
8 Mwase mulangire emibiiri ya Yehova,
Ngoko abirikola emyatsi y’eriswekera oko kihugho.
9 Akabugha omo kihugho kyosi mw’amalwa.
Akatsutsanga obuta n’eritsutsanga eritumo;
Akahisaya esyongurubani* sy’amalwa omo muliro.
10 “Mulighe ngoko mwamakindwa kandi ngoko niri Mungu.
Ngendisyahamibwa omo kati-kati k’ebihanda;
Ngendisyahamibwa omo kihugho.”
11 Yehova w’emilondo ali haghuma netu;
OMungu wa Yakobo ni busayiro obusikire busana netu. (Sela)