Emisyo
31 Bino ni binywa by’omwami Lemueli, ebinywa by’omughaso ebyo mama wiwe amubwira akamukangirirya:
2 Mughala waghe, nikubwireki?
Mwana waghe, iwe walua omo nda yaghe, nikubwireki?
Iwe mwana w’eriyilagha ryaghe, nikubwireki?
3 Isiwaha abakali b’akaghala kaghu,
Isiwakola emyatsi eyikatsandaya abami .
4 Lemueli, siritolere abami,
Siritolere abami bakanywa edivai,
Siritolere abasondoli bakabugha bati: “Obwabu buli hayi?”
5 Bakasyanywa n’eribirirwa emighambo,
Kandi bakasyabula erikolera abandu b’ahisi ebyo batolere erikolerwa.
6 Muhe obwabu bw’abakayahola
N’edivai y’abali omo bulighe bunene.
7 Neryo banywe n’eribirirwa obwera bwabo;
Bibirirawe obuhanya bwabo.
8 Ubughire esyomumu;
Ulwire oko syombangwa sy’abosi* abakayahola.
9 Ubughe n’eritswera omo ritunganene;
Ulwire oko syombangwa sy’abandu* b’ahisi n’abera.
א [Aleph]
10 Omukali w’obutoki,* nindi yo wangamubana?
Ni w’obughuli bunene kulenga esyokoraye.*
ב [Beth]
11 Omwira wiwe akayiketera iye omo mutima wiwe,
Kandi omwira wiwe awite ebyosi ebyo alaghireko.
ג [Gimel]
12 Akahemba omwira wiwe omo byuwene,
Syalimuhemba omo bituwene,
Omo biro byosi by’engebe yiwe.
ד [Daleth]
13 Akasondaya obweya bw’esyombuli n’ekitani;
Anzire eritumika omo byala biwe.
ה [He]
14 Ali ng’amato w’omukomersa,
Akalusaya ebyalya biwe by’ehali.
ו [Waw]
15 Kandi akabuka ibukine kiro,
Akaha ekihanda kiwe ky’akalyo
N’eripangira abaghombe biwe b’obukali.
ז [Zayin]
16 Akayisogha erisondya eririma n’erighularyo;
Akahera eririma ry’emizabibu omo kaghala kiwe.*
ח [Heth]
17 Akayiteghekanaya atoke erikola omubiiri owakalire,*
Kandi akasikaya ebyala biwe.
ט [Teth]
18 Akafumbula ngoko obutsurusi bwiwe bunemuluamo endundi
Etala yiwe siyirilima omo kiro.
י [Yod]
19 Ebyala biwe bikahambirira akati k’erilingirako euzi,
Kandi bikahambirira akati k’erilukamo euzi.
כ [Kaph]
20 Akakakaya ebyala biwe atoke eriwatikya omundu w’ahisi,
Kandi akakingulira omwera y’ebyala.
ל [Lamed]
21 Syalihanga-hangaya busana n’ekihanda kiwe omughulu w’enzururu,
Kundi abosi b’omo kihanda kiwe bakabya ibanambite esyongyimba sy’embeho.*
מ [Mem]
22 Akayikokoteraya ebindu by’erisesa oko ngyingo.
Esyongyimba siwe ni sy’ekitani n’esy’obweya bw’embuli bw’erangyi y’olubono-bono.*
נ [Nun]
23 Omwira wiwe asibwe ndeke oko milango y’omuyi,
Aho akikala haghuma n’abasyakulu b’omo kihugho.
ס [Samekh]
24 Akakokotaya n’erighulya esyongyimba sy’ekitani,*
Kandi akaha abakomersa b’emikaba.
ע [Ayin]
25 Ambite akaghala n’olukengerwa,
Syalisagha ebiro ebikasa.*
פ [Pe]
26 Akakingula obuno bwiwe n’amenge;
Omughambo w’olukogho* ali oko lulimi lwiwe.
צ [Tsade]
27 Akabya inianemulebya emibiiri y’omo nyumba yiwe,
Kandi syalirya omukati w’obughata.
ק [Qoph]
28 Abana biwe bakahangana n’erimupipa;
Omwira wiwe akahangana n’erimupipa.
ר [Resh]
29 Hali abakali bangyi b’obutoki,*
Aliwe iwe, ulengire abosi abo.
ש [Shin]
30 Omundu anganalangirika ng’atsemesirye, kwesi iko bite bitya,
N’obubuya bwanganahwa,*
Aliwe omukali oyusaghire Yehova yukendisyapipwa.
ת [Taw]
31 Umuhembe busana n’ebyo akakola,*
N’abandu bamupipe oko milango y’omuyi busana n’ebyo akakola.