Omughambuli

6 Munalangira oko kihugho* k’oghundi mwatsi owakita obulighe,* kandi omwatsi oyo syalibula omo bandu: 2 OMungu w’ekwenene akaha omundu y’obuteke, ebindu, n’olukengerwa, omundu oyo isyabula ekyosi-kyosi ekyo anzire.* Aliwe oMungu w’ekwenene iniatamulighira eritsemerabyo, nikwa oghundi mundu iyo watsemerabyo. Ekyo nakyo ni bule kandi kikita obulighe bunene kutsibu. 3 Omundu nomo angabuta abana 100, iniabyaho oko miaka mingyi kandi iniahika n’omo busyakulu, aliwe isyalitsemera ebindu biwe ebyuwene embere aye omo yisinda,* ngabugha niti omwana oyulyahola akabutwa alengire omundu oyo. 4 Kundi omwana oyo mwakabutawa bule n’eriya omo mwirimya, n’erina riwe ryamatabwa omo mwirimya. 5 Nomo omwana oyo atalola oko ryuba, kandi nomo ataminya mwatsi wosi-wosi, aliwe tu alengire* omulume oyo. 6 Hali ndundi yahi omundu eribugha emyaka 1 000 ngendo kabiri aliwe isyalyatatsema? Abosi sibaliya omo mwanya mughumerera?

7 Omubiiri wosi owakalire ogho mundu akakola, akakolagho busana n’eryusulya obuno bwiwe; aliwe syalyughuta. 8 Kundi omundu w’amenge alengire omukiru y’okuki? N’omwera akabana ndundi yahi omw’iminya ekyo angakola atoke eribya inianeho?* 9 Kyanya iwatsemera ebyo ameso waghu akalangira kulenga kw’erikwamirira esyongumbu syaghu sy’eyi n’eyi.* Ekyo nakyo ni bule, ni kwamirira erihunga.

10 Ebyosi ebiriho byabirihabwa erina, kandi tunasi omundu ng’ali ati. Kandi syangakuba obuhaka* n’oyuli n’amaka kumulenga. 11 Ebinywa byamabibya binene, bikusulamo ebinywa ebite na mughaso; n’omundu akabana mubyo mw’endundi yahi? 12 Nindi yo wasi ekyuwene ekyo omundu atolere iniakola omo biro bike by’engebe yiwe eyite na mughaso, eyikalaba ng’ekitsutsu? Kundi nindi yo wangatoka eribwira omundu ebikendisyabya oko kihugho* abighenda?