Isaya
11 Erisasa rikendisyalasa erilua omo kisiki kya Yese,
Erisasa erikendisyalasa oko mirihi yiwe rikendisyahetya amatunda.
2 N’ekirimu kya Yehova kikendisyabya okw’iye,
Ekirimu ky’amenge n’eky’obuyiteghererya,
Ekirimu ky’erihana n’eky’amaka,
Ekirimu ky’eriminya n’eky’eryubaha Yehova.
3 Naye akendisyatsema omw’ubaha Yehova.
Syendisyatswera erikwamana n’ebyo akalangira omo meso,
Kutse erilw’iniakunga erikwamana n’ebyo akowa omo matwi wiwe.
4 Akendisyatswera abandu b’ahisi omo bulingirirania,*
Kandi omo ritungenene akendisyateka erikunga busana n’abolo b’oko kihugho.
Akendisyahunza ekihugho omo mutso w’obuno bwiwe
N’eriita ababi omo muka* w’eminywa yiwe.
5 Eritunganene rikendisyabya mukaba w’enda* yiwe,
N’obutaleghula bukendisyabya mukaba w’omo mbindi yiwe.
6 Embwa y’omoli* ikendisyabya ikikala haghuma n’ekyana ky’embuli omo katambi kalebe,
N’ekyana ky’embene n’esoro bikendisyabundama haghuma.
Ekyana ky’ende n’endale* n’ekinenehire bikendisyabya haghuma;*
N’omulwana mulere akendisyasondolabyo.
7 Ende y’obukali n’edubu bikendisyalya haghuma,
N’ebyana byabyo bikendisyabundama haghuma.
Endale* ikendisyalya ebiti ng’enume y’ende.
8 Omwana oyukanyonya* akendisyatsangira oko busamba bw’enzwira,
N’omwana oyo wabiritsira amabere akendisyahira ebyala biwe oko busamba bw’enzoka y’esumu.
9 Sibyendisyaghalya n’ahake
Kutse eriherya omo kitwa kyaghe kyosi kibuyirire,
Kusangwa oko kwenene ekihugho kikendisyusulamo eriminya lya Yehova
Ngoko amaghetse akabwagha omo ngetse.
10 Oko kiro ekyo, omulihi wa Yese akendisyahangana eribya kiminyikalo* busana n’ebitunga by’abandu.
Ebihanda bikendisyaghenda eyo ali eriyasondya obusondoli,*
N’ah’eriluhikira hiwe hakendisyabya h’olukengerwa.
11 Oko kiro ekyo, Yehova akendisyaleta ebyala biwe engendo y’akabiri erisubulya abasaka b’oko bandu biwe abasighala erilua e Asiria, e Misri, e Patrosi, e Kushi, e Elamu, e Shinari,* e Hamati, n’erilua omo bitsira by’engetse. 12 Akendisyahanganirya ebihanda by’ekiminyikalo* n’erikuma-kuma abapanza-panzawa ba Israeli, kandi akendisyakuma-kumira haghuma apanza-panzawa be Yuda erilua oko syongonde ini sy’ekihugho.
13 Obuha bwa Efraimu bukendisyahwa,
N’abakalwa na Yuda bakendisyalusibwaho.
Efraimu syendisyatsura Yuda,
Na Yuda syendisyalwa na Efraimu.
14 Bakendisyaghulukira ahisi oko mandaghala* w’Abafilistini eyo eryuba likalengera;
Bakendisyahunga haghuma abandu b’oko luhande lw’eyo eryuba likasira.
Bakendisyasumba ebyala* erilwa ne Edomu ne Moabu,
Bakendisyatabala n’oko Baamoni.
15 Yehova akendisyaghaba* amaghetse w’omo kalimi* k’engetse ye Misri
N’erihungya ebyala biwe oko Lusi* olo.
Omo muka* wiwe owakahisaya akendisyahunza* esyonyusi syayo 7,
Neryo akendisyaleka abandu ibasoka ibanambite ebiryato.
16 Kandi omo Asiria mukendisyabya enzira nene busana n’emisighalira y’abandu biwe abakisighere,
Ngoko hanabya enzira busana na Israeli ekiro alua omo kihugho kye Misri.