Isaya
16 Mutumire omutabali w’ekihugho y’embangale,
Eritsuka e Sela erilaba omo mbwarara
Erihika oko kitwa kya mwali we Sioni.
2 Ng’enyunyu eyikahighawa omo lutu lwayo,
Abali be Moabu ko bakendisyabya batya oko bisokero bye Arnoni.
3 Muteke amahano, mukole ekiryasohawa.
Omw’itungyi ryape uyire ekitsutsu kyaghu ng’omwirimya w’ekiro.
Ubise abakapanza-panzawa kandi isiwatulukaliraya abakatibita.
4 Uleke abandu baghe abapanzikene bikale haghuma naghu, iwe Moabu.
Ubye okw’ibo ah’eribisama busana n’oyukaheraya.
Omunubya akendisyahika oko nduli yiwe,
N’eriherya likendisyahwa,
N’abakalyatangirira abandi bakendisyaheribwa erilua omo kihugho.
5 Neryo ekitumbi ky’obwami kikendisyahanganibwa ndeke omo lwanzo oluteleghula.
Oyo wikere kukyo omo hema ya Daudi akendisyabya mutaleghula;
Akendisyatswera ndeke n’eryanguha erikola eritunganene.
6 Twabiryowa oko miyiheko ya Moabu—akayiheka kutsibu—
Eriyipipa liwe, n’eriyiheka liwe n’erihitana liwe;
Nikwa ebinywa biwe ebitawite mughaso bikendisyabya buyira.
7 Neryo Moabu akendisyayilakira busana n’obulighe bwiwe;*
Abosi bakendisyalira.
Ababirihunzwa bakendisyasisimuka busana n’egato* ey’emizabibu eyumire eye Kiri-hareseti.
8 Kusangwa emikiki ye Heshboni yabiryuma,
Omuzabibu we Sibma,
Abatabali b’ebihanda babirilyatangira amatahi* wagho aw’erangyi y’omusasi eyihena-henirye*
Abya inyabirihika e Azeri;
Inyabirilanda omo mbwarara.
Amasasa wagho abya inyabirilanda erihika oko ngetse.
9 Busana n’ekyo ngendilira busana n’omuliki w’omuzabibu we Sibma ngoko ninemulira busana na Yazeri.
Iwe Heshboni ngendikutsapya omo misonia yaghe, naghu kutya Eleale,
Kusangwa obwogho* bwaghu bw’obutseme busana n’amatunda waghu w’omughulu w’omwisi na busana n’erighesa lyaghu bwahwere.*
10 Obutseme n’eritsanga byabirihwa omo lirima ly’amatunda.
Kandi omo malima w’emizabibu simuli esyonyimbo sy’obutseme n’esy’eritsanga.
Omukami syakikamira edivai omo bikamiro,
Kusangwa nabirileka obwogho ibumbya.
11 Busana n’ekyo ngasuka-sukana emwisi syaghe busana na Moabu,
Ng’omughulu enanga ikawatawa,
N’emwisi syaghe mo hali ngasuka-sukana busana ne Kiri-hareseti.
12 Nibya n’omughulu Moabu akayiluhiraya oko mwanya w’endata n’eriyasabira omo habuyirire hiwe, ekyo kikendisyabya buyira.
13 Ekyo kye kinywa ekyo Yehova abugha kera busana na Moabu. 14 Neryo lino Yehova ati: “Omo myaka isatu, ngoko emyaka y’omukoli w’omubiiri oyukalihawa ikanaghanzawa,* olukengerwa lwe Moabu lukendisyahemulwa omo lukanda lunene lw’emihanda yosi, n’abakendisyasaka bakendisyabya bake kutsibu kandi abatawite amaka.