Isaya
24 Lebaya! Yehova anemukungumula ekihugho* n’eriyirakyo mo mulala.
Akatulikakyo* n’eripanza-panza abikalani ba mukyo.
2 Ekyo kikendibya oko buli mundu:
Abandu, kutya n’omuhereri;
Omughombe n’omukama wiwe,
Omughombe w’obukali n’omughole wiwe,
Oyukaghulaya n’oyukaghula,
Oyukabweka n’oyukabwekawa,
Oyukatuhibawa n’oyukatuhaya.
3 Ekihugho kikendisyakungumulwa ndeke-ndeke;
Kikendisyahungwa ndeke-ndeke,
Kusangwa Yehova yo wabiribugha ekinywa eki.
4 Ekihugho kinemulira;* kinemwoloba.
Ekitaka kikuma; kikalembera.
Esyoseghu-seghu sy’ekihugho sikuma.
5 Abikalani b’ekihugho babiritsandyakyo,
Kusangwa babirikita oko mighambo,
Babiribindula ebighenderwako,
N’eritwa endaghane y’erikota.*
6 Kyo kikaleka eritakira iryalya ekihugho,
N’abikalani ba mukyo baliko olubanza.
Kyo kyabirileka abikalani b’ekihugho ibakeha,
N’abake basa bo babirisaka.
7 Edivai nyihya-nyihya ikalira,* omuzabibiu akuma
N’abosi ababya n’emitima eyitsangire, bakasimba.
8 Obutseeme bw’akakelea bwahwere;
Emilenge y’obutseme y’abali omo fete yahwere;
Omulenge w’obutseme ow’enanga abiryumbya.
9 Bakanywa edivai butsira lwimbo,
N’obwabu bwabirikalihira abakanywabo.
10 Omuyi owabirisighanibwa abirisambulwa;
Obuli nyumba ikingire, sihabye omundu oyukingira.
11 Bakalirira edivai omo syonzira sy’omuyi.
Obutseme bwosi bwabiribulirana;
Obutseme bw’ekihugho bwaghendire.
12 Omuyi abirisighanibwa mo bisambukalirya;
Oluyi lwabiritsutsangwa n’eribya kilundo ky’ebisambukalirya.
13 Kusangwa ko bikendisyabya bitya omo kihugho, omo kati-kati k’ebitunga by’abandu;
Ng’omughulu omuzeituni akahumbawa,
Ng’omughulu amahumbira akakuma-kumawa enyuma sy’obughese bw’emizabibu.
14 Bakendisyasumba emilenge yabo,
Bakendisyuta obwogho bw’obutseme.
Erilua oko ngetse* bakendisyatulaghania obukulu bwa Yehova.
15 Ekyo kyo kikendisyaleka ibapipa Yehova omo kihugho ky’ekyakakala;*
Omo bitsira by’engetse bakendisyapipa erina lya Yehova oMungu wa Israeli.
16 Erilua oko nduli sy’ekihugho tukowa esyonyimbo hino:
“Oyutunganene ahabawe olukengerwa!”*
Nikwa ngabugha niti: “Ngalembera, ngalembera!
Obulighe okw’ingye! Ab’amatebo babirikola omo matebo;
Omo matebo ab’amatebo babiriteba.”
17 Eryubahya n’ebyuna n’ebitegho binabalindire, inywe mwikere omo kihugho.
18 Owosi-wosi oyukatibita akasagha omulenge w’eryubahya, akendisyatoghera omo kyuna,
N’owosi-wosi oyukalua omo kyuna akendisyahambwa omo kitegho.
Kusangwa esyongyo sy’eribwagha eriri omo kyanya sikendisyakingulwa,
N’esyofondasyo sy’ekihugho, sikendisyasuka-sukana.
19 Ekihugho kyabiritulika,
Ekihugho kyabirisuka-sukanibwa;
Ekihugho kikatitimana kutsibu.
20 Ekihugho kikaghuna-ghuna ng’omutamiri,
Kikaya eyi n’eyi ng’akabalalayi omo rihunga.
Amalolo wakyo, abirilitoherakyo kutsibu,
Nakyo kikenditera, isikyendisyasyahangana.
21 Oko kiro ekyo, Yehova akendisyibuka emilondo y’abasuda eyiri omo myanya mw’endata
N’abami b’ekihugho abali oko kihugho.
22 Kandi bakendisyahindanibwa haghuma
Ng’abandu b’omuliki abakahindanibawa omo kyuna,
Bakendisyakingirwa omo ngomo y’ekyuna;
Hakendisyabya halaba ebiro bingyi ibalengekanibwako.
23 Omughenda w’ekibambangoma akendisyahemuka,
N’eryuba erinemukola rikendisyakwa esisoni,
Kusangwa Yehova w’emilondo abiribya Mwami oko Kitwa kye Sioni n’omo Yerusalema,
Abiribya w’olukengerwa embere sy’abasyakulu b’abandu biwe.*