Isaya
31 Obulighe oko bakandaghalira e Misri eriyasondayo obuwatikya,
Abakayiketera esyosabayiri,
Abakayiketera esyongurubani sy’amalwa* kundi ni nyingyi,
N’abakayiketera esyosabayiri sy’amalwa* kundi siwite akaghala.
Nikwa sibeyiketera Oyubuyirire wa Israelli,
Kandi sibesonda-sonda Yehova.
2 Nikwa naye awite amenge kandi akendisayaleta obuhanya,
Kandi syendisyabindula ebyo abiribugha.
Akendisyahangana erilwa n’enyumba y’abakola-nabi
N’abakawatikaya abakakola ebibi.
3 Nikwa Abanya Misri, ni bandu buyira si Mungu;
Esyosabayiri syabo, ni nyama buyira si kirimu.
Omughulu Yehova akendisyasumba ebyala biwe,
Owosi-wosi oyukawatikaya akendisyatwikala
N’owosi-wosi oyukawatikibawa akendisyawa;
Abosi bakendisyahwera kughuma.
4 Kusangwa Yehova abirinibwira ati:
“Ngoko endale* ikanaruruma, ngoko omusuko w’endale* akanarururmira oko ekyo akahigha,
Omughulu ekikuto ky’abalisya kikabirikirawa erisyalwa nayo,
Nayo iyitasagha omulenge wabo
Kutse erisisira busana n’olukanda lwabo,
Yehova w’emilondo kw’akendisyandaghala atya
Erilwira oko kitwa kye Sioni n’oko katwa kayo.
5 Ngoko esyonyunyu sikanandaghala luba, Yehova w’emilondo kw’akendisyalwira oko Yerusalema kw’atya.
Akendisyalwira kuyo n’erilamyayo.
Akendisyateyayo n’erisabulayo.
6 Inywe bana ba Israeli, musube oko oyo mwabiriyisambulako kutsibu. 7 Kusangwa ekiro ekyo, obuli mundu akendisyaghana emiungu yiwe eyitawite mughaso ey’efeza,* n’emiungu yiwe y’ehoro eyitawite ndundi, eyo ebyala byenyu-byenyu byakola erilolo omughulu byakokotayayo.
8 N’Omuasiria akendisyitwa omo muyali, butsira omuyali w’omundu;
N’omuyali owate w’omundu akendisyamubughaho.
Akendisyatibita akasagha omuyali,
N’abalwana biwe bakendisyahirwa oko mubiiri w’erikasirwako.