Isaya
42 Lebya! Omughombe waghe, oyo ngawatikaya!*
Omusombolwa waghe, oyo nabiriligha!*
Nabirimuhirako ekirimu kyaghe;
Akendisyaletera ebihanda by’obulingirirania.
2 Syendisyahoromoka* kutse erisumba omulenge wiwe,
Kandi syendisyowisya omulenge wiwe omo nzira y’omuyi.
3 Sihali oluseke olupondekene olo akendisyabuna,
Kandi syendisyalimya orutambi olukatumba.
Omo butaleghula akendisyaleta obulingirirania.
4 Syendisyahumbera kutse eribunika ate aleta obulingirirania omo kihugho;
N’ebitsira bikalindirira kutsibu omughambo wiwe.*
5 Yehova, oMungu w’ekwenene,
Oyo wahangyika olubulla kandi ow’Endata oyo wasanzalo,
Oyo wasanza ekihugho n’ebiriko,
Oyukaha abandu abali kukyo b’omuka
N’eriha abakalendera kukyo b’ekirimu, ati:
6 “Ingye, Yehova nabirikubirikira omo ritunganene;
Nabirikuwata oko byala.
Ngendikuteya n’erikuyira mo ndaghane busana n’abandu
Kandi ng’ekyakakala busana n’ebihanda.
7 Erilibula ameso w’esyondime-time,
Erilusya oyubohirwe omo ngomo y’ekyuna
N’erilusya omo ngomo abikere omo mwirimya.
8 Ingye indi Yehova. Eryo lye rina ryaghe;
Olukengerwa lwaghe sindihalo oghundi mundu wosi-wosi,*
Kutse eriha esyosanamu esibatsire sy’eripipa lyaghe.
9 Lebaya, emyatsi y’erimbere yamabilaba;
Neryo lino ngatula emyatsi mihya-mihya.
Ngababwira kuyo, embere yihuluke.
10 Mwimbire Yehova y’olwimbo luhya-luhya,
Mwimbe eripipa liwe erilua oko nduli-nduli sy’ekihugho,
Inywe mukandaghalira omo ngetse, kutya n’ebyosi ebiri muyo,
Inywe bitsira n’abikere mubyo.
11 Embwarara n’emiyi yayo bisumbe omulenge,
Ehiyi eyo Kedari ikere.
Abikalani b’oko lubwe bute obwogho bw’obutseme;
Bute obwogho erilua oko singyi sy’ebitwa.
12 Bahe Yehova y’olukengerwa
N’eritulaghania eripipa liwe omo bitsira.
13 Yehova akendisyahuluka ng’embangyi.
Akendisyahuhania omuhwa wiwe ng’omundu w’amalwa.
Akendisyabirikira, inga, akendisyabuya olukanda lw’amalwa;
Akendisyayikangania ngoko awite akaghala kanene oko syonzighu siwe.
14 “Nabirihuna mughulu muli.
Nabiribya bukutu n’eriyikakirya.
Ng’omukali oyukasonda eributa,
Ngendisimba, n’eritabaghana, n’erihumayira oko ndambi ngumerera.
15 Ngenditsandya* kutsibu ebitwa n’ehitwa
N’eryumya ebiti byabyo byosi.
Kandi ngendibindula esyonyusi mo bitsira*
N’eryumya ebitsinga by’olubingu.
16 Ngendisyasondola esyondime-time omo nzira eyo sitasi
N’erilabyasyo omo syonzira esyo sitasi.
Ngendisyayira omw’irimya owali embere wasyo mo kyakakala
N’eriyira ekitaka ekitakomire mo bwerere.
Ekyo kyo ngendisyakolerasyo, kandi sinendisyasighaniasyo.”
17 Abakayiketera esyosanamu esibatsire,
Abakabwira esyosanamu sy’ekyuma* bati: “Muli miungu yetu,”
Bakendisyasubibwa enyuma n’erihemulwa kutsibu.
18 Inywe batsiha, muhulikirire;
Inywe ndime-time musamalire n’erilangira.
19 Nindi yo ndime-time ate iy’omughombe waghe,
Omutsiha ng’omutumwa oyo ngatuma?
Nindi yo ndime-time ng’oyukahembawa,
Endime-time ng’omughombe wa Yehova?
20 Ukalangira emyatsi mingyi, nikwa sighulitsomana.
Ukahundula amatwi, nikwa sighulihulikirira.
21 Busanana n’eritunganene riwe,
Kyabiritsemesya Yehova erihamya omughambo* n’eriyiragho mo w’olukengerwa.
22 Nikwa aba ni bandu ababirihungwa n’erinyewa;
Abosi babirihambirwa omo myangalu n’eribiswa omo syongomo.
Bakahungawa isihali oyo wangalamyabo,
N’eritwalwa omo bunyewa isihali oyukabugha ati: “Subulayabo!”
23 Nindi omo kati-kati kenyu yukendyowa eki?
Nindi yukenditegha okutu n’erihulikirira busana n’omughulu owakasa?
24 Nindi yo wabirihira Yakobo omo byala by’abakahunga
Na Israeli omo byala by’abakanyegha?
Si Yehova, oyo twabirihalyako?
Mubaghana erilendera omo syonzira siwe,
N’erighana erikenga emighambo* yiwe.
25 Neryo mwabya akamutulirako erihatana liwe,
Ekinigha kiwe n’obukali bw’amalwa.
Obukali bw’amalwa mubwahisya ebyosi ebimutimbireko, nikwa mwatatsomana.
Mubwamughulumirako, nikwa mwatahira kubo kw’omutima.