Isaya
45 Bino byo Yehova akabwira Koreshi, omundu wiwe oyuhirirweko amaghuta,
Oyo nabiriwatirira oko byala biwe by’amali
Erikinda ebihanda embere siwe,
Erisaghula* abami b’ebyamano by’amalwa,
Erikingula embere siwe omulango w’esyombande ibiri,
Neryo esyongyo sisyendisyakingwa:
2 “Ngendisyaghenda embere syaghu,
Ngendisyalingirirania ehitwa.
Ngendisyatsutsanga emilango y’ekwivre* mo hitswe-hitswe,
N’emighamba y’ekyuma ngendisyatwayo.
3 Ngendisyakuha ebindu by’obughuli ebiri omo mwirimya
N’ebindu by’obughuli ebibisire omo myanya eyibisamire,
Neryo iwatoka eriminya ngoko indi Yehova,
OMungu wa Israeli, oyukakubirikira omo rina lyaghu.
4 Busana n’omughombe waghe ye Yakobo na busana na Israeli omusombolwa waghe
Ngakubirikira omo rina lyaghu.
Ngakuha erina ly’olukengerwa, nomo unalue isighunyasi.
5 Indi Yehova, sihali oghundi.
Sihali oMungu ate ini ngye.
Ngendikuha akaghala,* nomo unalue isighunyasi,
6 Erilua okw’ihuluka ly’eryuba erihika okw’ilenga* lyaryo
Abandu ibatoka eriminya ngoko sihali oghundi ate in’ingye.
Inidi Yehova sihali oghundi.
7 Ngabumba ekyakakala n’erihangyika omwirimya,
Ngahulukaya obuholo n’erihangyika obuhanya;
Ingye Yehova, ngakola emyatsi yosi eyi.
8 Iwe kyanya, uwisaye embula erilua endata;
Ebitu byute eritunganene.
Ekihugho kiyikingule n’erileta omulamo munene,
Kandi oko ndambi ngumerera kihulukaye eritunganene.
Ingye Yehova, nabirikola ekyo.
9 Obulighe oko oyukakuba obuhaka* n’Omuhangyiki* wiwe,
Kusangwa omundu oyo ni luyo buyira
Omo kati-kati k’ebindi bihande-bihande by’ekindu ky’eribumba ebiri oko kitaka!
Eribumba lyanganabwira omubumbi* liti: “Ukakokotayaki kwe?”
Kutse ekindu ekyo ukakokotaya kyangabugha kiti: “Syawite byala kwehi?
10 Obulighe oko oyukabwira tata ati: “Uli tata wandi?”
N’oyukabwira omukali ati: “Ukabutandi?”
11 Yehova Omubuyirire wa Israeli oyo wamubumba ati:
“Mukendinitondesya oko bilebirye emyatsi eyikasa,
N’erinibwira eky’erikolera abaghala baghe n’emibiiri y’ebyala byaghe?
12 Munahangyika ekihugho n’erihangyikira kukyo kw’omundu.
Munasanza ekyanya omo byala byagha,
Kandi ngalayira emilondo yakyo yosi.”
13 Nabirihangania omundu omo ritunganene,
N’esyonzira siwe syosi ngendiyirasyo mo ngome-kome.*
Iye yukendisyahimba omuyi waghe
N’eribohola abanyewa baghe butsira eriliha kutse ekyutuliro,” Yehova w’emilondo atya.
14 Yehova ati:
“Endundi* ye Misri n’ebindu by’ekomerse* bye Etiopia n’Abasabea, abandu bali-bali,
Bakendisyasa ewaghu n’eribya baghu.
Bakendisyaghenda enyuma syaghu ibanabohire omo minyororo.
Bakendisyasa n’eryunama embere syaghu.
Bakendisyabugha okw’iwe omo musabe bati: ‘Kwenene oMungu ali haghuma naghu,
Kandi sihali oghundi, sihali oghundi Mungu.
15 Kwenene uli Mungu oyukayibisa,
Iwe Mungu wa Israeli, Omulamya.
16 Abosi bakendisyahemulwa n’erikuta-kuta;
Abakakokotaya esyosanamu, abosi bakendisyaghenda haghuma ibabirikwa esisoni.
17 Aliwe Yehova akendisyasabula Israeli omo mulamo wa kera na kera.
Siwendisyahemulwa kutse erikwa esisoni kera na kera.
18 Kusangwa Yehova, OMungu w’ekwenene, Omuhangyiki w’olubula,
Oyo wahangyika ekihugho n’erihandakyo ndeke-ndeke,
Mwatahangyikirakyo busa, aliwe mwahangyikakyo kikalawemo,
Akabugha ati:
“Indi Yehova, kandi sihali oghundi.
19 Munitabughira ahabisamire, omo kihugho ky’omwirimya;
Munitabwira abana* ba Yakobo niti,
‘Munisonda-sondaye, aliwe simwendibanaki.’*
Indi Yehova oyukabugha ekitunganene n’eritulaghania ekihikire.
20 Muyihindanaye haghuma, mwase.
Inywe bosi haghuma museghere hakuhi, inywe mwabala erilua omo bihanda.
Abakaheka esyosanamu esibatsire n’erisaba omungu oyute wangalamyabo, sibasiki.
21 Mubughe ebyenyu, mutonde.
Baye embita yo haghuma.
Nindi yo wabugha eki kera kera
N’eritulaghaniakyo omo mighulu eyabirilaba?
Singye, ingye Yehova?
Sihali oghundi Mungu ate ini ngye;
OMungu oyutunganene n’Omulamya, sihali oghundi ate ini ngye.
22 Musube eyo niri, mulamibawe inywe nduli syosi sy’ekihugho,
Kusangwa niri Mungu, sihali oghundi.
23 Nabirilahirya omo rina lyaghe ingyuwene-wene;
Ekinywa kyabirilua omo buno bwaghe omo ritunganene
Kandi sikyendisubula:
Amarwi wosi akendisyanikukamira.
Obuli lulimi lukendisyalahirya erinimakirira
24 N’eribugha luti, ‘Oko kwenene Yehova awite eritunganene ery’ekwenene n’amaka.
Abosi abamuhiteneko bakendisyasa embere siwe ibanakwire esisoni.
25 Abana bosi ba Israeli bakendisyasingana busana na Yehova,
Kandi bakendisyayihalamba busana naye.’”