Isaya
50 Yehova ati:
Ebaruha ey’eritwa endwa eyo naha mama wenyu, oyo nahigha yiri hayi?
Kutse munabaghulya oko bahi abo nirimo amadeni* wabo?
Mulebaye! Mwaghulibawa busana n’amalolo wenyu,
Na mama wenyu mwahiwa busana n’ebibi by’enyu.
2 Neryo busanaki mumwasa isihali mundu?
Busanaki mumwatitaba omughulu nabirikira?
Ebyala byaghe ni bikuhi bitaluke erikombola,
Kutse singwite amaka w’erilamya?
Mulebaye! Ngumaya engetse omw’ihaya lyaghe,
Ngayira esyonyusi mo mbwarara.
Amahere awali musyo akahonda busana n’amaghetse eribula,
Nagho akahonda busana n’enyota.
3 Ngambalaya olubula l’omwirimya,
Ngayira olukimba lw’esaki mo kindu kyalo eky’eriyiswika.”
4 Yehova, Omukama Mukulu oko bosi abirimba olulimi lw’ababirikangiriribwa,*
Nitoke eriminya ngoko nangasubirya* oyuluhire omo kinywa ekyuwene.*
Akanibukaya omo buli tututu;
Akabukaya okutu kwaghe nitoke erihulikirira ng’abakangiriribwe.
5 Yehova, Omukama Mukulu oko Bosi abirihundula amatwi waghe,
Naghe munitayisamambula.
Munitakita oko nzira.
6 Munabindukirya abakanihunza b’omughongo waghe
N’eribindukirya abakanipurako esyonderu amatema waghe.
Munitabisa obusu bwaghe oko myatsi eyikita esisoni n’ey’eritwirako amatandi.
7 Aliwe Yehova, Omukama Mukulu oko Bosi akendiniwatikya.
Busana n’ekyo, sinendihemuka.
Kyo kyabirileka inayira obusu bwaghe ng’eribwe erikala-kalire,*
Kandi ninasi ngoko sinendihemulwa.
8 Oyukabugha ati niri mutunganene ali hakuhi.
Nindi yo wanganitsongera?*
Tuhangane haghuma.*
Nindi yuwite olubanza naghe?
Ayitunde hakuhi naghe.
9 Lebaya! Yehova, Omukama Mukulu oko Bosi akendiniwatikya.
Nindi yukendinyahula mo oyuliko olubanza?
Mulebaye! abosi bakendisyakula ng’olukimba.
Ehinyurughunzu* hikendisyabalya.
10 Omw’inywe, nindi yukubaha Yehova
Oyukahulikirira omulenge w’omughombe wiwe?
Nindi yo wabirilendera omo mwirimya munene butsira kyakakala kyosi-kyosi?
Ayiketere erina lya Yehova n’eriyighemerya* oko Mungu wiwe.
11 Neryo inywe bosi inywe mukakaya omuliro,
Mukalahangukaya esyongulukira,*
Mulendere omo kyakakala ky’omuliro wenyu,
Omo syongulukira esyo mulyakaya.
Ekyo mukendibana erilua omo byala byaghe ky’eki:
Mukendighotsera omo bulumi obukalire.