Isaya
8 Yehova mwanibwira ati: “Wimaye ekibambali kinene uhandike kukyo omo kalamu k’obuli kiro* uti, ‘Maheri-salali-hasi-bazi.’* 2 Kandi nyanzire abimiri bataleghula, ye Uriya omuhereri na Zekaria mughala wa Yeberekia ibahirako esinyatire.*
3 Neryo munaghotsera* n’omuminyereri w’obukali,* naye mwabya mukule, n’endambi muyahika amabuta omwana w’obulume. Yehova mwanibwira ati: “Umwahule mo Maheri-salali-hasi-bazi, 4 kusangwa embere omulwana oyo atsuke eribirikira ati, ‘Baba!’ kutse ati, ‘Mama!’ ebindu bye Damasko n’ebindu ebyanyeghawa e Samaria bikendisyahekwa embere sy’omwami we Asiria.”
5 Kandi Yehova mwasyabugha naghe ati:
6 “Kusangwa abandu aba babirighana amaghetse we Siloa* awakasenda lyolo-lyolo
Kandi bakatsemera Rezini n’omughala wa Remalia,
7 Neryo mulebaye! Yehova akendibaletako amaghetse w’Olusi,*
Amaghetse mangyi kandi aw’amaka,
Omwami we Asiria n’olukengerwa lwiwe lwosi.
Akendisyasa n’eribwagha omo syonzira syosi sy’ehyusi hiwe
N’erileka amaghetse inyabwagha erilaba oko mipaka yiwe yosi y’olusi.
8 N’erilaba omo Yuda.
Akendisyabwagha n’erilaba, erihika oko bikya;
Ebipupa biwe ebisanzire bikendisyusulya ekihugho kyaghu,
Iwe Emanueli!”*
9 Inywe bandu, muhutalaye, nikwa mukendisyabunzungulwa mo bitswe-bitswe.
Muhulikirire, inywe bosi b’ebihugho by’ehali!
Muyiteghekanaye oko malwa,* nikwa mukendisyabunzungulwa mo bitswe-bitswe!
Muyiteghekanaye oko malwa, nikwa mukendisyabunzungulwa mo bitswe-bitswe!
10 Muteghekanaye omupango, aliwe akendisyaluta!
Mubughe ebyo mwanzire, aliwe sibyendisyatokekana,
Kusangwa oMungu ali haghuma netu!*
11 Bino byo Yehova anibwira ebyala biwe by’amaka ibine okw’ingye akanikunga ati isinakwama enzira y’abandu aba:
12 “Ekyo abandu aba bakahula mo mbita nyibi, isiwahulakyo mo mbita nyibi!
Isighubaha ekyo bakubaha;
Isiwatitimana busana nakyo.
13 Yehova w’emilondo—Iye yo utolere iwalangira mo mubuyirire,
Iye yo utolere ighubaha,
Kandi iye yo wangaleka iwatitimana.”
14 Akendisyabya ng’ahabuyirire,
Aliwe ng’eribwe ly’eriyihindako
Kandi ng’olukuka lw’eritwikalako
Oko manyumba abiri we Israeli,
Ekitegho n’ekiryati
Oko bikalani be Yerusalema.
15 Abangyi ba kubo bakendisyatwikala n’eriwa n’eribunangika;
Bakendisyawa omo kitegho n’erihambwa.
17 Ngendilindirira* Yehova oyukabisa obusu bwiwe enyumba ya Yakobo, kandi n’iye yo ngendihirako amaha.
18 Lebaya! Ingye n’abana abo Yehova abirimba tuli ng’ekiminyikalo kandi ng’ebitiko-tiko omo Israeli erilua oko Yehova w’emilondo oyo wikere oko Kitwa kye Sioni.
19 Kandi bamabibabwira ambu: “Mubulaye abakakanaya n’abalimu kutse abalaghuli abakapipira n’erikania omo bihwehwe.” Abandu, oMungu wabo yo batatolere eribulya kwehi? Banatolere eribulya abaholi busana n’abaliho? 20 Omo mwanya w’ekyo litolere ibabulya emighambo n’eritulagho erihandikire!*
Omughulu bakabula eribugha erikwamana n’ekinywa eki, sibawite ekyakakala.* 21 N’obuli mughuma akendisyalaba omo kihugho inyakaghalawa n’erikwa enzala; kandi busana n’enzala n’obuhitane, akendisyatakira omwami wiwe n’oMungu wiwe akasumbira ameso w’endata. 22 Neryo akendisyasamalira ekihugho inyalangira eryaghalwa lisa n’omwirimya, obulime n’emighulu eyikalire, omwirimya w’enyahinda n’ahate ekyakakala.