Yeremia
18 Yehova mwabwira Yeremia y’ebinywa bino: 2 “Hangana, undaghalire ew’omubumbi. Ngendikania naghu ighune eyo.”
3 Neryo munandaghalira ew’omubumbi. Muneya inianemubumbira ekindu oko biringo by’omubumbi. 4 Aliwe ekindu ekyabya akakokotya mukyatsandira omo byala biwe. Neryo omubumbi mwimya eribumba righumerera eryo amakokotyamo ekindi kindu, ngoko abya anzire.*
5 Enyuma sy’aho, Yehova mwakania naghe, mwanibwira ati: 6 “‘Inywe bandu be Israeli, mukalengekanaya muti naghe sinangabayira ngoko omubumbi alyayira eribumba eryo?’ Yehova atya. ‘Mulebaye! Inywe bandu be Israeli, muli omo byala byaghe ng’eribumba eriri omo byala by’omubumbi. 7 Namabibugha niti ngendikulanga, erihimbula, n’eritsandya ekihanda kilebe kutse obwami bulebe, 8 neryo ekihanda ekyo ikyaleka emibere yakyo mibi eyo nakikungako, naghe ingendibindula amalengekania* waghe, neryo isinendisyakiletera obuhanya obo nilwendikiletera. 9 Aliwe namabibugha niti ngendihimba n’erihera ekihanda kilebe kutse obwami bulebe, 10 neryo ekihanda ekyo ikyakola emyatsi mibi omo meso waghe kandi ikyatakwama omulenge waghe, ingendibindula amalengekania* waghe, neryo isinendekolerakyo ebibuya ebyo ngangakolerekyo.’
11 “Neryo lino, kisi ubwire abandu be Yuda n’abikalani be Yerusalema uti, ‘Yehova ati, “Ninemubateghekanirya obuhanya kandi ninemubasohera. Kisi munisubire, kandi muleke emibere yenyu mibi, muyisubeko, n’erileka erikola ebibi.”’”
12 Aliwe mubabugha bati: “Sihakiri eky’erikola! Kundi tu tukendikwama ebiri omo malengekania wetu, n’obuli mughuma w’okw’itwe akendikwama omutima wiwe mubi kandi owalimo erighundu.”
13 Busana n’ekyo Yehova ati:
“Kisi mwateribulya ebindi bihanda.
Omwatsi owali ng’oyu ane atowika?
Omubikira we Israeli abirikola omwatsi owakalire kutsibu.
14 Enzururu ye Lebanoni inemwendisyahwa oko syonguka* esiri oko mandaghala w’ekitwa ekyo?
Kutse amaghetse awahehere awakalua hali anganuma?
15 Aliwe abandu baghe babirinibirirwa.
Kundi bakaherera amahere ekindu ekite na mughaso
Kandi bakatwikalaya abandu abakalaba omo syonzira syabo, esyonzira sya kera,
Kusudi bayalabe omo hiyira ehirimo ehikunguli,*
16 Busana n’ekyo, ekihugho kyabo kikendibya ekindu ekikita obuba,
Kandi kikendibya kindu ekyo bandu bakendisyabya bakasughundira kera na kera.
Abandu bosi abakendisyabya bakalaba mukyo bakendisyabya bakasamalirakyo ibabirisweka kandi bakendisyabya bakatsingya omutwe.
17 Ng’erihunga erikasira oko luhande lw’eyo ryuba rikasira, ngendisyapanza-panzabo embere sy’enzighu yabo.
Ekiro kyabo ky’obuhanya kikendisyabya kyahika, ngendisyabalolyako omughongo omo mwanya w’eribasamalira.”*
18 Neryo mubabugha bati: “Mwase, tusohere Yeremia, kundi abahereri betu bo banemwendisyabya bakatuminyisya emighambo,* abalume b’amenge bo banemwendisyabya bakatuha erihano, n’abaminyereri bo banemwendisyabya bakatubwira ekinywa ky’oMungu. Mwase tumubugheko muhanda,* isitwatsomana ebyo akabugha.”
19 Yehova, unihulikirire,
Uhulikirire n’ebyo syonzighu syaghe sikabugha.
20 Kinatolere erikolera ekibi oyulyakukolera ekibuya?
Babiritakula ekyuna batoke eriniita.*
Wibuke ngoko nimana embere syaghu nitoke eribabughako ebyuwene,
Kandi nitoke eribalusyako ekinigha kyaghu.
21 Neryo uleke abana babo bahole omo nzala,
Kandi ulekebo bakwe omo muyali.
Abakali babo bahweko abana kandi babye bakwa-kali.
Abalume babo bakwe omo kihunzo ekikita,
Abalwana babo baholere omo malwa omo muyali.
22 Howike omulenge owakasira omo manyumba wabo
Omughulu ukaleterabo ababandi kitsumbukirania.
Kundi mubakatakula ekyuna batoke erinihamba
Kandi mubakategha ebisando byaghe.
23 Aliwe iwe, Yehova,
Unasi ndeke-ndeke esyombita syosi esyo bakakola batoke eriniita.
Isiwabisa ekosa yabo,
Kandi isiwazima erilolo ryabo.
Batwikale embere syaghu
Omughulu ukendibaha amalipizi omw’ihitana ryaghu.