Hosea
5 “Inywe bahereri, muhulikirire omwatsi ono,
Inywe Baisraeli, muhulikirire,
Inywe bandu b’omo nyumba y’omwami, muhulikirire,
Kundi mukenditswerwa,
Kusangwa muli kitegho oko Mizpa
Kandi muli butimba obusanzire endata oko Tabori.
2 Abakaghana erinikwama babiriyitoberya omo bwiti,
Ngendikungabo, abosi.
3 Ninasi Efraimu,
Na Israeli syabiseme okw’ingye.
Kundi lino, iwe Efraimu, wabirikola obumbalaka* bunene;
Israeli abiriyitsandya.
4 Emikolere yabo siyiribawatikaya erisubira oMungu wabo,
Kundi balimo mutima w’obumbalaka;*
Kandi sibatsomene Yehova.
5 Emiyiheko ya Israeli yabirikangania ngoko ni w’amakosa;*
Israeli na Efraimu babiritwikala busana n’ekosa yabo,
Na Yuda abiritwikala haghuma nabo.
6 Mubayasondya Yehova ibane n’esyombuli syabo n’esyonde syabo,
Aliwe mubatamusunga.
Abya iniabiriya hali okw’ibo.
7 Babirileghula oko Yehova
Kundi babiributa abana bagheni.
Neryo lino, omwisi mughuma akenditomerabo,* ibo n’ebitaka byabo.
8 Mubuhire omo rihembe mwe Gibea,
Mubuhire n’omo ngunga mwe Rama!
Mughuse emilenge y’amalwa e Bete-aveni,
Benyamini, tune enyuma syaghu!
9 Efraimu, ukendisyabya ekindu ekikita obuba omughulu ukendisyahabwa amalipizi.
Nabiribwira ebihanda by’Abaisraeli ekitendisyabula erihika.
10 Abakulu be Yuda bali ng’abandu abakahumisaya omupaka.
Ngendisyabutulirako ekinigha kyaghe kinene ng’amaghetse.
11 Efraimu abirighalibwa, atolere eritundulwa,
Kundi mwayisogha kundu erikwamirira enzighu yiwe.
12 Neryo munakolera Efraimu ngoko ekinyurughunzu kikakola
Kandi munakolera abandu be Yuda ngoko ekihondo kikakola.
13 Efraimu mwabya abilangira obukoni bwiwe, na Yuda mwabya abilangira ekironda kiwe,
Efraimu mwaya e Asiria kandi mwatuma abandu oko mwami mukulu.
Aliwe omwami oyo mwatatoka eribalamya,
Kandi mwatatoka erilamya ekironda kyenyu.
14 Oko Efraimu, ngendibya ng’esimba eyikine nyilere,
Oko bandu be Yuda, ngendibya ng’esimba eyiri n’akaghala.*
Ingye, ingyuwene-wene ngendisyabatulanga mo bihande-bihande, n’eriyighendera;
Ngendisyabaheka, sihali oyukendisyabasabula.
15 Ngendisyayighendera n’erisuba ewaghe, erihika omughulu bakendisyahikirwa n’ebikaluira omo kosa yabo,
Neryo bakendisyarondya olukogho lwaghe.*
Bakendisyanirondya omughulu bakendisyabya omo maligho.”