Yoeli
3 “Kundi oko biro ebyo n’oko mughulu oyo,
Omughulu ngendisyasubya abanyewa be Yuda n’abe Yerusalema,
2 Ngendisyakuma-kuma n’abandu b’omo bihanda byosi
Ngendisyatswererabo eyo
Busana n’ebyo bakolera abandu baghe n’omwandu waghe, Israeli,
Kundi mubapanza-panzirabo omo bihanda
Kandi mubayighabira ekihugho kyaghe.
3 Mubabya bakakola obukanga bakayighabira abandu baghe;
Mubabya bakaghulya omulwana batoke eribana esy’eriliha omumbalaka.
Kandi mubabya bakaghulya omumbesa batoke eribana esy’erighulako edivai.
4 Nenyu, Tiro, Sidoni, n’ebiharo byosi by’Obufilistini,
Mukanirondakoki?
Mwanzire imwanikolera ekibi ekyo nabakolera?
Mwamabya imukayituhuliraya,
Ingendilw’inabaliha ngoko mwanikolera.
5 Kundi mwabirimya efeza* yaghe n’ehoro yaghe,
Kandi mwabiritwala omo syohekalu syenyu mw’ebindu byaghe by’obughuli ebyuwene-wene;
6 Mwabirighulya abandu be Yuda n’abe Yerusalema b’Abagiriki
Mutoke eritwalabo hali kutsibu n’ekiharo kyabo;
7 Ngendibabukya batoke erilua eyo mwabaghuliraya,
Kandi ngendisyabaliha ngoko mwanikolera.
8 Ngendisyahira abana benyu b’obulume n’abana benyu b’obukali omo byala by’abandu be Yuda
N’abo bakendisyaghulyabo abandu be Sheba, ekihanda ekiri hali;
Kundi Yehova iyuwene-wene abiribugha atya.
9 Mutulaghanaye omwatsi ono omo bihanda:
‘Muyiteghekanaye busana n’amalwa!*
Muhire omo bandu b’amaka m’omuhwa!
Abasuda bosi baseghere hakuhi, balole embere!
10 Muyire esisuka syenyu mo miyali n’ebisara byenyu mo matumo.
Oyuleghetsene abughe ati: “Niri n’akaghala.”
11 Inywe bihanda byosi by’ehakuhi-kuhi, mwase muwatikaye, muhindane haghuma!’”
Yehova, ukimiraye aho h’abasuda baghu.
12 “Ebihanda bibuke n’eriya omo Musya* wa Yehoshafati;
Kundi eyo yo ngendisyikala ngatswera ebihanda byosi by’ehakuhi-kuhi.
13 Mulabaye omughusu, kundi akalyo kabiryera.
Mundaghale eriyalyatanga emizabibu, kundi ekikamiro kyabiryusula.
Ebikamiro byabiryusula kutsibu, kundi obubi bwabo ni bunene kutsibu.
14 Abandu bangyi, abandu bangyi bali omo musya* w’eritswereramo abandu,
Kundi ekiro kya Yehova kiri hakuhi omo musya* w’eritswereramo abandu.
15 Eryuba n’omughenda bikendisyabya mwirimya,
N’esyongununu sisyendisyakolerya.
16 Kandi Yehova akendisyarurumira e Sioni,
Akendisyabughira e Yerusalema omo mulenge muli.
Olubula n’ekihugho bikendisyasuka-sukana;
Aliwe Yehova akendisyabya busayiro bw’abandu biwe,
Omwanya ogho mundu ate angahikamo bweghu-bweghu w’Abaisraeli.
17 Kandi mukendisyaminya ngoko ingye Yehova oMungu wenyu nikere e Sioni, ekitwa kyaghe kibuyirire.
Yerusalema akendisyabya mwanya mubuyirire,
Abandu b’ehandi* sibendisyasyalaba mugho n’ahake.
18 Oko biro ebyo, ebitwa bikendisyatoghongako edivai eyisihire
N’ehitwa hikendisyasendako amaziwa,
N’esyonyusi syosi sye Yuda sikendisyasendamo amaghetse.
Engununuko ikendisyalua omo nyumba ya Yehova,
Ikendisyuta amaghetse omo Musya* w’emiti y’olughando*
19 Aliwe ekihugho kye Misri kikendisyabya matongo
Ne Edomu ikendisyabya mbwarara eyitemo kindu,
Busana n’obutsururu obo bakolera abandu be Yuda
Kandi kundi mubutira omo kihugho kiwe m’omusasi w’abandu abate n’ekosa.
20 Aliwe Yuda akendisyikalwamo kera na kera
Na Yerusalema akendisyikalwamo omo bizazi* byosi.
21 Ngendisyabalusyako ekosa y’eryuta omusasi eyo babyako embere.
Kandi ingye Yehova, ngendisyikala e Sioni.”